ភ្នំពេញ៖ ចំណាយពេលជាច្រើនឆ្នាំ បេក្ខជនបណ្ឌិត អ៊ុង ប៉ូរ៉ាត់ ដែលបានសិក្សានៅ សាកលវិទ្យាល័យអន្តរជាតិ ទីបំផុតធ្វើបានសម្រេចជាបេក្ខជនថ្នាក់បណ្ឌិត នៅចំពោះមុខ រដ្ឋមន្ត្រីក្រសួងអប់រំ យុវជន និងកីឡា លោកបានអធិប្បាយយ៉ាងក្បោះក្បាយ ប្រកបដោយភាពត្រឹមត្រូវ និងមានលក្ខណៈបែបវិទ្យាសាស្ត្រ។ នេះបង្ហាញអោយឃើញថា វិស័យអប់រំឯកជននៅកម្ពុជាបច្ចុប្បន្ន បោះជំហានទៅមុខ គួរជាទីមោទន បន្ទាប់ពីប្រទេសជាតិ ងើបពីភ្នក់ភ្លើងសង្គ្រាម។ ឯកឧត្តមបណ្ឌិតសភាចារ្យ      ហង់ជួន ណារ៉ុនឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ក៏បានកោតសរសើរចំពោះនិក្ខេបបទរបស់បេក្ខជនបណ្ឌិត អ៊ុង បូរាត ដែលបានខិតខំប្រឹងប្រែងរហូតទទួលបានជោគជ័យនាពេលនេះ ។ ការសម្រេចបាននេះ ឆ្លុះបញ្ចាំងពីការចូលរួម បណ្តុះបណ្តាលធនធានមនុស្សពីសំណាក់វិស័យអប់រំឯកជន ដែលមានតួនាទី ជួយកសាងសង្គមជាតិ។

ឯកឧត្តម លី ណាវុឌ្ឍ សាកលវិទ្យាធិការសាកលវិទ្យាល័យ ប៊ែលធី អន្តរជាតិ បានឱ្យដឹងថា គិតត្រឹមឆ្នាំ២០២៥ សាកលវិទ្យាល័យបាននិងកំពុងបណ្តុះបណ្តាលកម្រិតបណ្ឌិតបានចំនួន ១០២នាក់ ក្នុងនោះ៖ ១៨នាក់ បានបញ្ចប់ដោយជោគជ័យ, ៧២នាក់ បានរៀនចប់និងកំពុងសរសេរនិក្ខេបបទ, និង ១២នាក់ កំពុងសិក្សាថ្នាក់បណ្ឌិត។ ឯកឧត្តម បានបញ្ជាក់ថា ដើម្បីបញ្ចប់ថ្នាក់បណ្ឌិតជាប់ជាស្ថាពរ និស្សិតទាំងអស់ត្រូវ៖

១-   សិក្សា ១២មុខវិជ្ជា (12 Subjects) ស្មើនឹង ៣៦ក្រេឌីត

២-   ស្នើសុំការឯកភាពលើ សាស្ត្រាចារ្យណែនាំ (Supervisor)

៣-   ស្នើសុំការឯកភាពលើ ប្រធានបទស្រាវជ្រាវ (Research Topic)

៤-   រៀបចំ និងការពារគម្រោងស្រាវជ្រាវ (Proposal Defense)

៥-    ត្រូវបង្ហាញ និងការពារអំពីការរីកចម្រើននៃការស្រាវជ្រាវ (Progressive Defense)

៦-   ត្រូវបោះពុម្ពអត្ថបទស្រាវជ្រាវ (Workshop and Journal Publication)

៧-   ត្រូវសរសេរនិក្ខេបបទឱ្យបានយ៉ាងតិច ៦ម៉ឺនពាក្យឡើងទៅ និងការពារបញ្ចប់ដោយជោគជ័យ

(Final Defense of PhD Dissertation)​

៨-   ជាចុងក្រោយ ត្រូវបោះពុម្ពស្នាដៃស្រាវជ្រាវ (Dissertation Publication) របស់ខ្លួន។

