ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា ឯកឧត្តម តូ ឡឹម អគ្គលេខាធិការ បក្សកុម្មុយ​នីស្តវៀតណាម និងឯកឧត្តមថងលុន ស៊ីសុលីត អគ្គលេខាធិការនៃគណៈកម្មាធិការមជ្ឈិមបក្ស ប្រជាជនបដិវត្តន៍ឡាវ បានប្តេជ្ញារួមគ្នាថែរក្សាការពារសន្តិសុខ និងសន្តិភាពនៅតាមព្រំដែនរួមគ្នាឱ្យកាន់តែល្អបន្ថែមទៀត រួមទាំងខិតខំធ្វើយ៉ាងណា ជំរុញពាណិជ្ជកម្មរួមគ្នាឱ្យកាន់តែរីកចម្រើនផងដែរ ដើម្បីផលប្រយោជន៍រួមរបស់ប្រជាជនទាំងអស់គ្នា ។ នេះបើតាមការបញ្ជាក់​របស់​ ឯកឧត្តម ជា ធីរិទ្ធ អ្នកនាំពាក្យគណបក្សប្រជាជនកម្ពុជា ។

ថ្លែងក្រោយបញ្ចប់កិច្ចប្រជុំកំពូលត្រីភាគី រវាងថ្នាក់ដឹកនាំកំពូល គណបក្សប្រជាជនកម្ពុជា ,គណបក្សកុម្មុយនីស្តវៀតណាម និងបក្សប្រជាជនបដិវត្តន៍ឡាវ នារសៀលថ្ងៃទី៦ ខែកុម្ភៈ ឆ្នាំ២០២៦ នៅវិមាន៧មករា រាជធានីភ្នំពេញ ឯកឧត្តម ជា ធីរិទ្ធ បានឱ្យដឹងថា នៅក្នុងកិច្ចប្រជុំត្រីភាគីនេះ ថ្នាក់ដឹកនាំទាំងបី បានពិភាក្សាគ្នាយ៉ាងច្រើនក្នុងគោលបំណងពង្រីក និងពង្រឹងកិច្ច​សហប្រតិបត្តិការរួមគ្នាឲ្យកាន់តែក្លាំងក្លាបន្ថែមទៀត លើគ្រប់វិស័យទាំងវិស័យការពារជាតិ វិស័យពាណិជ្ជកម្ម-សេដ្ឋកិច្ច និងវិស័យវប្បធម៌ជាដើម ។

ទាក់ទងនឹងវិស័យសេដ្ឋកិច្ច និងពាណិជ្ជកម្មនេះ ថ្នាក់ដឹកនាំកំពូលទាំងបី សុទ្ធតែជំរុញឱ្យរដ្ឋាភិបាល នៃប្រទេសរបស់ខ្លួន ឱ្យ​ប្រឹងប្រែងបន្ថែមទៀត ដើម្បីពង្រីកការធ្វើពាណិជ្ជកម្មជំរុញ​ទំហំពាណិជ្ជកម្មជាមួយគ្នា។ ឯកឧត្តម ជា ធីរិទ្ធ គូសបញ្ជាក់ថា នៅក្នុងឆ្នាំ២០២៥ កន្លងទៅ កម្ពុជា និងវៀតណាម សម្រេចបានទំហំពាណីជ្ជកម្មជាង ១១​ពាន់លានដុល្លារអាម៉េរិក ដែលជា​ចំនួនមួយដ៏ច្រើន ហើយភាគីទាំងពីរ ក៏មានគោលដៅ បង្កើនទំហំពាណិជ្ជឱ្យដល់ ២០ ពាន់លានដុល្លារ នៅក្នុងពេល​ខាងមុខ​ឆាប់ៗដែរ។ ចំណែកទំហំពាណិជ្ជកម្ម រវាងកម្ពុជា និងឡាវ, ថ្វីដ្បិតកម្ពុជា និងឡាវ មានទំហំពាណិជ្ជកម្ម នៅមាន​កម្រិតទាប​ពិតមែន ប៉ុន្តែថ្នាក់ដឹកនាំ​ជាន់ខ្ពស់ នៃប្រទេសទាំងពីរ សុទ្ធតែលើកឡើងពីសក្តានុពលជាច្រើន ដែល​ប្រទេសទាំងពីរ អាចធ្វើ​ជាមួយគ្នា ក្នុងការពង្រីកពាណិជ្ជកម្ម ឱ្យកាន់តែរីកចម្រើនបន្ថែមទៀត។

