MC: ភ្នាក់ងារជាតិមុខរបរ និងការងារ បានរៀបចំពិព័រណ៍ការងារមួយ នៅស្រុកសូទ្រនិគម ខេត្តសៀមរាប ដោយបង្ហាញឱកាសការងារជាង១ម៉ឺន២ពាន់កន្លែង ព្រមទាំងព័ត៌មានស្តីពីអត្ថប្រយោជន៍នៃរបបសន្តិសុខសង្គម និងការបណ្តុះបណ្តាលវិជ្ជាជីវៈឥតគិតថ្លៃ សម្រាប់បងប្អូនអតីតពលករ ដែលត្រឡប់មកពីប្រទេសថៃ។

Read ៖ ទីភ្នាក់ងារជាតិមុខរបរនិងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ បានសហការជាមួយដៃគូពាក់ព័ន្ធ រៀបចំពិព័រណ៍ការងារ សន្តិសុខសង្គម និងបណ្តុះបណ្តាលវិជ្ជាជីវៈ កាលពីព្រឹកថ្ងៃទី៦ ខែធ្នូ ឆ្នាំ២០២៥ នៅបរិវេណសាលាបឋមសិក្សាសម្តេច ហ៊ុន សែន រណសិរ្សត្រីភូមិ ឃុំដំដែក ស្រុកសូទ្រនិគម ខេត្តសៀមរាប។ ពិពណ៌នេះបានបង្ហាញឱកាសការងារចំនួនជាងមួយមឺនពីរពាន់កន្លែង និងព័ត៌មានស្តីពីអត្ថប្រយោជន៍នៃរបបសន្តិសុខសង្គម (ប.ស.ស.) និងការបណ្តុះបណ្តាលជំនាញបច្ចេកទេស និងវិជ្ជាជីវៈដោយឥតគិតថ្លៃ សម្រាប់បងប្អូនអតីតពលករដែលត្រឡប់មកពីប្រទេសថៃ។

ក្នុងឱកាសនោះ ឯកឧត្ដម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា ការនាំយកសហគ្រាស ក្រុមហ៊ុន រោងចក្រ មកដល់មូលដ្ឋានរបស់បងប្អូនអតីតពលករ ក៏ដូចជាប្រជាពលរដ្ឋរស់នៅក្នុងស្រុកសូទ្រនិគមនេះផ្ទាល់ គឺដើម្បីកុំឱ្យបងប្អូនពិបាក បើទោះបីជាសម្ភាសការងារជាប់ ឬមិនជាប់ ក៏បងប្អូនមិនចាំបាច់ចំណាយថ្លៃធ្វើដំណើរទៅរាជធានីភ្នំពេញ ឬក៏ទៅខេត្តផ្សេងៗនោះឡើយ។

ឯកឧត្ដមរដ្ឋមន្ត្រី បញ្ជាក់ថា ការទៅធ្វើការងារនៅក្រៅប្រទេសមិនមែនជារឿងអាក្រក់នោះទេ តែបងប្អូនក៏ត្រូវសម្រេចចិត្តដែរថាតើយើងគួរទៅប្រទេសណាមានប្រាក់ឈ្នួលខ្ពស់ ២ទៅ៣ដង ច្រើនជាងនៅក្នុងស្រុកយើង ហើយអាចត្រឡប់មកវិញជាមួយជំនាញថែមទៀត។

ឯកឧត្ដមរដ្ឋមន្រ្តីបានបញ្ជាក់ថា ប្រាក់ឈ្នួលដែលបងប្អូនធ្វើនៅតាមសហគ្រាស ក្រុមហ៊ុន ឬរោងចក្រ ដែលក្រសួងការងារនាំយកមកដល់ទីនេះ អាចទាបជាងប្រទេសថៃបន្តិចមែន ប៉ុន្តែអ្វីដែលបងប្អូនទទួលបានគឺខុសពីការធ្វើការងារនៅប្រទេសថៃ។ ជាក់ស្តែង ពេលបងប្អូនមានគ្រោះថ្នាក់ការងារ ប.ស.ស. ជួយព្យាបាល ហើយនៅពេលបងប្អូនគ្រោះថ្នាក់ការងារចៃដន្យ ធ្លាក់ខ្លួនពិការមិនអាចធ្វើការងារបាន ក៏ ប.ស.ស. នឹងជួយចិញ្ចឹមបងប្អូនពេញមួយជីវិត ហើយកូនចៅរបស់បងប្អូនដែលនៅក្នុងបន្ទុក ក៏ ប.ស.ស. នឹងចិញ្ចឹមរហូតដល់ពួកគេអាយុ១៨ឆ្នាំ។

ក្នុងឱកាសនេះ ឯកឧត្ដមរដ្ឋមន្ត្រី ក៏បានលើកឡើងអំពីអត្ថប្រយោជន៍នៃការទទួលបានការព្យាបាលជំងឺដោយឥតគិតថ្លៃជាមួយប័ណ្ណ ប.ស.ស. មានប្រាក់សោធនពេលធ្វើការដល់អាយុ ៦០ឆ្នាំ ហើយអាចរស់នៅជួបជុំក្រុមគ្រួសារប្រកបដោយសុភមង្គលទៀតផង។

ទន្ទឹមនេះ ឯកឧត្ដមក៏បានបង្ហាញពីកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស១,៥លាននាក់ របស់រាជរដ្ឋាភិបាលទៅដល់អតីតពលករ និងប្រជាពលរដ្ឋនៅទីនោះ ដើម្បីទទួលការសិក្សារៀនសូត្រ ទទួលបានប្រាក់ឧបត្ថម្ភប្រចាំខែទៀត និងមានជំនាញបន្ថែមពិតប្រាកដ ដែលឆ្លើយតបតាមតម្រូវការសង្គម ស្របតាមពាក្យស្លោកមួយលើកឡើងថា “ជំនាញមួយ គឺជាអនាគតមួយ”៕

ដោយ៖ង៉ាន់ ទិត្យ