ឯកឧត្តម ហង់ ជួនណារ៉ុន ៖ បើកម្ពុជាធ្វើពហិការមិនចូលរួមស៊ីហ្គេមនៅថៃនឹងធ្វើឱ្យប៉ះពាល់កិត្តិយសអាស៊ានទាំងមូល
(ភ្នំពេញ)៖ ឯកឧត្តម ហង់ ជួន ណារ៉ុន ឧបនាយករដ្ឋ មន្រ្តី រដ្ឋមន្រ្តីក្រសួងអប់រំយុវជននិងកីឡា បានថ្លែង គូសបញ្ជាក់ថា ប្រសិនបើប្រទេសកម្ពុជាធ្វើពហិការមិនចូលរួមក្នុងព្រឹត្តិការណ៍កីឡាស៊ីហ្គេម លើកទី៣៣ ដែលប្រទេសថៃទទួលធ្វើជាម្ចាស់ផ្ទះ នាអំឡុងខែ ធ្នូ ឆ្នាំ២០២៥ខាងមុខនេះ កម្ពុជានឹងបាក់មុខ ពិសេស ធ្វើឱ្យប៉ះពាល់ដល់កិត្តិយសក្នុងនាមជាប្រទេសសមាជិកអាស៊ាន ។
ការថ្លែងរបស់ឯកឧត្តម ហង់ ជួន ណារ៉ុន ក្នុងកម្មវិធីជួបសំណេះសំណាលជាមួយប្រតិភូអត្តពលិកកីឡាទាំង២១ប្រភេទត្រៀមចាញទៅស៊ីហ្គេម លើកទី៣៣នៅថៃ នារសៀលថ្ងៃទី២៤ ខែ វិច្ឆិកា ឆ្នាំ២០២៥ នៅនាសាលប្រជុំវិមានសន្តិភាព។
ឯកឧត្តម ឧបនាយករដ្ឋមន្រ្តី បញ្ជាក់ថា កម្ពុជាគិតគូរពិចារណាទាំងលំបាក ថ្លឹងថ្លែងច្បាស់លាស់ក្នុងស្ថានភាពដ៏តានតឹង ដែលកម្ពុជាបានជួបប្រទះជាមួយថៃ មុនពេលសម្រេចចិត្តបញ្ជូនប្រតិភូគ្រូបង្វឹក និងអត្តពលិក ចំនួន៣៣២នាក់ ទៅប្រកួតនៅប្រទេសថៃ។
ការចូលរួមរបស់កម្ពុជាក្នុងព្រឹត្តិការណ៍ស៊ីហ្គេមលើកទី៣៣នៅថៃនេះ គឺជាការបង្ហាញការគាំទ្រចំពោះការរៀបចំរបស់អាស៊ាន មានន័យថា ព្រឹត្តិការណ៍ស៊ីហ្គេមនៅថៃនេះ មិនមែនរៀបចំដោយប្រទេសថៃនោះទេ ពោលថៃគ្រាន់តែជាម្ចាស់ផ្ទះទទួលព្រឹត្តិការណ៍ប៉ុណ្ណោះ ។ ព្រោះព្រឹត្តិការណ៍បង្កើតឡើងពីរឆ្នាំម្តងនេះ ការរៀបចំដោយគណៈកម្មការកីឡាអាស៊ីអាគ្នេយ៍ដែលមានសមាជិកទាំង១១ប្រទេស។
យ៉ាងណាមិញ ចំពោះការចូលរួមរបស់អត្តពលិកកីឡាកម្ពុជា ឯកឧត្តម ហង់ ជួន ណារ៉ុន ក៏បានដាស់តឿន អត្តពលិក ឱ្យគោរពវិន័យ ក្រមសីលធម៌ ច្បាប់ការប្រកួតកីឡាស៊ីហ្គេមឱ្យបានខ្ជាប់ខ្ជួន ជៀសវាងការបង្កបញ្ហាផ្សេងៗ នាំឱ្យប៉ះពាល់មុខមាត់ជាតិ លើឆាកអន្តរជាតិ។
ឯកឧត្តម ក៏អំពាវនាវឱ្យប្រតិភូ អត្តពលិក និងមន្រ្តីពាក់ព័ន្ធ ឱ្យប្រុងប្រយ័ត្នខ្ពស់ទៅលើកត្តាសុវត្ថិភាព ការធ្វើដំណើរផ្សេងអំឡុងពេលប្រកួត និងត្រូវមានការត្រួតពិនិត្យការចេញចូលកន្លែងស្នាក់នៅរបស់អត្តពលិកជាប្រចាំផងដែរ។ ហើយការប្រជែងដណ្តើមបានមេដាយជូនជាតិ ក្នុងព្រឹត្តិការណ៍នេះ អាចនិងធ្វើឱ្យអត្តពលិកយើងកម្ពុជាយើងកាន់តែល្បីខ្លាំងៗជាងការដណ្តើមបានមុនៗ។
សូមរំលឹកថា ព្រឹត្តិការណ៍កីឡាស៊ីហ្គេម លើកទី៣៣ ដែលប្រទេសថៃទទួលធ្វើជាម្ចាស់ផ្ទះនេះ កម្ពុជាបានសម្រេចបញ្ជូនប្រភេទកីឡាចំនួន ២១ មានអត្តពលកម្ម ហែលទឹក ជិះសេះ គុនដាវ កាយសម្ព័ន្ធ យូដូ តេក្វាន់ដូ WT ទ្រីយ៉ាត្លុង បាល់ទះ បាល់ទាត់ ចំបាប់ បញ្ចស៊ីឡាត់ ឃីកបុកស៊ីង ប៉េតង់ សីដក់ ម៉ូតូទឹក ការ៉ាតេ ជឺជីតស៊ូ វូស៊ូ បាល់ទាត់លើតុ និងកីឡាអេឡិចត្រូនិក៕
រូបភាព ៖ ជីម ភារ៉ា
អត្ថបទ៖ ជាវ ចន្ធូ
