កម្ពុជា ដាក់ញត្តិប្តឹងទៅប្រទេសមហាអំណាច និងអង្គការអន្តរជាតិ ករណីក្រុមទាហានឈុតខ្មៅថៃ ចាប់រំលោភសេពសន្ថវៈលើស្ត្រីពលការិនីខ្មែរ
(ភ្នំពេញ)៖ សហភាព ពលកម្មជាតិ កម្ពុជា បានដាក់ញត្តិប្ដឹងទៅប្រទេសមហាអំណាច និងបណ្តាអង្គការអន្តរជាតិធំៗមួយចំនួន ដែលមាននិវេសនដ្ឋាននៅកម្ពុជា ឱ្យជួយអន្តរាគមន៍លើករណីដែលក្រុមទាហានឈុតខ្មៅថៃ បានចាប់រំលោភជាក្រុមលើស្ត្រីជាពលការិនីខ្មែរ ។ ការដាក់ញាតិ្តប្តឹងរកយុតិ្តធម៌ជូនដល់ពលការិនីកម្ពុជានេះ បានដឹកនាំធ្វើឡើងដោយប្រធានសហភាពពលកម្មជាតិកម្ពុជា លោក សំ សឿន នៅថ្ងៃទី២១ ខែវិច្ឆិកា ឆ្នាំ២០២៥ នៅតាមបណ្តាស្ថានទូត និងការិយាល័យអង្គការអន្តរជាតិនានាប្រចាំនៅកម្ពុជា ដែលរួមមាន ស្ថានអាម៉េរិក, ស្ថានទូតបារាំង, ស្ថានទូតរុស្ស៊ី, ស្ថានទូតចិន, ការិយាល័យសហភាពអ៊ឺរ៉ុបប្រចាំនៅកម្ពុជា, ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា, ការិយាល័យអង្គការពលកម្មអន្តរជាតិ ILO ប្រចាំនៅកម្ពុជា និងការិយាល័យអង្គការទេសន្តរប្រវេសន៍អន្តរជាតិ IOM ផងដែរ ។
សូមរំលឹកថា ក្រុមទាហានឈុតខ្មៅថៃចំនួន ៧នាក់ កាលពីថ្ងៃទី១៥ ខែវិច្ឆិកា ឆ្នាំ២០២៥កន្លងទៅ បានចាប់រំលោភសេពសន្ថវៈលើពលករខ្មែរជាស្ត្រីម្នាក់ ក្រោយរូបនាង ត្រូវបានបំបែកចេញពីក្រុមពលករទេសន្តរប្រវេសន៍ខ្មែរចំនួន ១៣នាក់ផ្សេងទៀត នៅខណៈពេលដែលពលករខ្មែរទាំងនោះ បានធ្វើដំណើរចេញពីប្រទេសថៃត្រឡប់មកកម្ពុជាវិញ ។
ក្រោយកើតហេតុនោះកើតឡើង រាជរដ្ឋាភិបាល និងប្រជាពលរដ្ឋកម្ពុជាទូទាំងប្រទេស បានថ្កោលទោសចំពោះអំពើរំលោភបំពាននេះ និងទាមទារឱ្យអាជ្ញាធរថៃ ត្រូវមានការទទួលខុសត្រូវ និងដាក់ទោសចំពោះជនល្មើស ដែលជាកងកម្លាំងរបស់ថៃផងដែរ ។ នៅជាមួយគ្នានេះ ចំពោះគោលបំណងនៃដឹកនាំសកម្មភាពដាក់ញត្តិនេះផងដែរ ត្រូវបាន លោក សំ សឿន ប្រធានសហភាពពលកម្មជាតិកម្ពុជា បានបញ្ជាក់ថា ធ្វើឡើងដើម្បីឱ្យប្រទេសមហាអំណាច និងសហគមន៍អន្តរជាតិ ជួយស្វែងរកយុត្តិធម៌ជូនស្ត្រីកម្ពុជា ដែលរងគ្រោះពីអំពើដ៏ព្រៃផ្សៃរបស់ទាហានឈុតខ្មៅថៃទាំងនោះ និងស្នើសុំឱ្យប្រទេសមហាអំណាច និងអង្គអន្តរជាតិពាក់ព័ន្ធនានា ធ្វើការស៊ើបអង្កេតដោយឯករាជ្យលើករណីដែលកើតឡើងចំពោះស្រ្តីកម្ពុជានោះ ។
លោក សំ សឿន បានបញ្ជាក់ទៀតថា ក្នុងនាមរូបលោក ដែលតំណាងឲ្យសហព័ន្ធសហជីព និងអង្គការ សមាគម សរុបចំនួន១៧ និងសហជីបមូលដ្ឋានចំនួន១៧៨ ដែលមានសមាជិកជាង ៧ម៉ឺននាក់ មកពីគ្រប់វិស័យ បានថ្កោលទោសចំពោះអំពើហិង្សា និងការរំលោភបំពានផ្លូវភេទជាក្រុម មកលើពលការិនីចំណាកស្រុកកម្ពុជា ពីក្រុមទាហានឈុតខ្មៅថៃ នៅតំបន់ព្រំដែនកម្ពុជា-ថៃនោះ ។ ប្រធានសហជីពកម្ពុជា បានថ្លែងទៀតថា លោក ក៏ដូចជាសមជិកសហព័ន្ធ សហជីបទាំងអស់ ពិតជាមិនអាចទទួលយកបានឡើយ និងមានសេចក្តីឈឺចាប់បំផុត ចំពោះករណី រំលោភសេពសន្ថវៈជាក្រុមយ៉ាងសាហាវព្រៃផ្សៃមកលើស្រី្តពលការិនីកម្ពុជា និងការវាយធ្វើបាបពលករខ្មែរផ្សេងទៀត ដ៏សាហាវឃោរឃៅ យង់ឃ្នង អមនុស្សធម៌ និងការរំលោភបំពានសិទ្ធិមនុស្សយ៉ាងធ្ងន់ធ្ងរពីសំណាក់ទាហានឈុតខ្មៅថៃនោះ ។
ប្រធានសហភាពពលកម្មជាតិកម្ពុជា នូវបានទទូចដល់រដ្ឋាភិបាល និងកងទ័ពថៃ ត្រូវទទួលស្គាល់ និងទទួលខុសត្រូវលើអំពើឃោរឃៅនេះ ហើយបញ្ចប់វប្បធម៌និទណ្ឌភាព ដែលនាំឱ្យអំពើបំពានលើស្ត្រីដែលកើតឡើងជាបន្តបន្ទាប់ និងត្រូវចាត់វិធានការដាក់ទណ្ឌកម្មច្បាស់លាស់លើមន្ត្រី និងកងទ័ពពាក់ព័ន្ធ និងធានាយុត្តិធម៌ដល់ជនរងគ្រោះកម្ពុជាផងដែរ ៕
អត្ថបទ ៖ គង់ សុផុល
រូបភាព ៖ សហភាព ពលកម្មជាតិ កម្ពុជា
