ស្ទឹងត្រែង៖រដ្ឋបាលខេត្តស្ទឹងត្រែងបានប្រារព្ធពិធីអបអរសាទរទិវាអនាម័យបរិស្ថានជាតិ ២៣ វិច្ឆិកា ឆ្នាំ២០២៥ ក្រោមប្រធានបទ “ទម្លាប់ស្អាត គ្រួសារស្អាត បរិស្ថានល្អ”នៅមុខសាលាខេត្តស្ទឹងត្រែងកាលពីថ្ងៃទី២១ ខែវិច្ឆិកា ឆ្នាំ២០២៥ ក្រោមការអញ្ជើញចូលរួមពីឯកឧត្តម ឈាង ឡាក់ ប្រធានក្រុមប្រឹក្សាខេត្ត ,ឯកឧត្តម សរ សុពុត្រា អភិបាលខេត្តស្ទឹងត្រែង ។

នៅក្នុងឱកាសនោះឯកឧត្តមអភិបាលខេត្តស្ទឹងត្រែងរំលឹកថា ការប្រារព្ធពិធីនេះ គឺជាសារមួយ ជំរុញឱ្យមាន​សកម្មភាព​ធ្វើអនាម័យ សំអាតបរិស្ថានទូទាំងខេត្តស្ទឹងត្រែង ដើម្បីលើកកម្ពស់តម្លៃបរិស្ថានស្អាត ។

ឯកឧត្តមបញ្ជាក់ថា ដើម្បីសោភណភាព សុខភាពសាធារណៈ និងបរិស្ថាន ចាំបាច់ត្រូវយក​ចិត្តទុក​ដាក់​លើកកម្ពស់ លើការគ្រប់គ្រងសំរាម សំណល់រឹងទីប្រជុំជនឱ្យបានត្រឹមត្រូវ ដោយត្រូវវេចខ្ចប់ និងញែកសំរាម សំណល់រឹង ដែល​អាចប្រើប្រាស់ឡើងវិញ ឬកែច្នៃបាន ៕
ដោយ៖ឡុង សំបូរ