វគ្គបណ្តុះបណ្តាលគ្រូបច្ចេកទេសកីឡាការ៉ាតេ មធ្យមថ្នាក់ជាតិ ជំរុញសមត្ថភាពលើជំនាញបង្ហាត់
(ភ្នំពេញ)៖ លោក ហេង ផេង គ្រូឧទ្ទេសប្រចាំវគ្គ បណ្តុះបណ្តាលគ្រូបច្ចេកទេសការ៉ាតេមធ្យមថ្នាក់ជាតិ បានថ្លែងបញ្ជាក់ឱ្យដឹងថា វគ្គបណ្តុះបណ្តាលមួយនេះ មានរយៈពេល ៥ថ្ងៃ ចាប់ពីថ្ងៃទី១៩ ដល់ ថ្ងៃទី២៣ ខែវិច្ឆិកា ឆ្នាំ២០២៥។ សិក្ខាកាមដែលបានចូលរួមនៅក្នុងវគ្គនេះ នឹងទទួលបានចំណេះជំនាញក្នុងការបង្ហាត់កាន់តែច្បាស់ ដែលនឹងរួមចំណែកធ្វើឱ្យកូនសិស្សគុនកាន់តែមានគុណភាពក្នុងការប្រកួតប្រជែង ។ ដ្បិតវគ្គបណ្តុះបណ្តាលនេះ សិក្ខាកាមទាំងអស់ត្រូវបានបំពាក់បំប៉ន និងអនុវត្តដោយផ្ទាល់អំពីការរៀបចំផែនការបង្ហាត់សិស្ស បច្ចេកទេសផ្សេងៗពាក់ព័ន្ធនឹងបទបញ្ញាតការប្រកួតដែលជាច្បាប់របស់អន្តរជាតិ ពិសេស គឺយុទ្ធសាស្រ្តប្រាស្រ័យទាក់ទងល្អជាមួយសិស្សគុនដើម្បីទាក់ទាញធ្វើឱ្យកូនសិស្សចង់ហ្វឹកហាត់និងយកចិត្តទុកដាក់។
សូមបញ្ជាក់ថា វគ្គបណ្តុះបណ្តាលគ្រូបច្ចេកទេសការ៉ាតេមធ្យមថ្នាក់ជាតិនេះ មានសិក្ខាកាមជាគ្រូបង្វឹកចូលរួមចំនួន ២៥នាក់ មកពី ២៥សមាគម ក្លឹប ក្នុងគោលដៅជំរុញអភិវឌ្ឍសមត្ថភាពគ្រូបង្វឹកឱ្យក្លាយជាគ្រូបង្វឹកដែលមានគុណភាពក្នុងការបង្ហាត់ត្រៀមនាំយកកីឡាករកីឡាការិនីចូលរួមនៅក្នុងការប្រកួតជ្រើសរើសជើងឯកថ្នាក់ជាតិដែលរៀបចំដោយសហព័ន្ធកីឡាការ៉ាតេកម្ពុជា៕
រូបភាព ៖ ជីម ភារ៉ា
អត្ថបទ ៖ ជាវ ចន្ធូ
