ឯកឧត្តម សុខ ពុទ្ធិវុធ ប្រគល់សញ្ញាបត្រ ដល់និស្សិតសាកលវិទ្យាល័យពុទ្ធិសាស្ត្រ ចំនួន ៣១៩នាក់
(ភ្នំពេញ)៖ សាកលវិទ្យាល័យ ពុទ្ធិសាស្ត្រ បានរៀបចំកម្មវិធីប្រគល់សញ្ញាបត្រជូននិស្សិតសរុប ៣១៩នាក់ ដែលបានបញ្ចប់ការសិក្សា ដែលប្រព្រឹត្តទៅនៅ រាជបណ្ឌិតសភាកម្ពុជា អគារខេមរវិទូ រាជធានីភ្នំពេញ នាព្រឹកថ្ងៃទី២៨ ខែវិច្ឆិកា ឆ្នាំ២០២៥ ក្រោមអធិបតីភាព ឯកឧត្តម សុខ ពុទ្ធិវុធ ប្រធានក្រុមប្រឹក្សាភិបាល នៃសាកលវិទ្យាល័យ ពុទ្ធិសាស្ត្រ។
ថ្លែងក្នុងពិធីនេះ ឯកឧត្តម សុខ ពុទ្ធិវុធ បានមានប្រសាសន៍ថា ៖“និស្សិតជ័យលាភីថ្ងៃនេះ គឺជាមូលធនមនុស្សដ៏សំខាន់ ដែលរាជរដ្ឋាភិបាលក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បាននិងកំពុងត្រូវការជាចាំបាច់ ដូចដែលមានចែងនៅក្នុងយុទ្ធសាស្ត្របញ្ចកោណ ដំណាក់កាលទី១ ដើម្បីកំណើន ការងារ សមធម៌ ប្រសិទ្ធភាព និងចីរភាព កសាងមូលដ្ឋានគ្រឹះឆ្ពោះទៅ សម្រេចចក្ខុវិស័យកម្ពុជាឆ្នាំ ២០៥០។ ការខិតខំប្រឹងប្រែងសិក្សាបូករួមទាំងការតាំងចិត្តដ៏មោះមុតដែលនិស្សិតរបស់យើងបានចំណាយទាំងពេលវេលា និងកម្លាំងកាយចិត្ត ដើម្បីសម្រេចក្តីស្រមៃរបស់ពួកគេ គឺសុទ្ធតែជាសមិទ្ធផលដែលគួរឲ្យកោតសរសើរសម្រាប់ពួកគេក្នុងនាមជានិស្សិតជ័យ លាភី។ លើសពីនេះទៀត ការបង្កើតកម្មវិធីនេះឡើង គឺជាការបោះជំហានទៅមុខមួយ ជំហានទៀត ឆ្ពោះទៅកាន់ការចាប់ផ្តើមនៅក្នុងអាជីពការងារដែលសង្គម កំពុងត្រូវការនូវធនធានមនុស្ស ដើម្បីការអភិវឌ្ឍន៍នៅក្នុងប្រទេសរបស់យើង”។
ឯកឧត្តម សុខ ពុទ្ធិវុធ បានថ្លែងដោយបញ្ជាក់ដែរថា និស្សិតដែលបានបញ្ចប់ការសិក្សា និងមានវត្តមានក្នុងពីធីប្រគល់សញ្ញាបត្រនេះ គឺជាសរសៃឈាមដ៏រឹងមាំក្នុងការពង្រឹងគុណភាព ទាំងផ្នែកវិទ្យាសាស្ត្រសុខាភិបាល និងផ្នែកវិទ្យាសាស្ត្រ បច្ចេកវិទ្យា ជូនដល់ប្រជាជនកម្ពុជា ទាំងមូល និងអាចនាំយក សមិទ្ធិផលជោគជ័យនៅពេលនេះជាប្រយោជន៍សម្រាប់ការអភិវឌ្ឍន៍ប្រទេសជាតិទៅ ថ្ងៃមុខ។
ជាមួយគ្នានេះ ឯកឧត្តមបានមានប្រសាសន៍ដោយបញ្ជាក់ថា៖”និស្សិតដែលបញ្ចប់ការសិក្សានេះទៅត្រូវប្រើប្រាស់ចំណេះដឹង និងជំនាញ ជាពិសេសអភិក្រម គោរពខ្លួនឯង ,គោរពអ្នកដទៃ និង អភិវឌ្ឍសង្គម ដែល ទទួលបានពីសាកលវិទ្យាល័យ ពុទ្ធិសាស្ត្រ ដើម្បីចូលរួមក្នុងកិច្ចការអភិវឌ្ឍប្រទេស ជាតិឱ្យកាន់តែរីកចម្រើន ហើយចាប់ពីពេលនេះតទៅ ក្មួយៗនឹងក្លាយជាអ្នកជំនាញ ដែលនឹងត្រូវចូលរួមបំពេញការងារជាក់ស្តែងនៅក្នុងសង្គមតាមគ្រប់រូបភាព”។
ឯកឧត្តមសុខ ពុទ្ធិវុធ បានមានប្រសាសន៍ ដោយថ្លែងការកោតសរសើរដល់ថ្នាក់ដឹកនាំ គ្រប់រូប សាស្ត្រាចារ្យ និងបុគ្គលិកទាំងអស់ នៃសាកលវិទ្យាល័យពុទ្ធិសាស្ត្រដែលបាន ប្រឹងប្រែងបណ្តុះបណ្តាលប្រកបដោយគុណភាព និងចីរភាព ដល់សិស្សនិស្សិត គ្រប់ៗរូបក្លាយជាធនធានដ៏មានសក្តានុពលក្នុង ការអភិវឌ្ឍប្រទេសជាតិ ស្របតាមគុណតម្លៃសាកលវិទ្យាល័យ ពុទ្ធិសាស្ត្រ គោរពខ្លួនឯង គោរពអ្នកដទៃ អភិវឌ្ឍសង្គម៕
ដោយ ៖ ម៉ាដេប៉ូ
រូបភាព ៖ ហេង សម្បត្តិ
