ភ្នំពេញ៖ឯកឧត្តម សូ វិសុទ្ធី រដ្ឋលេខាធិការក្រសួងប្រៃសណីយ៍និងទូរគមនាគមន៍(ក.ប.ទ.)បានដឹកនាំគណៈប្រតិភូ រួមជាមួយក្រុមហ៊ុនបច្ចេកវិទ្យានិងធុរកិច្ចថ្មីឌីជីថល (Digital Startup) ចំនួនពីរ( BookMeBus និង Bamnang) អញ្ជើញចូលរួមកម្មវិធី Silicon Valley Summit 2025 ដែលរៀបចំដោយក្រុមហ៊ុន Plug and Play នៅទីក្រុង Sunnyvale រដ្ឋកាលីហ្វ័រញ៉ា សហរដ្ឋអាមេរិកពីថ្ងៃទី១៨-២០ ខែវិច្ឆិកា ឆ្នាំ២០២៥។

មន្រ្តីក្រសួងប្រៃសណីយ៍បានឱ្យដឹងថា កម្មវិធីនេះជាព្រឹត្តិការណ៍សម្រាប់សហគ្រិនធុរកិច្ចថ្មីឌីជីថល វិនិយោគិន ក្រុមហ៊ុន​បច្ចេកវិទ្យាធំៗ និងអ្នកជំនាញនានា បង្ហាញអំពីផលិតផល សេវាកម្ម ឬដំណោះស្រាយថ្មីៗ បង្កើតបណ្ដាញ​និងដៃគូពាណិជ្ជកម្ម ការស្វែងរកមូលនិធិ និងការ Pitching ដើម្បីទទួលបានការវិនិយោគ ។លើសពីនេះក៏​ជាសិក្ខាសាលា​ចែករំលែកចំណេះដឹងនិងបទពិសោធពីថ្នាក់ដឹកនាំក្រុមហ៊ុន និងអ្នកជំនាញលើវិស័យជាច្រើន។

ប្រភពដដែលបញ្ជាក់ថា កម្មវិធីនេះដែរមានអ្នកចូលរួមប្រមាណ ៦ ០០០ នាក់ មកពីជុំវិញពិភពលោក និងធុរកិច្ច​ថ្មីឌីជីថលអន្តរជាតិជាង ១ ១០០ លើ ២៥ វិស័យផ្សេងគ្នា។ ដោយឡែកធុរកិច្ចថ្មីឌីជីថលកម្ពុជា បានកសាង​បណ្ដាញ​ជាមួយធុរកិច្ចថ្មីឌីជីថលអន្តរជាតិនានា និងចាប់យកឱកាសវិនិយោគពីក្រុមហ៊ុន Plug and Play ដែលជាការ​ជំរុញការអភិវឌ្ឍប្រព័ន្ធអេកូឡូស៊ីធុរកិច្ចថ្មីឌីជីថលកម្ពុជា ឱ្យរីកចម្រើនកាន់តែឆាប់រហ័ស ជាពិសេសចូលរួមចំណែក​ជំរុញកំណើនសេដ្ឋកិច្ច ស្របតាមគោលនយោបាយរបស់រាជរដ្ឋាភិបាលអាណត្តិទី៧។

ស្នាក់នៅបំពេញការងារនៅទីនោះ ឯកឧត្តមរដ្ឋលេខាធិការបានជួបពិភាក្សាជាមួយ លោក Larry Klein អភិបាលក្រុង Sunnyvale ដើម្បីស្វែងយល់អំពីឧត្តមានុវត្តន៍នៃការធ្វើបរិវត្តកម្មឌីជីថល និងបន្តកិច្ចសហប្រតិបត្តិការ ចែករំលែក​ចំណេះដឹងនិងឧត្តមានុវត្តន៍បរិវត្តកម្មឌីជីថល រវាង ក.ប.ទ. និងទីក្រុង Sunnyvale ជាទីក្រុងរបស់តំបន់ Silicon Valley ដែលប្រមូលផ្ដុំទៅដោយក្រុមហ៊ុនបច្ចេកវិទ្យាលំដាប់ពិភពលោកជាច្រើន។

លើសពីនេះ ប្រតិភូ ក៏បានជាមួយ​ពិភាក្សារជាមួយ គណៈប្រតិភូនៃតំបន់អភិវឌ្ឍសេដ្ឋកិច្ចនិងបច្ចេកវិទ្យា Nantong (NETDA) ដើម្បីស្វែងយល់ពី​សក្ដានុពល​និងកិច្ចសហប្រតិបត្តិការ ក៏ដូចជាឱកាសក្នុងការនាំយកធុរកិច្ចថ្មីឌីជីថលនៅកម្ពុជាពង្រីក​ទីផ្សារទៅកាន់ទី​ក្រុង Nantong។ប្រតិភូក៏បានជួបជាមួយអ្នកជំនាញរបស់មជ្ឈមណ្ឌល Plug and Play ដើម្បីពិភាក្សាការងាររៀប​ចំផែនការយុទ្ធសាស្រ្ត ៥ឆ្នាំ សម្រាប់អភិវឌ្ឍអេកូឡូស៊ីធុរកិច្ចថ្មីឌីជីថលនៅកម្ពុជាផងដែរ៕

ដោយ៖ង៉ាន់ ទិត្យ