ឯកឧត្តមបណ្ឌិត លី ឆេង បានគោរពថ្លែងអំណរគុណយ៉ាងជ្រាលជ្រៅចំពោះវត្តមានដ៏ខ្ពង់ខ្ពស់របស់ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី ដែលបានផ្តល់កិត្តិយសដ៏ឧត្តុង្គឧត្តមអញ្ជើញជាប្រធានគណៈអធិបតីក្នុងកម្មវិធី “ការពារបញ្ចប់បរិមាធិប្បាយថ្នាក់បណ្ឌិត (Final Defense of PhD Dissertation)” របស់សាកលវិទ្យាល័យ
ប៊ែលធី អន្តរជាតិ។ ទន្ទឹមគ្នានោះ ឯកឧត្តមបណ្ឌិត បានកោតសរសើរចំពោះ បេក្ខជនបណ្ឌិត ដែលបានខិតខំប្រឹងប្រែងសិក្សាស្រាវជ្រាវបានចប់រួចរាល់ស្របតាមគោលការណ៍របស់សាកលវិទ្យាល័យ “ទាំងការសិក្សា និងការស្រាវជ្រាវ គឺមិនឱ្យលើសពី៦ឆ្នាំ”។ ឯកឧត្តមបណ្ឌិត ក៏បានថ្លែងអំណរគុណដល់សាស្ត្រាចារ្យណែនាំទាំងជាតិ-អន្តរជាតិ ដែលបានដឹកនាំកិច្ចការស្រាវជ្រាវនេះតាំងពីដើមរហូតមក និងអនុវត្តតាមការណែនាំរបស់សាកលវិទ្យាល័យគឺ សាស្ត្រាចារ្យណែនាំ ១រូប អាចដឹកនាំបេក្ខជនបណ្ឌិត បានតែ ២រូប ប៉ុណ្ណោះ។ ឯកឧត្តមបណ្ឌិត បានបន្ថែមទៀតថា ដើម្បីធានាបាននូវប្រសិទ្ធភាព និងគុណភាពអប់រំខ្ពស់ ក៏ដូចជាការការពារនិក្ខេបបទនេះទទួលបានជោគជ័យ សាកលវិទ្យាល័យបានអញ្ជើញសាស្រ្តាចារ្យបណ្ឌិតជាតិ-អន្តរជាតិ ចំនួន ៧រូប ជាគណៈកម្មការវាយតម្លៃការការពារបញ្ចប់នាពេលនេះ។

ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានវាយតម្លៃខ្ពស់ចំពោះកិច្ចខិតខំប្រឹងប្រែង និងការយកចិត្តទុកដាក់ខ្ពស់របស់សាកលវិទ្យាល័យ​ ប៊ែលធី អន្តរជាតិ​​ក្នុងការរួមចំណែកបណ្តុះបណ្តាល​​ ធនធាន​​មនុស្ស និងការអភិវឌ្ឍវិស័យអប់រំនៅកម្ពុជា ជាពិសេសគុណភាពនៃការបណ្តុះបណ្តាលថ្នាក់បណ្ឌិត ដើម្បីឆ្លើយតបនឹងតម្រូវការសង្គម និងការអភិវឌ្ឍប្រទេសជាតិ។ ឯកឧត្តមបណ្ឌិតសភាចារ្យ នៅតែមានសុទិដ្ឋិនិយមថា វិស័យអប់រំឯកជន មានតួនាទីសំខាន់ក្នុងដំណាក់កាលប្រទេសជាតិ ត្រូវការធនធានមានគុណភាព សមត្ថភាព ដើម្បីមានភាពច្បាស់លាស់ ចេះស្រាវជ្រាវ ស្វែករក របកគំហើញថ្មីៗ សម្រាប់អ្នកសិក្សាស្រាវជ្រាវជំនាន់ក្រោយ ហើយក៏ផ្តល់នូវសារៈប្រយោជន៍ បម្រើដល់សង្គម និងសេដ្ឋកិច្ចរបស់ប្រទេសជាតិ។

ឯកឧត្តមបណ្ឌិតសភាចារ្យ ហង់ជួន ណារ៉ុន និងឯកឧត្តបណ្ឌិត លី ឆេង បានអបអរសាទរ និងប្រកាសអំពីលទ្ធផលជាប់ជាផ្លូវការលើការវាយតម្លៃការការពារបញ្ចប់ថ្នាក់បណ្ឌិតរបស់បេក្ខជនបណ្ឌិត អ៊ុង បូរាត ព្រមទាំងបានបំពាក់ Graduation Gown ទទួលស្គាល់បណ្ឌិត ដែលបានជាប់ជាស្ថាពរចាប់ពីពេលនេះតទៅ។

សូមបញ្ជាក់ថា សាកលវិទ្យាល័យ ប៊ែលធី អន្តរជាតិ បានរៀបចំកម្មវិធី “ការពារបញ្ចប់បរិមាធិប្បាយថ្នាក់បណ្ឌិត (Final Defense of PhD Dissertation)” ជំនាញរដ្ឋបាលអប់រំ និងភាពជាអ្នកដឹកនាំ ក្រោមអធិបតីភាពដ៏ខ្ពង់ខ្ពស់  ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា វត្តមានចូលរួមពី ឯកឧត្តមបណ្ឌិត លី ឆេង អគ្គនាយក ប៊ែលធី គ្រុប និងជាប្រធានក្រុមប្រឹក្សាភិបាលនៃសាកលវិទ្យាល័យ ប៊ែលធី អន្តរជាតិ និង ឯកឧត្តម លី ណាវុឌ្ឍ អគ្គនាយករង ប៊ែលធី គ្រុប និងជាសាកលវិទ្យាធិការសាកលវិទ្យាល័យ ប៊ែលធី អន្តរជាតិ រួមជាមួយ ឯកឧត្តម លោកជំទាវ ថ្នាក់ដឹកនាំក្រសួងអប់រំ និង គណៈគ្រប់គ្រង បុគ្គលិក សាស្ត្រាចារ្យ និងនិស្សិត ចូលរួមប្រមាណជាង ៨០០នាក់៕