ភ្នំពេញ៖”បរិច្ចាគឈាម ផ្តល់ក្តី សង្ឃឹម កសាងសន្តិភាព “គឺជាប្រធានបទនៃកម្មវិធីបរិច្ចាគឈាមលើកទី៥ ដែលរៀប
ចំឡើងដោយកាកបាទក្រហមកម្ពុជាក្រោមការអញ្ជើញចូលរួមពីលោកជំទាវ ពុំ ចន្ទីនី អគ្គលេខាធិការកាកបាទក្រហម​កម្ពុជា។

ក្នុងកម្មវិធីបរិច្ចាគឈាមដែលប្រព្រឹត្តទីនៅទីស្នាក់ការកណ្តាលកាកបាទក្រហមកម្ពុជា នាថ្ងៃទី២៣ ខែវិច្ឆិកា ឆ្នាំ២០២៥
លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាមបានថ្លែងថា យុទ្ធនាការ “បរិច្ចាគឈាម ផ្តល់ក្តីសង្ឃឹម កសាងសន្តិភាព”គឺជាប្រធានបទដ៏មានអត្ថន័យសម្រាប់យើងទាំងអស់គ្នា។លោកបន្ថែមថា កម្មវិធីនេះ​មានគោល​បំណងសំខាន់២ គឺទី១.បង្កើតទម្លាប់ និងវប្បធម៌នៃការបរិច្ចាគឈាមដោយស្ម័គ្រចិត្ត ដើម្បីជំរុញការលើក​កម្ពស់ឱ្យ​យុវជន និងប្រជាជនទូទៅចូលរួមធ្វើសកម្មភាពជាមួយសេវាកម្មជាតិផ្តល់ឈាមនៅទូទាំងប្រទេស ដើម្បីធានាឱ្យមានការ​ផ្គត់ផ្គង់ឈាមគ្រប់គ្រាន់សម្រាប់អ្នកជំងឺដែលកំពុងត្រូវការឈាមនៅគ្រប់មន្ទីរពេទ្យទាំងអស់ដោយ គ្មានការរើសអើង មិនប្រកាន់ជាតិសាសន៍ សាសនា ឬនិន្នាការនយោបាយ និងទី២.ផ្សារភ្ជាប់សកម្មភាពនៃការ​បរិច្ចាគឈាម​​ដោយស្ម័គ្រចិត្តទៅនឹងសកម្មភាពមនុស្សធម៌ដ៏ល្អប្រពៃក្នុងសង្គម ។

ក្នុងឱកាសនោះលោកជំទាវ ពុំ ចន្ទីនី មានប្រសាសន៍ថា ការចូលបរិច្ចាគឈាមនាពេលនេះ មិនត្រឹមតែផ្តល់ការ​លើក​ទឹកចិត្តដល់អ្នកបរិច្ចាគឈាមតែប៉ុណ្ណោះទេ ថែមទាំងផ្សព្វផ្សាយពីការយល់ដឹង និងសារៈសំខាន់នៃការ​បរិច្ចាគឈាម​ជាប្រចាំ ដើម្បីជួយសង្គ្រោះ ជីវិតនិងការលើកកម្ពស់ការយល់ដឹងពីវិជ្ជាសង្រ្គោះបឋម សហគមន៍មាន​សុខភាពល្អ និងមាន​ភាពធន់ នឹងអាកាសធាតុថែមទៀតផង ។ជាក់ស្តែងប្រធានបទ “បរិច្ចាគឈាម ឈាមមួយប្លោក​អាចជួយរក្សា​ជីវិតមនុស្ស៣នាក់ ។ការបរិច្ចាគរបស់យើងម្នាក់ៗ មិនត្រឹមជាការផ្តល់ឈាមប៉ុណ្ណោះទេ ប៉ុន្តែជាការផ្តល់ក្តីសង្ឃឹម​ដល់អ្នកជំងឺដែលកំពុងរង់ចាំ ។

លោកជំទាវអគ្គលេខាធិការ ក៏បានលើកឡើងពីអត្ថប្រយោជន៍នៃការបរិច្ចាគឈាមផងដែរ៕

ដោយ៖ គ្រី សម្បត្តិ