បាត់ដំបង៖ទំនប់ដូនទ្រី ដែលស្ថិតនៅឃុំបាសាក់ ស្រុករុក្ខគិរី ខេត្តបាត់ដំបង បានសាងសង់រួចរាល់ហើយ។ ជាមួយនឹងលទ្ធភាព​អាចស្តុកទឹកបានប្រមាណ ១៦៣លានម៉ែត្រគូប បានផ្តល់នូវក្តី​សង្ឃឹមជាចម្បងដល់កសិករនៅស្រុកចំនួនបីនៃខេត្តចំនួន​ពីរ​ដែលនៅជាប់គ្នាគឺខេត្តបាត់ដំបង និងខេត្តពោធិ៍សាត់។

ឯកឧត្តម សុខ លូ អភិបាលខេត្តបាត់ដំបងបានឱ្យដឹងថា ទំនប់ដូនទ្រី គឺជាទំនប់ធំទីពីររបស់ខេត្តបាត់ដំបង ដែលអាច​ស្តុក​ទឹកបាន១៦៣លានម៉ែត្រគូប ហើយក៏ជាចំណងដៃមហា​សាល​របស់សម្តេចធិបតី ហ៊ុន ម៉ាណែត នាយករដ្ឋមន្រ្តីចំពោះខេត្ត​បាត់ដំបង។ទំនប់មានសក្តានុពលក្នុងការផ្គត់​ផ្គង់ទឹកស្រោចស្រព​លើផ្ទៃដី​ដាំដុះកសិកម្ម​នៅរដូវវស្សាប្រមាណ ៣៣ ០០០ហិកតានិង​រដូវប្រាំងប្រមាណ ៤ ៥០០ហិកតា ក្នុងឃុំចំនួន១៥ នៃស្រុកចំនួនបី គឺស្រុកមោងឬស្សី និងស្រុករុក្ខគិរី ខេត្តបាត់ដំបង និងស្រុកបាកាន ខេត្តពោធិ៍សាត់។

គម្រោងអភិវឌ្ឍន៍ទំនប់ដូនទ្រី ស្ថិតក្នុងស្រុករុក្ខគិរី ខេត្តបាត់ដំបង។គម្រោងនេះ​ទទួលហិរញ្ញប្បទានសម្បទាន​ពី​សាធារណរដ្ឋកូរ៉េ។គម្រោងអភិវឌ្ឍន៍ទំនប់ដូនទ្រីបានប្រើរយៈពេលសាងសង់៩០ខែ ដោយចាប់ផ្ដើមក្នុងខែមិថុនា ឆ្នាំ២០១៨ ។ ការងារសំខាន់ៗរបស់​គម្រោងរួមមាន៖សំណង់ទំនប់មេប្រវែង ៦៥៤ម៉ែត្រ ,សំណង់បង្ហៀរ​ប្រវែង ៤១៤ ម៉ែត្រ , រូងទូនេលពង្វាងទឹករាងជាក្រចកជើងសេះ​ប្រវែង៤៦២ ម៉ែត្រ ,សំណង់គ្រប់គ្រងទឹកជាប្រភេទសំណង់​ប៉ម​មានទ្វារទឹកច្រើនថ្នាក់ ដែលមានទ្វារទឹកចំនួន៥ និងស្ពានសម្រាប់​ឆ្លងទៅប៉មប្រវែង ៥៥ម៉ែត្រ ផ្លូវក្រាលថ្មភ្នំប្រវែង ១៧,៣គីឡូម៉ែត្រ និងសំណង់ដោះទឹកចំនួន ៨កន្លែង និងស្ពានបណ្តោះអាសន្នចំនួន ៣កន្លែង។

បើតាមឯកឧត្តមរដ្ឋមន្ត្រីក្រសួងធនធានទឹក គម្រោងអភិវឌ្ឍន៍ទំនប់​ដូនទ្រី​សាងសង់ឡើង​ប្រើប្រាស់វិធីសាស្រ្តថ្មី​ដូចជា ការជីករូងក្នុងភ្នំ ការជីកថ្ម និងវិធីសាស្រ្តពង្រឹងកែច្នៃបាតគ្រឹះទំនប់ជាដើម។ គម្រោងដែលអាចស្ដុកទឹកបានប្រមាណ ១៦៣លានម៉ែត្រគូប ដោយមានលទ្ធភាពផ្គត់ផ្គង់ទឹកស្រោចស្រពផ្ទៃដីកសិកម្មនៅរដូវវស្សា និងរដូវប្រាំង ប្រមាណ​៣៧.៥០០ហិកតា ក៏នឹង​រួមចំណែកក្នុងការ​ផ្គត់ផ្គង់ទឹកស្អាត និងកាត់បន្ថយទឹកជំនន់តាមតំបន់មួយចំនួននៅ​ផ្នែកខាងក្រោម។

ឯកឧត្តមរដ្ឋមន្ត្រីបានកោតសរសើរចំពោះវឌ្ឍនភាពគម្រោងដែលសម្រេចបាន ជាពិសេសកិច្ចខិតខំប្រឹងប្រែង​របស់​ក្រុមការងារអនុវត្ត​គម្រោង ,មន្ទីរធនធានទឹក និងឧតុនិយមខេត្តបាត់ដំបង ព្រមទាំង​អាជ្ញាធរមូលដ្ឋានពាក់ព័ន្ធដែល​បានរួមសហការគ្នាយ៉ាងជិតស្និទ្ធធ្វើ​ឱ្យការដ្ឋានដ៏ធំនេះសម្រេចបានតាមផែនការគ្រោងទុក៕

អត្ថបទ-រូបភាព៖ អ៊ុក សំអាន