(ភ្នំពេញ)៖ ដើម្បីកាត់បន្ថយអត្រាមរណៈភាព មាតា និង ទារក បន្ថែមទៀត កម្ពុជាត្រូវពឹងផ្អែកទាំងស្រុងលើ​សមត្ថ​ភាពជំនាញរបស់វេជ្ជបណ្ឌិត វេជ្ជបណ្ឌិតឯកទេស សាស្ត្រាចារ្យ ផ្នែកសម្ភព និងរោគស្ត្រីវិទ្យាទាំងអស់គ្នា​នេះហើយ ពីព្រោះ ករណីផ្ទៃពោះ ឬសម្រាលកូនធម្មតា មិនមែនជាឧបសគ្គទៀតទេ តែការដោះស្រាយករណី សម្រាលកូនលំបាក មានឧបសគ្គ នៅតែជាបញ្ហានៅ​ឡើយ។ ការខិតខំប្រមូលសមាជិកសមាគមសម្ភព និង​រោគស្ត្រីវិទ្យាកម្ពុជាឲ្យបានច្រើន ធ្វើការបណ្តុះបណ្តាល ចែករំលែកចំណេះដឹង ឲ្យគ្នាទៅវិញទៅមកបានទៀង​ទាត់ និងទាន់ពេលវេលា ជាកត្តាសំខាន់ និងជួយចូលរួម ដោះស្រាយបញ្ហានាពេលអនាគត។

នេះជាប្រសាសន៍ លោកជំទាវសាស្រ្តាចារ្យ អ៊ឹម សិទិ្ធការ្យ រដ្ឋលេខាធិការ តំណាង ឯកឧត្តមសាស្រ្តាចារ្យ ឈាង រ៉ា រដ្ឋមន្រី្តក្រសួងសុខាភិបាល ក្នុងពិធីបើក​សន្និ​បាត​លើកទី២៤ របស់សមាគមសម្ភពនិងរោគស្ត្រីវិទ្យា​កម្ពុជា ក្រោមប្រធានបទ «រួមគ្នាសង្រ្គោះជីវិតមាត និង​ទារក» នាព្រឹកថ្ងៃទី២២ ខែវិច្ឆិកា ឆ្នាំ២០២៥នេះ។

ឯកឧត្តមសាស្ត្រាចារ្យ គុំ កាណាល់ ប្រធានសមាគម​សម្ភព និងរោគស្ត្រីវិទ្យាកម្ពុជា បានមានប្រសាសន៍ថា ប្រធានបទលើកនេះគឺ “រួមគ្នាសង្គ្រោះជីវិតមាតា និង ទារក” ។ ជារៀងរាល់ឆ្នាំសមាគមបានរៀបចំ​សន្និបាត​នេះ ដើម្បីផ្លាស់ប្តូរយោបល់ ចំណេះដឹង និងរៀន​សូត្រ​ពីគ្នាទៅវិញទៅមក ក្នុងជំនាញសម្ភព និងរោគស្ត្រី និង​បង្កើនចំណេះដឹងរបស់សមាជិក សមាជិកា ក៏ដូចជា​ទុន​ក្នុងការផ្តល់សេវាប្រកបដោយប្រសិទ្ធិភាព និងគុណភាព​ប្រកបដោយគុណធម៌ និងសុវត្ថិភាព។ ក្រៅពីបង្កើនចំ​ណេះ​ដឹង ចំណេះធ្វើនៅពេលនេះយើង​ត្រូវមាន​កាតព្វ​កិច្ច ធ្វើយ៉ាងដូចម្តេចឲ្យមានសន្ទុះ ឆន្ទៈខ្លាំងក្លា ប្រកប​ដោយសីលធម៌ តាមវិជ្ជាជីវៈ ដើម្បីប្រជាជន ។

លោកជំទាវសាស្រ្តាចារ្យ អ៊ឹម សិទិ្ធការ្យ បានថ្លែងថា បញ្ជា​ក់​ថា សន្និបាតនេះ គឺពិតជាព្រឹត្តិការណ៍ ដ៏ពិសេស​វិសាលមួយ ក្នុងការលើកកំពស់នូវគុណភាព ចំណេះ​ដឹង​ជំនាញ អ្នកផ្តល់សេវា សុខាភិបាលកម្ពុជាយើង សំ​ដៅ​ធ្វើឱ្យមានសុក្រិតភាពលើការអភិវឌ្ឍន៍ទាំង​ធនធាន​មនុស្ស និងនវានុវត្តន៍បច្ចេកវិទ្យា ។ កាលពីថ្ងៃទី០៥ ខែតុលា ឆ្នាំ២០២៣កន្លងទៅក្រសួងសុខាភិបាល​ក៏​បាន​ប្រកាសដាក់ចូលការចាក់ថ្នាំបង្ការជំងឺមហារីក​មាត់​ស្បូនលើកុមារីអាយុ៩ឆ្នាំ ចូលក្នុងកម្មវិធីចាក់ថ្នាំបង្ការ​ថ្នាក់ជាតិ សំដៅលើក កម្ពស់សុខមាលភាព ប្រជាពល​រដ្ឋកម្ពុជា និងក៏ចូលរួមចំណែកក្នុងគោលដៅ​លុបបំបាត់​ជំងឺមហារីកមាត់ស្បូននាឆ្នាំ២០៣០របស់អង្គការសុខភាពពិភពលោក (WHO) ផងដែរ៕

រូបភាព ៖ ថេត វិចិត្រ
អត្ថបទ ៖ ហេង សម្បត្តិ