ក្រសួងសុខាភិបាល និងមន្រ្តីយូអិនឌីភី បញ្ជាក់ពីការរួមគ្នាពង្រឹប្រព័ន្ធសុខាភិបាលនៅកម្ពុជា
ភ្នំពេញ៖ នៅទីស្តីការក្រសួងសុខាភិបាល ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានទទួលជួប លោកជំទាវ Kanni Wignaraja អគ្គលេខាធិការរងអង្គការសហប្រជាជាតិ និងជានាយកប្រចាំតំបន់អាស៊ី និងប៉ាស៊ីហ្វិក នៃកម្មវិធីអភិវឌ្ឍន៍អង្គការសហប្រជាជាតិ (United Nations Development Programme-UNDP)បានពិភាក្សាការងារ និង ចុះហត្ថលេខា លើអនុស្សរណៈនៃការយោគយល់គ្នាស្តីពី កិច្ចសហប្រតិបត្តិការពង្រឹប្រព័ន្ធសុខាភិបាលប្រកបដោយបរិយាប័ន្ន និងមានភាព ធន់នៅកម្ពុជា។
ក្នុងពិធីនៅថ្ងៃទី៩ ខែធ្នូ ឆ្នាំ២០២៥ ឯកឧត្តមសាស្ត្រាចារ្យរដ្ឋមន្ត្រីក្រសួងសុខាភិបាល ឈាង រ៉ា បានកោតសរសើរដល់យូអិនឌីភីដែលបានចូលរួមសហការគាំទ្រលើវិស័យសុខាភិបាល ទាំងផ្នែកបច្ចេកទេស និងហិរញ្ញវត្ថុ លើកកម្ពស់សុខុមាលភាពប្រជាជនកម្ពុជា ការពង្រឹងប្រព័ន្ធសុខាភិបាល ការគ្រប់គ្រងកាកសំណល់វេជ្ជសាស្រ្ត លទ្ធកម្មសម្ភារៈបរិក្ខារវេជ្ជសាស្ត្រ ក្នុងការឆ្លើយតបជំងឺកូវីដ-១៩ ,កម្មវិធីសុខភាពបែបរួមបញ្ចូលគ្នា ដែលនឹងអាចរួមចំណែក ក្នុងការសម្រេចបាននូវការគ្របដណ្តប់សុខភាពជាសកល និងចូលរួមចំណែកលើការកំណត់អាទិភាព ទិសដៅរបស់ក្រសួងសុខាភិបាល។
ឯកឧត្តមបន្តថា កិច្ចប្រជុំថ្ងៃនេះនិងការចុះហត្ថលេខាលើអនុស្សរណៈនៃការយោគយល់គ្នារវាងក្រសួងសុខាភិបាលនិងកម្មវិធីអភិវឌ្ឍន៍អង្គការសហប្រជាជាតិ ដើម្បីពង្រឹងប្រព័ន្ធសុខាភិបាលដែលមានភាពធន់ និងបរិយាបន្ន គឺជាព្រឹត្តិការណ៍សំខាន់មួយ ដែលឆ្លុះបញ្ចាំងពីការប្តេជ្ញាចិត្តរួមគ្នា ក្នុងការកសាងប្រព័ន្ធសុខាភិបាលដែលធន់ មានប្រសិទ្ធភាព និងត្រៀមខ្លួនសម្រាប់អនាគតសុខុមាលភាពប្រជាជនកម្ពុជា។
ចំណែកលោកជំទាវ Kanni Wignaraja បញ្ជាក់ថា ស្របតាមអនុស្សរណៈ កំណត់ទិសដៅធ្វើទំនើបកម្មវិស័យសុខាភិបាល តាមរយៈការធ្វើនវានុវត្តន៍ឌីជីថល និងការរៀបចំប្រព័ន្ធហិរញ្ញប្បទានសុខាភិបាលប្រកបដោយនិរន្តរភាព ដើម្បីបង្កើនប្រសិទ្ធភាព គុណភាពនៃការថែទាំសុខភាព រួមចំណែកពង្រឹងប្រព័ន្ធ និងសមត្ថភាពស្ថាប័ន ឆ្ពោះទៅរកការគ្របដណ្តប់សុខភាពជាសកល៕
អត្ថបទ ៖ ឈឹម សុផល
រូបភាព ៖ ថេត វិចិត្រ និង ហេង សម្បត្តិ
