ឧបនាយករដ្ឋមន្រ្តី ហ៊ុន ម៉ានី៖រណសិរ្សសាមគ្គីសង្រ្គោះជាតិកម្ពុជាផ្តល់ ជាមូលដ្ឋានដ៏រឹងមាំសម្រាប់ការកសាងសង្គមកម្ពុជា
ភ្នំពេញ៖ក្នុងមិទ្ទីងអបអរសាទរខួបអនុស្សាវរីយ៍លើកទី៤៧ ទិវាកំណើតរណសិរ្សសាមគ្គី អភិវឌ្ឍន៍មាតុភូមិកម្ពុជាកាលពីព្រឹកថ្ងៃទី២ ខែធ្នូ ឆ្នាំ២០២៥ នៅសាលសន្និសីទចតុមុខ រាជធានីភ្នំពេញ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈនិងជាអនុប្រធានក្រុមប្រឹក្សាជាតិរណសិរ្សសាមគ្គី អភិវឌ្ឍន៍មាតុភូមិកម្ពុជា បានមានប្រសាសន៍ថា ការចាប់បដិសន្ធិឡើងនូវអង្គការចាត់តាំង រួមជាមួយនិងកម្មវិធីនយោយរបស់រណសិរ្យនៅពេលនោះ គឺជារបត់ប្រវត្តិសាស្រ្តមួយយ៉ាងធំធេងសម្រាប់ប្រជាជាតិកម្ពុជា ។
ឯកឧត្តម ហ៊ុន ម៉ានី បានគូសរំលេចបន្តថា រណសិរ្សសាមគ្គីសង្រ្គោះជាតិកម្ពុជាមិនត្រឹមតែមានសារៈសំខាន់សម្រាប់ការតស៊ូរំដោះជាតិ និងសង្រ្គោះយើងទាំងអស់គ្នាឱ្យចាក់ផុតពីគ្រោះមហន្តរាយប៉ុណ្ណោះទេ តែក៏បានផ្តល់ជាមូលដ្ឋានដ៏រឹងមាំ សម្រាប់ការកសាងសង្គមជាតិកម្ពុជា ក៏ដូចជាការកសាងនយោបាយដឹកនាំមួយ មានមាគ៌ាយុទ្ធសាស្រ្ត យុទ្ធវិធីសាស្រ្តច្បាស់លាស់នៅក្នុងការដឹកនាំ កសាងប្រទេសឡើងវិញបន្ទាប់ពីឆ្លងកាត់សង្រ្គាមរ៉ាំរៃ អស់ជាច្រើនឆ្នាំកន្លងមក។
ឯកឧត្តមបន្តថា ឈរលើមូដ្ឋាននៃកំលាំងសាមគ្គីជាតិ យើងបានការពារដោយជោគជ័យ ការរស់ឡើងវិញរបស់ប្រជាជាតិ និងធ្វើឱ្យសង្គមជាតិបានរួចផុតពីដំណាក់កាលដ៏លំបាកលំបិន មកកាន់ដំណាក់កាលរីកចំរើនជាជំហានៗរហូតមកដល់បច្ចុប្បន្ន។
គួរបញ្ជាក់ថា រណសិរ្សសាមគ្គីសង្រ្គោះជាតិកម្ពុជា បច្ចុប្បន្នប្ដូរឈ្មោះជា”រណសិរ្សសាមគ្គី អភិវឌ្ឍន៍មាតុភូមិកម្ពុជា ត្រូវបានបង្កើតឡើងដោយកម្លាំងមហាសាមគ្គីប្រជាជនទាំងមូល ទាំងក្នុងនិងក្រៅប្រទេស ដែលមានសម្តេចអគ្គមហាពញាចក្រី ហេង សំរិន, សម្តេចអគ្គមហាធម្មពោធិសាល ជា ស៊ីម, សម្តេចអគ្គមហាសេនាបតីតេជោ ហ៊ុន សែន និងវីរជនស្នេហាជាតិជាច្រើនរូបទៀតនាថ្ងៃទី២ ខែធ្នូ ឆ្នាំ១៩៧៨ នៅភូមិជើងឃ្លូ ឃុំ២ធ្នូ ស្រុកស្នួល ខេត្តក្រចេះក្នុងការរៀបចំកម្លាំងផ្ដួលរំលំរបបប្រល័យពូជសាសន៍ ប៉ុល ពត និងទទួលបានជ័យជម្នះលើរបបនេះនៅថ្ងៃទី៧ មករា ឆ្នាំ១៩៧៩៕
អត្ថបទ៖ង៉ាន់ ទិត្យ
រូបភាព រិន រចនា
