ជប៉ុនផ្តល់ជំនួយឥតសំណងជាង៣០ម៉ឺនដុល្លារដល់កម្ពុជាសម្រាប់ជួយដល់វិស័យចំនួនពីរ
ភ្នំពេញ៖រាជរដ្ឋាភិបាលជប៉ុនបានសម្រេចផ្តល់ជំនួយឥតសំណង គម្រោងទ្រង់ទ្រាយតូចសន្តិសុខមនុស្សជាតិ គូសាណូណិជាទឹកប្រាក់សរុបជាង ៣០ម៉ឺនដុល្លារអាម៉េរិកដល់រាជរដ្ឋាភិបាលកម្ពុជា សម្រាប់យកទៅប្រើប្រាស់ការស្តារប្រព័ន្ធធារាសាស្រ្តនិងវិស័យអប់រំក្នុងខេត្តចំនួន២។
កាលពីព្រឹកថ្ងៃទី៦ ខែកុម្ភៈ ឆ្នាំ២០២៦ ឯកអគ្គរាជទូតជប៉ុនប្រចាំនៅកម្ពុជាឯកឧត្តម អ៊ុអិណុ អាត់ ស៊ូស៊ី បានថ្លែងនៅក្នុងពិធីចុះហត្ថលេខាប្រគល់ និងទទួលជំនួយឥតសំណងគម្រោងទ្រង់ទ្រាយតូចសន្តិសុខមនុស្សជាតិនោះថា ជំនួយដែលបានផ្តល់ជូនរួមមាន៖
ទី១. ប្រាក់ចំនួន ២២០. ២១៦ដុល្លារផ្តល់ជូនដល់មន្ទីរធនធានទឹក និងឧតុនិយមខេត្តបន្ទាយមានជ័យ សម្រាប់ប្រើប្រាស់ដើម្បីស្តារប្រព័ន្ធធារាសាស្រ្តមានស្រាប់ ដែលមានមុខងារអាងស្តុកទឹកអន់ថយ ងាយរងគ្រោះរាំងស្ងួតក្នុងរដូវប្រាំង និងមានការលំបាកក្នុងការផ្គត់ផ្គង់ទឹកសម្រាប់វិស័យកសិកម្ម ។ក្រោយការជួសជុលរួច និងផ្តល់អត្ថប្រយោជន៍ដល់ប្រជាជនមូលដ្ឋានប្រមាណ ៦.៥០០នាក់ រួមទាំងអ្នកដែលបានត្រឡប់មកពីប្រទេសថៃផងដែរ ។
ទី២. ប្រាក់ចំនួន ៨១.៦៨៨ដុល្លារបានផ្តល់ជូនទៅមជ្ឈមណ្ឌលបណ្តុះបណ្តាលវិជ្ជាជីវៈខេត្តមណ្ឌលគីរី សម្រាប់ប្រើប្រាស់សាងសង់អន្តេវាសិកដ្ឋាននិស្សិតស្រី និងផ្តល់ឧបករណ៍បណ្តុះបណ្តាលវិជ្ជាជីវៈ ។ អន្តេវាសិកដ្ឋាននឹងផ្តល់ឱ្យនិស្សិតស្រីនូវកន្លែងស្នាក់នៅប្រកបដោយផាសុកភាព។ ចំណែកឧបករណ៍ថ្មីនឹងផ្តល់ឱ្យនិស្សិទាំងអស់នូវឱកាស ដើម្បីរៀននូវវិជ្ជាជីវៈនានា ដែលនឹងជួយពួកគេស្វែងរកការងារបន្ទាប់ពីបញ្ចប់ការសិក្សា ។
ឯកអគ្គរាជទូតជប៉ុនបានបញ្ជាក់ថា ក្រោមភាពជាដៃគូយុទ្ធសាស្ត្រគ្រប់ជ្រុងជ្រោយនៃប្រទេសទាំងពីរ ជប៉ុននឹងនៅតែបន្តចូលរួមចំណែកក្នុងការដោះស្រាយបញ្ហាប្រឈមនានានៅកម្ពុជា តាមរយៈគ្រោងការជំនួយអភិវឌ្ឍន៍ផ្លូវការផ្សេងៗ រួមទាំង គូសាណូណិ ផងដែរ ។
ជប៉ុនតាមរយៈគម្រោងជំនួយឥតសំណង គូសាណូណិ ចាប់តាំងពីឆ្នាំ១៩៩១មក បានគាំទ្រដល់កិច្ចខិតខំប្រឹងប្រែងរបស់កម្ពុជា ក្នុងការអភិវឌ្ឍ និងស្ថាបនាប្រទេសឡើងវិញនៅកម្រិតមូលដ្ឋាន ។គម្រោងជាង៧០០ នៅទូទាំងប្រទេស បានរួមចំណែកដោយផ្ទាល់ក្នុងការលើកកំពស់គុណភាពជីវិតពលរដ្ឋកម្ពុជាលើវិស័យសុខាភិបាល ការអប់រំ ប្រព័ន្ធធារាសាស្រ្ត ប្រព័ន្ធគមនាគមន៍ ការបណ្តុះបណ្តាលវិជ្ជាជីវៈ សុខមាលភាពសង្គម និងសកម្មភាពដោះមីនមនុស្សធម៌ជាដើម ៕
អត្ថបទ ៖ គង់ សុផុល
រូបភាព ៖ វ៉េង លឹមហួត
