ភ្នំពេញ៖ចាប់ពីខែមិគសិរ ,បុស្ស ឬរហូតដល់ខែផល្គុន ពលរដ្ឋខ្មែរតែងនាំគ្នាធ្វើដំណើរទៅកាន់ដងទន្លេ ដើម្បីនេសាទ​ឬក៏ទិញត្រី​សម្រាប់ទុកធ្វើប្រហុក ផ្អក ឆ្នើរ …ទៅតាមបំណងរបស់ខ្លួន ព្រោះជារដូវត្រីសម្បូរ។ដោយឡែកក្នុងឆ្នាំ២០២៥ រដ្ឋបាលជលផល
នៃក្រសួងកសិកម្ម រុក្ខាប្រមាញ់ និងនេសាទបានឱ្យដឹងថា ឆ្នាំនេះត្រីប្រហុកចាប់ផ្តើមត្រូវពីថ្ងៃព្រហស្បតិ៍ ៦កើត ដល់ថ្ងៃពុធ ១២កើត ខែបុស្សត្រូវនឹងថ្ងៃទី២៥ ដល់ថ្ងៃទី៣១ ខែធ្នូ ឆ្នាំ២០២៥។

សំឡេងអ៊ូអរនៃពលរដ្ឋក្មេងចាស់ប្រុសស្រី បានលាន់ឮតិចខ្លាំងៗនៅប្របដងទន្លេសាប ស្ថិតនៅសង្កាត់គីឡូម៉ែត្រលេខ៦ និងគីឡូម៉ែត្រលេខ៩ ក្នុងខណ្ឌឬស្សីកែវ រាជធានីភ្នំពេញ។ពេលទៅកាន់ទីនេះ ច្រមុះយើងបានទទួលដំបូងគឺ​ក្លិនឆ្អាបត្រីដែល
ទើបស្រង់ពីទឹក ។ត្រីខ្លះដែលលើកពីទឹកមកយូរក្រែលបានងាប់បានជះក្លិនស្អុយតិចៗ។

កំពុងដើរទិញត្រីសម្រាប់ធ្វើប្រហុកនៅសង្កាត់គីឡូម៉ែត្រលេខ៦ នៅថ្ងៃត្រីត្រូវដំបង អ្នកស្រី អាត់ ផូ មិនមែនជាអ្នកធ្វើប្រហុក​ធម្មតា​ទេ​ តែធ្វើសម្រាប់លក់ដូរនៅពេលចប់រដូវត្រីត្រូវ។ អ្នកស្រីបានប្រាប់បណ្ដាញព័ត៌មានAMS ថា​ជារៀងរាល់ឆ្នាំគាត់តែ​ងមកទិញ​ត្រីធ្វើប្រហុកសម្រាប់ទុកលក់មិនដែលខកខានទេ។ក្នុងមួយឆ្នាំយ៉ាងហោចណាស់ទិញចំនួនពី៣០ទៅ៤០តោនដែរ។ឆ្នាំនេះគាត់ទិញត្រីរៀលក្នុងមួយគីឡូក្រាមថ្លៃ ២៥០០រៀល។
ស្រ្តីវ័យជាង៣០ឆ្នាំរូបនេះបានប្រាប់ដែរថាការទិញត្រីសម្រាប់ធ្វើប្រហុកក្នុងមួយឆ្នាំគាត់ចំណាយប្រមាណ៥ទៅ៦ពាន់ដុល្លារ ហើយប្រាក់ចំណេញមកវិញប្រមាណ១ទៅ២ពាន់ដុល្លារដែរតាមរយៈការបោះដុំ និងលក់រាយដោយខ្លួនឯងតាមផ្សារផ្ទាល់។

ចំណែកអ្នកស្រី ពុយ ផល្លា ជាអ្នកទិញប្រហុកមួយរូបទៀតរស់នៅខេត្តតាកែវ បានប្រាប់បណ្ដាញព័ត៌មានAMSថា​រៀងរាល់​ឆ្នាំអ្នកស្រី តែងទិញត្រីប្រហុកយ៉ាងហោចណាស់១ទៅ២តោន ទៅតាមលទ្ធភាពថវិកា។បើឆ្នាំណាត្រីថោក អ្នកស្រីនឹង​ទិញ២ទៅ៣តោនសម្រាប់ធ្វើប្រហុកទុកលក់ឱ្យម៉ូយ។
ស្រ្តីវ័យ៦៧ឆ្នាំរូបនេះបានឆ្លៀតអះអាងពីផលិតផលប្រហុករបស់អ្នកស្រីថា ជាប្រហុកធ្វើដោយខ្លួនអ្នកស្រីផ្ទាល់, គ្មានសារជាតិគីមី ហើយក្លិនឈ្ងុយឆ្ងាញ់ធ្វើឱ្យអតិថិជន ទិញហើយជាប់ចិត្តចង់ទិញទៀត។

ចំណែកលោកយាយ ថុល ណាវី ដែលរស់នៅរាជធានីភ្នំពេញ និងរស់នៅទីតាំងធ្វើប្រហុកក្នុងសង្កាត់​ជ្រោយ​ចង្វា​ រាជធានី​ភ្នំពេញបានប្រាប់ថា ប្រហុកដែលមានត្រីជាគ្រឿងផ្សំចម្បងជាមួយអំបិល ត្រូវបានប្រើក្នុងមុខម្ហូបបានច្រើនមុខខ្លាំងណាស់ ហើយបានទាក់ទាញឱ្យភ្លក្សរសជាតិរបស់វា។ប្រហុកជាម្ហូបសំខាន់នៅក្នុងផ្ទះបាយរបស់ខ្មែរយើងអស់កាល​ដ៏យូរលង់មក​ហើយ។

គួរបញ្ជាក់ថា ប្រហុកត្រូវបានរាបបញ្ចូលថា ជាម្ហូបប្រជាប្រិយរបស់ខ្មែរ ជាកេរដំណែលពីដូនតា។គ្រួសារខ្មែរ កម្រគ្រួសារណា​មិនទទួលប្រហុកណាស់ ។ ប្រហុកក៏អាចច្នៃចេញជាមុខម្ហូបសម្បូរបែប ។

យោងតាមរបាយការណ៍សង្ខេបលទ្ធផលអនុវិស័យជលផលឆ្នាំ២០២៤ របស់រដ្ឋបាលជលផលកន្លង​មកបានបង្ហាញ​ថាក្នុង​ឆ្នាំ២០២៤ កម្ពុជាប្រមូលផលនេសាទ និងវារីវប្បកម្ម បានចំនួន៩២៦ ៩៣៤តោន ក្នុងនោះផលនេសាទទឹកសាប មាន៤៦៧ ៣៤៤តោន ផលនេសាទសមុទ្រ១៣៩ ៣១០ តោន និងផលវារីវប្បកម្ម៣២០ ២៨០តោន។ ចំនួននេះ កើនឡើង៦០ ៦៨៤តោន ស្មើនឹង៧ភាគរយ បើប្រៀបធៀបឆ្នាំ២០២៣៕
ដោយ៖ម៉ាដេប៉ូ,រូបភាព៖ លោក ផុន ពិសិដ្ឋ