លោកជំទាវបណ្ឌិត ពេជ ចន្ទមុន្នី ដាក់ចេញអនុសាសន៍ ៨ចំណុច តម្រង់ទិសយុទ្ធសាស្ត្រកាកបាទក្រហមកម្ពុជា ឆ្នាំ២០២៦-២០៣០
(ភ្នំពេញ)៖ លោកជំទាវបណ្ឌិត ពេជ ចន្ទមុន្នី ហ៊ុនម៉ា ណែត អនុប្រធានអចិន្ត្រៃយ៍កាកបាទក្រហមកម្ពុជា បាន ផ្តល់អនុសាសន៍សំខាន់ៗចំនួន ៨ចំណុច ដើម្បីពង្រឹងប្រសិទ្ធភាពការងារមនុស្សធម៌ និងតម្រង់ទិសសម្រាប់ផែនការយុទ្ធសាស្ត្រឆ្នាំ២០២៦-២០៣០។ ការថ្លែងនេះបានធ្វើឡើងក្នុងពិធីបិទកិច្ចប្រជុំបូកសរុបសមិទ្ធផលការងារឆ្នាំ២០២៥ និងទិសដៅការងារអាទិភាពឆ្នាំ២០២៦ នៅទីស្នាក់ការកណ្តាលកាកបាទក្រហមកម្ពុជា នារសៀលថ្ងៃទី២៨ ខែវិច្ឆិកា ឆ្នាំ២០២៥។
ក្នុងនាមតំណាងរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន លោកជំទាវបណ្ឌិត ពេជ ចន្ទមុន្នី បានកោតសរសើរចំពោះថ្នាក់ដឹកនាំ និងសមាជិក សមាជិកា ទាំងថ្នាក់កណ្តាល និងសាខាទាំង ២៥រាជធានី-ខេត្ត សរុបជាង ១៥០នាក់ ដែលបានចូលរួមយ៉ាងសកម្មក្នុងការពិភាក្សា និងរកឃើញបញ្ហាប្រឈមនានាតាមរយៈប្រព័ន្ធឌីជីថល (Google Form) ដើម្បីដាក់ចេញជាដំណោះស្រាយសម្រាប់ឆ្នាំបន្ទាប់។
លោកជំទាវបណ្ឌិត បានពាំនាំនូវព្រះរាជសវនីយ៍សាកសួរសុខទុក្ខពី សម្តេចព្រះមហាក្សត្រី ព្រះវររាជមាតាជាតិខ្មែរ និងប្រសាសន៍របស់ សម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា ដោយបានគូសបញ្ជាក់ពីស្មារតីទទួលខុសត្រូវខ្ពស់ក្រោមទិសស្លោក «កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល»។
ដើម្បីធានាបាននូវនិរន្តរភាព និងទំនុកចិត្តពីសាធារណជន លោកជំទាវបណ្ឌិតអនុប្រធានអចិន្ត្រៃយ៍ បានដាក់ចេញនូវ អនុសាសន៍ទាំង ៨ចំណុច រួមមាន៖ ១. ការបញ្ចប់ការវិភាគយុទ្ធសាស្ត្រ៖ ត្រូវបន្តដំណើរការពិនិត្យពាក់កណ្តាលអាណត្តិ ដើម្បីចងក្រងជាមូលដ្ឋានគ្រឹះសម្រាប់កសាងផែនការអភិវឌ្ឍឆ្នាំ២០២៦-២០៣០។ ២. ការពង្រឹងផែនការអភិវឌ្ឍ៖ ត្រូវបន្ស៊ីផែនការថ្មីទៅនឹងវិស័យអាទិភាពទាំង ៤ នៃយុទ្ធសាស្ត្រ ២០២១-២០៣០ ដោយផ្តោតលើនិរន្តរភាព និងមានប្រព័ន្ធតាមដានវាយតម្លៃ (PMER) ច្បាស់លាស់។ ៣. ការកសាងភាពធន់សហគមន៍៖ សាខាត្រូវអនុវត្តសកម្មភាពដែលស្របនឹងយុទ្ធសាស្ត្របញ្ចកោណរបស់រាជរដ្ឋាភិបាល ដោយផ្តោតលើការសង្គ្រោះបឋម, ការត្រៀមបង្ការគ្រោះមហន្តរាយ, ការអប់រំសុខភាព, បរិស្ថាន និងការទប់ស្កាត់គ្រឿងញៀន ព្រមទាំងពង្រឹងសមត្ថភាពយុវជន។ ៤. ស្តង់ដារផែនការ៖ សាខាទាំងអស់ត្រូវកសាងផែនការអប្បបរមាតាមគំរូស្តង់ដាររបស់ថ្នាក់កណ្តាល ដើម្បីឱ្យការអនុវត្តមានភាព ព្រមៗគ្នា។ ៥. បរិវត្តកម្មឌីជីថល៖ ត្រូវដាក់បញ្ចូលបច្ចេកវិទ្យាឌីជីថលទៅក្នុងផែនការអភិវឌ្ឍ ២០២៦-២០៣០ ដើម្បីបង្កើនប្រសិទ្ធភាពការងារ ភាពរហ័ស និងតម្លាភាព ដែលជាកត្តាជំរុញទំនុកចិត្តពីមជ្ឈដ្ឋានខាងក្រៅ។ ៦. វប្បធម៌នៃការរៀនសូត្រ៖ ជំរុញការផ្លាស់ប្តូរបទពិសោធន៍រវាងសាខានិងសាខា និងពង្រឹងការអនុវត្តគម្រោងជាក់លាក់។ ៧. អភិបាលកិច្ចល្អ៖ ពង្រឹងការគ្រប់គ្រងហិរញ្ញវត្ថុ ការធ្វើសវនកម្ម ការចុះបញ្ជីសារពើភ័ណ្ឌ និងការបណ្តុះបណ្តាលមន្ត្រីថ្មីៗ។ ៨. កិច្ចសហប្រតិបត្តិការ៖ រក្សាទំនាក់ទំនងល្អជាមួយអាជ្ញាធរ សប្បុរសជន និងផ្តល់អាទិភាពដល់ជនងាយរងគ្រោះបំផុត។
លោកជំទាវបណ្ឌិត ពេជ ចន្ទមុន្នី បានសង្កត់ធ្ងន់ថា ភាពជោគជ័យរបស់កាកបាទក្រហមកម្ពុជា អាស្រ័យលើកត្តាធំៗពីរ គឺការគាំទ្រពីសប្បុរសជន និងឆន្ទៈដ៏មោះមុតរបស់អ្នកប្រតិបត្តិករជួរមុខ។ លោកជំទាវមានជំនឿថា តាមរយៈការអនុវត្តតាមអនុសាសន៍ទាំងនេះ ការងារមនុស្សធម៌របស់កាកបាទក្រហមកម្ពុជានឹងកាន់តែមានប្រសិទ្ធភាព និងល្អប្រសើរឡើងជាលំដាប់ ៕
អត្ថបទ ៖ វណ្ណលុក
រូបភាព ៖ គ្រី សម្បត្តិ
