ពលរដ្ឋតាមស្រុកជនបទ ដាំដំណាំដើរលក់តាមពិធីបុណ្យទាន រកប្រាក់ចំណូល ក្រៅពីធ្វើស្រែចំការ
(កំពង់ស្ពឺ)៖រៀងរាល់រដូវវស្សា ឬសូម្បីតែរដូវប្រាំងក្តី អ្នកស្រុកដែលរស់នៅតាមទីជនបទស្រុកស្រែចំការ ក្នុងនេះដូចជា ខេត្តកំពង់ស្ពឺ ខេត្តតាកែវ ឬ សូម្បីតែ ខេត្តដទៃក្តី តែងមិននៅស្ងៀមឡើយ ដោយធ្វើការដាំដំណាំមួយចំនួនដូចជា សណ្តែកដី សាគូ ដំឡូង ពោត ជាដើម ទុកសម្រាប់ដើរលក់ក្នុងពិធីបុណ្យផ្សេងៗដើម្បីរកប្រាក់ចំណូលគ្រួសារបន្ថែម។
សណ្តែកដីស្ងោរ សណ្តែកដីលីង សាគូ ពោតស្ងោរ ដំឡូងឈ្វា ដំឡូងដៃខ្លា និងចំណីចំណុកផ្សេងៗទៀតដែលជារបស់ធម្មជាតិគេតែងឃើញបងប្អូនប្រជាពលរដ្ឋ ដាក់ថាស ដាក់កញ្ជើ កញ្ចែ្រង លក់តាមពិធីបុណ្យទាននានា មិនថាជាបុណ្យ កឋិន បុណ្យចូលឆ្នាំ បុណ្យភ្ជុំបិណ្ឌឡើយ ពួកគាត់ដាក់លក់យ៉ាងត្រៀបត្រា ដែលបានទាក់ទាញមនុស្សក្មេងចាស់ ប្រុសស្រី ចូលទិញ បរិភោគនៅនឹងកន្លែង ឬ ខ្លះទៀតយកជារបស់បញ្ញើដល់អ្នកផ្ទះទៀតផង។
តាមរយៈការលក់ដូរចំណីចំណុកតាមនេះដែរកសិករភាគច្រើនសុទ្ធតែបានប្រាប់ថា គាត់បានដាំដោយខ្លួនឯង កម្រមានណាស់ អ្នកដែលបានទិញពីផ្សារមកលក់។
កំពុងឈរលក់សណ្តែកដីលីង ដាក់ថាសលើម៉ូតូ លោក មួង គីម រស់នៅស្រុកបសេដ្ឋ ខេត្តកំពង់ស្ពឺ បានប្រាប់ថា សណ្តែកដីដែលលោកលីងយកមកលក់នេះគឺដាំនៅផ្ទះខ្លួនឯង។ ក្រុមគ្រួសារលោក តែងស្រុះស្រួលគ្នាដាំសណ្តែកដី ដំឡូងមី ដំឡូងឈ្វា សម្រាប់ទុកលក់នៅពេលដល់រដូវបុណ្យទាន មិនសូវដែលខកខានទេដើម្បីឆ្លៀតរកចំណូលដល់ក្រុមគ្រួសារ។
បុរសវ័យ ៦០បា្លយ ដែលកំពុងលក់សណ្តែកដីលីង នៅវត្តមង្គលថ្មី ស្រុកបរសេដ្ឋ ខេត្តកំពង់ស្ពឺ រូបនេះបានបា្រប់ដែរថា”ខ្ញុំដាំសណ្តែកដី ហើយលក់មួយរដូវអាចបានប្រាក់ចំណូលប្រមាណ៥ ទៅ ៧លានរៀល គ្រាន់សម្រាប់ចាយវាយ និងធ្វើបុណ្យទាន។ គ្រួសារខ្ញុំដាំទាំងសណ្តែកដី និង ដំឡូងនេះ តាំងតែពីឪពុកម្តាយមក។កាលនោះឪពុកម្តាយខ្ញុំដាំទុកហូបខ្លះ និងទុកលក់ខ្លះ គឺដូចខ្ញុំសព្វថ្ងៃនេះដែរ”។
