កម្ពុជា ប្តេជ្ញាចិត្តលើកកម្ពស់កិច្ចសហប្រតិបត្តិការជាមួយ ឡាវ
(វៀងចន្ទន៍)៖ កម្ពុជា បានបញ្ជាក់សារជាថ្មីនូវការប្តេជ្ញាចិត្ត ធ្វើការរួមគ្នាជាមួយឡាវ ដើម្បីលើកកម្ពស់កិច្ចសហប្រតិបត្តិការនយោបាយ សេដ្ឋកិច្ច សង្គម-វប្បធម៌ និងការផ្លាស់ប្តូរប្រជាជន ។
នេះជាការគូសបញ្ជាក់របស់ ឯកឧត្តម ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ ខណៈអញ្ជើញចូលជួបសម្តែងការគួរសមជាមួយ ឯកឧត្តមបណ្ឌិត ថងលុន ស៊ីសុលីត (Thongloun Sisoulith) ប្រធានរដ្ឋ នៃសាធារណរដ្ឋប្រជាធិបតេយ្យប្រជាមានិតឡាវ និងជាអគ្គលេខាធិការបក្សប្រជាជនបដិវត្តន៍ឡាវ នៅទីក្រុងវៀងចន្ទន៍ នារសៀលថ្ងៃទី២៧ ខែវិច្ឆិកា ឆ្នាំ២០២៥ ។
ក្នុងឱកាសនៃជំនួប ឯកឧត្តមឧបនាយករដ្ឋមន្ត្រីបានជូនពរឲ្យការរៀបចំ មហាសន្និបាតបក្សប្រជាជនបដិវត្តន៍ឡាវ លើកទី១២ ដែលគ្រោងនឹងធ្វើឡើង នៅដើមឆ្នាំ២០២៦ ទទួលបានជោគជ័យ ។
ឯកឧត្តមឧបនាយករដ្ឋមន្ត្រី ក៏បានផ្តាំផ្ញើនូវការសាកសួរសុខទុក្ខយ៉ាងកក់ក្តៅបំផុត និង ការអបអរសាទរដោយស្មោះពី សម្តេចតេជោ ហ៊ុន សែន ប្រធានព្រឹទ្ធសភា និង សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នាឱកាស នៃខួបអនុស្សាវរីយ៍ លើកទី៥០ នៃបុណ្យជាតិរបស់សាធារណរដ្ឋប្រជាធិបតេយ្យប្រជាមានិតឡាវ នាខែធ្នូ ខាងមុខ និងទន្ទឹងរង់ចាំការប្រារព្ធខួបអនុស្សាវរីយ៍ លើកទី៧០ នៃការបង្កើតទំនាក់ទំនងការទូតកម្ពុជា-ឡាវ ក្នុងឆ្នាំ២០២៦ ផងដែរ ៕
ដោយ ៖ សួង ពិសិដ្ឋ
រូបថត ៖ ក្រសួងការបរទេស