ឯកឧត្តម ជា ធីរិទ្ធ បន្ថែមថា ក្រៅពីជំរុញការពង្រីក ទំនាក់ទំនងផ្នែកនយោបាយ សេដ្ឋកិច្ច ពាណិជ្ជកម្ម ផ្នែកការទូត ថ្នាក់ដឹកនាំ​កំពូលនៃគណបក្សទាំងបី ក៏នឹងជំរុញបន្ថែមទៀត នូវកិច្ចសហប្រតិបត្តិការសម្រាប់អ្នកបន្តវេនឱ្យបន្តពួនជ្រុំ នូវវប្បធម៌ជា​ប្រពៃណីជានិរន្តផងដែរ ។ បន្ថែមពីនេះ ​ថ្នាក់ដឹកនាំកំពូលនៃគណបក្សទាំងបី ក៏យកចិត្តទុកដាក់ខ្ពស់ និងជំរុញឱ្យបណ្តា​គណបក្ស​ទាំងបី រួមគ្នាបណ្តុះបណ្តាល យុវជនបន្តវេនរបស់គណបក្ស ឱ្យកាន់តែមានផុសផុល និងកាន់តែសកម្ម បន្ថែមទៀតដែរ ។

ក្រៅពីជំរុញការពង្រីក ទំនាក់ទំនងផ្នែកនយោបាយ សេដ្ឋកិច្ច ពាណិជ្ជកម្ម ផ្នែកការទូត ថ្នាក់ដឹកនាំកំពូល នៃគណបក្សទាំងបី ក៏នឹងជំរុញបន្ថែមទៀត នូវកិច្ចសហប្រតិបត្តិការសម្រាប់អ្នកបន្តវេន ឲ្យបន្តពួនជ្រុំ នូវវប្បធម៌ជាប្រពៃណីជានិរន្តផងដែរ ។

ជាមួយនេះ ថ្នាក់ដឹកនាំគណបក្សទាំងបីបានឯកភាពគ្នា ជំរុញ នូវទំនាក់ទំនងត្រីភាគី ឱ្យកាន់តែរីកចម្រើននៅក្នុងក្របខ័ណ្ឌ នៃការសហការមិត្តភាពជាប្រពៃណី តាមព្រំដែនឱ្យកាន់តែល្អ ព្រោះសុវត្ថិភាព សន្តិសុខនៅតាមព្រំដែននេះ គឺជាកត្តាចម្បង ដែលថ្នាក់ដឹកនាំទាំងបី បានលើកឡើង ហើយក៏កោតសរសើរ ចំពោះអ្វីដែលប្រទេសទាំងបី បានធ្វើឡើងជាមួយគ្នា ដោយរក្សា​បានទំនាក់ទំនងតាមព្រំដែនបានល្អប្រសើរ និងបន្តការខិតខំប្រឹងប្រែងទៀត ដើម្បីប្រយុទ្ធប្រឆាំង ទៅនឹងឧក្រិដ្ឋកម្មឆ្លងដែន ដើម្បីធានាថា ព្រំដែននៃប្រទេសទាំងបី មានសុវត្ថិភាព និងបន្ត រក្សាសន្តិភាពឱ្យកាន់តែល្អប្រសើរ ។

អ្នកនាំពាក្យដដែលបញ្ជាក់ថា កិច្ចប្រជុំត្រីភាគីរវាងកម្ពុជា ឡាវ និងវៀតណាម នាពេលនេះ គឺជាឱកាសពង្រីកកិច្ចសហប្រតិបត្តិការ ទំាងនៅក្នុងក្របខណ្ឌត្រីភាគី នៃគណបក្សទាំងបី ក្របខណ្ឌ នៃរាជរដ្ឋាភិបាលប្រទេសទាំងបីបន្ថែមទៀត ដើម្បីឱ្យ​មិត្តភាពជា​ប្រពៃណីរវាងអ្នកជិតខាងប្រទេសទាំងបីនេះ កាន់តែស៊ីជម្រៅ និងរីកចម្រើនបន្ថែមទៀត ៕

អត្ថបទ៖ វណ្ណលុក
រូប៖ សួង ពិសិដ្ឋ