មន្ទីរពេទ្យកុមារអង្គរ រកឃើញថា កុមារមានជម្ងឺផ្លូវដង្ហើមច្រើនត្រូវពិនិត្យ និងព្យាបាល
(ភ្នំពេញ)៖ លោកស្រី ស៊ិនកេត អរុណ បានឱ្យដឹងថា នៅមន្ទីរពេទ្យកុមារអង្គរ ១ថ្ងៃទទួលបានការពិនិត្យព្យាបាលជំងឺ មានចំនួន ចន្លោះពី៤០០ ទៅ៤៥០ នាក់ ដែលភាគច្រើជាជំងឺផ្លូវដង្ហើម និងមួយចំនួនជំងឺរាករុស កង្វះអារហាររូបត្ថម្ភជាដើម ។ ហើយ ក្រៅពីជំងឺទូទៅមន្ទីរពេទ្យមួយនេះក៏ទទួលការពិន្យព្យាបាលជំងឺឯកទេសផងដែរ ដូចជា ជំងឺមហារីក ប៉ះទង្គិច និងជំងឺជាច្រើនទៀតដែលមន្ទីរពេត្យកុមារអង្គរធ្វើការព្យាបាល។
លោកស្រី ស៊ិនកេត អរុណ ប្រធានការិយាល័យរៃអង្គាសមូលនិធិក្នុងប្រទេសកម្ពុជា នៃមន្ទីរពេទ្យកុមារអង្គរ បានបញ្ជាក់បែបនេះប្រាប់ទូរទស្សន៍អប្សរា នៅព្រឹកថ្ងៃទី២៥ ខែវិច្ឆិកា ឆ្នាំ២០២៥ នៅក្នុងសន្និសីទសារព័ត៌មានស្តីពី “ការដើរឡើងភ្នំបូកគោ ដើម្បីសុខភាពកុមារកម្ពុជា ឆ្នាំ២០២៥” នៅរាជធានីភ្នំពេញ។
លោកស្រីបន្ថែមថា នៅក្នុងមួយឆ្នាំៗ មន្ទីរពេទ្យកុមារអង្គរត្រូវការថវិកាប្រមាណ ៦លានដុល្លារសហរដ្ឋអាមេរិក សំរាប់ពិនិត្យនិងព្យាបាលដល់កុមារ និងដំណើរទៅលើកម្មវិធី មួយចំនួនទៀត ដែលទាក់ទងទៅដល់ការបណ្តុះបណ្តាលផ្នែកវិជ្ជសាស្រ្តទៅដល់ គ្រូពេទ្យជំនាញ និងកម្មវិធីអប់រំសុខភាពនៅតាមសហគមន៍ ដើម្បីពង្រឹង សមត្ថភាពមណ្ឌលសុខភាព ក៏ដូចជាវិស័យសុខុមាលភាពសារធារណៈ ឱ្យរឹងមាំល្អជាងមុន ។ បច្ចុប្បន្នេះមន្ទីរពេទ្យកុមារអង្គរ បាននិងកំពុងស្វែងរកថវិកា ទាំងក្នុងនិងក្រៅប្រទេស ដើម្បីទ្រទ្រង់ការចំណាយទូទៅ ខណៈនៅចុងឆ្នាំ២០២៥នេះ មន្ទីរពេទ្យត្រូវការថវិកាទ្រទ្រង់ប្រមាណ ១២ម៉ឺនដុល្លារ អាមេរិក ដើម្បីបំពេញបង្រ្គប់នូវការចំណាយ។
លោកស្រី ស៊ិនកេត អរុណ បន្ថែមថា សម្រាប់ផែនការចំណាយនៅក្នុងឆ្នាំ២០២៦ មន្ទីរពេទ្យកុមារអង្គរនៅតែត្រូវការថវិកាចាំចាច់ ប្រមាណ ៦ម៉ឺនដុល្លារសហរដ្ឋអាមេរិកដដែល ។ លោកស្រីគូសបញ្ជាក់បន្ថែមថា លោកស្រីចង់ឱ្យកម្មវិធី ការដើរឡើងភ្នំបូកគោ ដើម្បីសុខភាពកុមារកម្ពុជា ជាព្រឹត្តិការណ៍ប្រចាំឆ្នាំដើម្បីរៃអង្គាសថវិកាជួយទ្រទ្រង់ដល់កុមារកម្ពុជា ក៏ដូចជាមន្ទីរពេទ្យកុមារអង្គរផងដែរ។
គួរបញ្ជាក់ថា មន្ទីរពេទ្យកុមារអង្គរ គឺ មានទីតាំងស្ថិតនៅខេត្តសសៀមរាប ត្រូវបានបើកដំណើរការនៅឆ្នាំ ១៩៩៩ ក្នុងគោលបំណងផ្តល់ការពិនិត្យព្យាបាល និងថែទាំសុខភាពដល់កុមារកម្ពុជាប្រកបដោយគុណភាពខ្ពស់ និងឥតគិតថ្លៃ។ មន្ទីរពេទ្យនេះ បានចូលរួមពង្រឹងប្រព័ន្ធសុខាភិបាលតាមរយៈការបណ្ដុះបណ្តាលវេជ្ជបណ្ឌិត គិលានុបដ្ឋាក និងបុគ្គលិកសុខាភិបាល ព្រមទាំងផ្តល់ការអប់រំសុខភាពផ្សេងៗដល់ពលរដ្ឋខេត្តសៀមរាបផងដែរ៕
ដោយ ៖ ង៉ាន់ ទិត្យ