អ្នកស្រី សាម យួន ដែលរស់នៅស្រុកបសេដ្ឋ ខេត្ត កំពង់ស្ពឺនេះដែរ បានប្រាប់ឱ្យដឹងថា អ្នកស្រី លក់ សណ្តែកដី និងដំឡូងដៃខ្លានេះជារបស់ដាំខ្លួនឯងទាំងអស់ទេ។ ក្នុងមួយរដូវៗបុណ្យចូលឆ្នាំ បុណ្យភ្ជុំបិណ្ឌ ឬ បុណ្យកឋិន អ្នកស្រីតែងជិះម៉ូតូដើរលក់ម្នាក់ឯង ហើយអាចរកចំណូលសម្រាប់ចិញ្ចឹមខ្លួនឯង មិនបាច់ពឹងពាក់កូនចៅនាំលំបាកនោះទេ។
មិនខុសគ្នានេះ អ្នកស្រី ឡុង បូ រស់នៅ ឃុំព្រៃរំដួល ស្រុក បរសេដ្ឋ ខេត្តកំពង់ស្ពឹ បានប្រាប់ដែរថា សណ្តែកដែលគាត់ដាំនៅផ្ទះ ក្នុងមួយរយៈបុណ្យទានអាចរកចំណូលបានចាប់ពី៤០ ទៅ១លានរៀល។
ស្រ្តីដែលលក់សណ្តែកដីលីងប្រភេទមើមតូចៗសាច់ណែន មានរសជាតិយ៉ាងឈ្ងុយឆ្ងាញ់ពិសាររូបនេះ បានប្រាប់ដែរថា”អ្នកស្រុកខ្ញុំគេម្នាក់ៗសុទ្ធតែដាំសណ្តែកដី ពោត ដំឡូង និងប្រភេទផ្លែឈើ ហើយសល់ពីហូបនាំគ្នាលក់គ្រាន់បានចាយដែរ”។
ដោយឡែក អ្នកស្រី វ៉ាន់ថា មកពីខេត្តតាកែវ ដែលកំពុងលក់សាគូ និងដំឡូងដៃខ្លានៅវត្តមង្គលថ្មី ស្រុកបរសេដ្ឋ ខេត្តកំពង់ស្ពឺ បានប្រាប់ថារបស់ទាំងអស់នេះគឺអ្នកស្រីបានដាំខ្លួនឯងទុកសម្រាប់លក់។សម្រាប់សាគូ និងដំឡូងដៃខ្លា គាត់លក់មួយគីឡូក្រាម៥ពាន់រៀល ។សម្រាប់សាគូ និងដំឡូងដៃខ្លានេះគាត់ដាំរយៈពេល៦ខែ ហុចផលហើយ។ជាមួយគ្នានេះមុខរបរនេះអ្នកស្រីបានប្រកបវាជាប្រចាំអស់រយៈពេលជិត៣០ឆ្នាំ មកហើយ ។
គួរបញ្ជាក់ថា មុខរបរលក់ដូរតាមស្រុកស្រែចំការដ្បិតមិនធំដុំ និងមិនមែនជារបស់ហូបចុកដូចសម័យទំនើបបច្ចុប្បន្នក្តី ប៉ុន្តែអាហារបុរាណខ្មែរទាំងនេះបានសាងអនុស្សាវរីយ៍មនុស្សក្មេង ចាស់ ឱ្យជាប់ចិត្តមិនតិចសោះឡើយ ដែលធ្លាប់បានទិញបរិភោគ ហើយតែងមិនខកខានសម្រាប់ការទិញដោយក្តីរីករាយ នៅពេលជួបវាម្តងៗពិសេសតាមបុណ្យទាន តាមស្រុកភូមិរបស់ពួកគេតែម្តង ៕
ដោយ ៖ ម៉ាដេប៉ូ
