ប៉េកាំង ៖ រដ្ឋមន្ត្រីការបរទេសចិនលោក វ៉ាង យី បានប្រាប់សមភាគីអាល្លឺម៉ង់ថា ប្រទេសជប៉ុនបានគំរាមកំហែងផ្នែកយោធាមកលើខ្លួន ។

ថ្លែងក្នុងជំនួបជាមួយ លោក Johann Wadephul រដ្ឋមន្ត្រីការបរទេសអាល្លឺម៉ង់នៅទីក្រុងប៉េកាំង កាលពីថ្ងៃចន្ទ, លោក វ៉ាង យី និយាយថា ឥឡូវនេះ មេដឹកនាំជប៉ុន កំពុងព្យាយាមកេងប្រវ័ញ្ច លើសំណួរជុំវិញកោះតៃវ៉ាន់ តាមរយៈការប្រព្រឹត្តឧក្រិដ្ឋកម្ម រាប់មិនអស់ ប្រឆាំងនឹងប្រជាជនចិន ដើម្បីបង្កបញ្ហា និងគំរាមកំហែងផ្នែកយោធាដល់ប្រទេសចិន ។

លោក វ៉ាង យី បញ្ជាក់ថា ឋានៈរបស់កោះតៃវ៉ាន់ជាទឹកដីរបស់ចិន ត្រូវបានបញ្ជាក់យ៉ាងច្បាស់ និង មិនអាចផ្លាស់ប្តូរបាន ដោយសារតែចិនមានអង្គហេតុប្រវត្តិសាស្ត្រ និងផ្លូវច្បាប់ជាច្រើន ។

បើតាម រយធឺ, ការអះអាងរបស់លោក វ៉ាង យី កើតមានឡើង បន្ទាប់ពីជប៉ុនបញ្ជាក់ថា យន្តហោះចម្បាំងរបស់ចិន បានតម្រង់រ៉ាដាទៅកាន់យន្តហោះយោធាជប៉ុន ដែលជាទង្វើដ៏គ្រោះថ្នាក់ ។

ប៉ុន្តែរដ្ឋាភិបាលក្រុងប៉េកាំងបានដាក់ការស្តីបន្ទោសម្ដងហើយម្ដងទៀតទៅកាន់ជប៉ុនវិញចំពោះការបញ្ជូនយន្តហោះទៅកៀកកោះតៃវ៉ាន់ ដែលរំខានដល់កងទ័ពជើងទឹករបស់ប្រទេសចិន ។

ទំនាក់ទំនងចិន និងជប៉ុនបានចាប់ផ្ដើមល្អក់កករកាលពីខែមុន បន្ទាប់ពីនាយករដ្ឋមន្ត្រីជប៉ុន លោកស្រី Sanae Takaichi ព្រមានថា ប្រទេសជប៉ុនអាចឆ្លើយតបទៅនឹងសកម្មភាពយោធារបស់ចិន ប្រឆាំងនឹងតៃវ៉ាន់ ប្រសិនបើប្រទេសនេះ គំរាមកំហែងដល់សន្តិសុខ របស់ប្រទេសជប៉ុន៕

ប្រភពពី រយធឺ, ប្រែសម្រួល៖ សារ៉ាត