ភ្នំពេញ៖ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជាបានមានប្រសាសន៍ថា បរិយាកាស​វិនិយោគនៅកម្ពុជា ត្រូវបានទទួលស្គាល់ជាសកលក្នុងរយៈពេល ២ឆ្នាំបន្តបន្ទាប់គ្នា ជាទីផ្សាររីកចម្រើនឈានមុខគេ​សម្រាប់ការវិនិយោគ ។

ក្នុងពិធីបើកសម្ពោធ“ពិព័រណ៍ពាណិជ្ជកម្មកម្ពុជា” លើកទី១៨ ឆ្នាំ២០២៥ កាលពីព្រឹកថ្ងៃទី៤ ខែធ្នូ ឆ្នាំ២០២៥
ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជាបានអធិប្បាយថា យោងតាម fDi Intelligence នៅឆ្នាំ២០២៤ កម្ពុជាបានជាប់ចំណាត់ថ្នាក់កំពូលក្នុងបញ្ជី FDI Standouts Watchlist ដោយបញ្ជាក់ថា​កម្ពុជាជាទីផ្សាររីកចម្រើនឈានមុខគេសម្រាប់ការវិនិយោគ ។ឯកឧត្តមបន្តថា នៅឆ្នាំ២០២៥ កម្ពុជាក៏បានបន្តជាប់ចំណាត់​ថ្នាក់លេខ១ នៅអាស៊ីប៉ាស៊ីហ្វិក និងលេខ៩ នៅទូទាំងពិភពលោកសម្រាប់សន្ទស្សន៍ Greenfield FDI Performance Index ដែល​វាស់​វែងពីប្រសិទ្ធភាពនៃការទាក់ទាញវិនិយោគរបស់ប្រទេសនីមួយៗ ធៀបនឹងទំហំសេដ្ឋកិច្ចរបស់ប្រទេសទាំងនោះ​ផងដែរ។

សូមជម្រាបថា FDI Standouts Watchlist ជា “បញ្ជីតាមដាន” ដែល fDi Intelligence បញ្ចេញសម្រាប់ប្រទេស ដែលត្រូវបាន​រៀបចំយ៉ាងជាក់លាក់ដើម្បីវាយតម្លៃថា ប្រទេសណាខ្លះមានសក្តានុពលខ្លាំងក្នុងការទាក់ទាញវិនិយោគដោយផ្ទាល់ពីបរទេស (FDI) នៅក្នុងឆ្នាំខាងមុខ។ ប្រទេសដែលបានចូលក្នុងកំពូល Watchlist គឺជាការទទួលស្គាល់ពីបណ្តាញអន្តរជាតិ។ វាអាច​ជួយទាក់ទាញទុន បង្កើនទំនុកចិត្តវិនិយោគិន និងបង្កើនការទូទាត់ភាគហ៊ុនអនាគត។

ទិន្នន័យ​ការអនុម័តគម្រោងវិនិយោគ​នៅកម្ពុជាក្នុងឆ្នាំ២០២៥ នឹងអនុម័តគម្រោងវិនិយោគលើសពី ៦០០ គម្រោង។គិតត្រឹម​ដំណាច់ ខែវិច្ឆិកាឆ្នាំ២០២៥ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគមានលក្ខណៈសម្បត្តិគ្រប់គ្រាន់ (QIPs) ចំនួន ៦០៩ គម្រោង ដែលមានទុនវិនិយោគសរុបប្រមាណ៩.៥ ពាន់លានដុល្លារអាម៉េរិក និងអាចបង្កើតការងារបានជាង ៤០០ ពាន់កន្លែង។នេះបើតាមឯកឧត្តម ស៊ុន ចាន់ថុល បញ្ជាក់។

ឯកឧត្តមឧបនាយករដ្ឋមន្ត្រីបានអធិប្បាយដោយកត់សម្គាល់ថា ទិន្នន័យនេះជាការបង្កើតកំណត់ត្រាថ្មីមួយទៀត ដែលកាល​ពីឆ្នាំ២០២៤ បានអនុម័តគម្រោងវិនិយោគចំនួន ៤១៤ គម្រោងដែលជាការបំបែកកំណត់ត្រាម្តងរួចមកហើយ។

ដោយឡែកពាក់ព័ន្ធទៅនឹងពន្ធបដិការ កម្ពុជាគឺជាប្រទេសដំបូងគេបង្អស់ លើពិភពលោកដែលបានចុះហត្ថលេខាលើ កិច្ចព្រម​ព្រៀងពាណិជ្ជកម្មបដិការជាមួយអាម៉េរិកក្នុងអត្រាពន្ធ ១៩ភាគរយនៅថ្ងៃទី២៦ ខែតុលា ឆ្នាំ២០២៥ ក្នុងអំឡុងពេល​កិច្ចប្រជុំ​កំពូលអាស៊ាន នៅទីក្រុងគូឡាឡាំពួ ប្រទេសម៉ាឡេស៊ី។ កិច្ចព្រមព្រៀងនេះ នឹងផ្តល់ភាពច្បាស់លាស់ និងទំនុកចិត្តខ្ពស់ រម្រាប់វិនិយោគិនក្នុងការនាំចេញផលិតផល ទៅកាន់ទីផ្សារដ៏ធំរបស់សហរដ្ឋអាម៉េរិក៕

ដោយ៖ង៉ាន់ ទិត្យ
រូបភាព៖ រិន រចនា