វ៉ាស៊ីនតោន ៖ សេតវិមានបានប្រកាសអំពីសមាសភាពក្នុង «ក្រុមប្រឹក្សាសន្តិភាព» នៅតំបន់ហ្គាហ្សា ក្នុងនោះរួមមានអតីតនាយករដ្ឋមន្ត្រីអង់គ្លេស លោក Tony Blair និងរដ្ឋមន្ត្រីការបរទេសអាមេរិក លោក Marco Rubio ព្រមទាំងកូនប្រសាររបស់លោក ដែលជាទីប្រឹក្សាសេតវិមាន គឺលោកJared Kushner ។

ទន្ទឹមគ្នា ប្រធានាធិបតីអាមេរិក លោក ដូណាល់ ត្រាំ ដែលនឹងធ្វើជាប្រធានក្រុមប្រឹក្សានេះ ក៏បានតែងតាំងលោក Steve Witkoff បេសកជនពិសេសរបស់គាត់ និងលោក Ajay Banga ប្រធានធនាគារពិភពលោក ក្នុងចំណោមអ្នកដែលស្ថិតនៅក្នុង «ក្រុមប្រឹក្សាប្រតិបត្តិស្ថាបនិក» ដែលមានសមាជិកចំនួន ៧នាក់ ។

រីឯសមាជិកបន្ថែមទៀតនឹងត្រូវប្រកាសក្នុងសប្តាហ៍ខាងមុខ ខណៈដែលក្រុមហាម៉ាស់បានសាទរ និងចាត់ទុកវាជាគន្លឹះ ក្នុងការពង្រឹងបទឈប់បាញ់នៅហ្គាហ្សា ។

ការបង្កើតក្រុមប្រឹក្សានេះ ធ្វើឡើងបន្ទាប់ពីសហរដ្ឋអាមេរិកបានប្រកាសពីការចាប់ផ្តើមដំណាក់កាលទីពីរ នៃផែនការសន្តិភាពចំនួន ២០ចំណុចរបស់លោកប្រធានាធិបតី ដូណាល់ ត្រាំ នៅតំបន់ហ្គាហ្សា ជាការប៉ុនប៉ងជំរុញបទឈប់បាញ់ដ៏ផុយស្រួយមួយ ៕

ប្រភព ៖ The Straits Times ប្រែសម្រួល ៖ ឈឹម ទីណា