តូក្យូ ៖ ប្រទេសជប៉ុនបានរៀបចំការបោះឆ្នោតសភាជាន់ទាប មុនអាណត្តិ នៅថ្ងៃអាទិត្យ ទី៨ ខែកុម្ភៈ នេះ ដោយការិយាល័យបោះឆ្នោត បើកទ្វារ ទាំងពីព្រឹកព្រលឹម។

យ៉ាងណា មនុស្សជិត ៤.៦លាននាក់បានបោះឆ្នោតមុនកាលកំណត់ កាលពីមួយសប្តាហ៍មុន នេះបើតាម BBC។

ក្រុមអភិរក្សនិយម របស់លោកស្រី នាយករដ្ឋមន្ត្រី Sanae Takaichi ត្រូវបានគេព្យាករណ៍ថា នឹងឈ្នះសំឡេងភាគច្រើន។

លោកស្រី Takaichi បានចូលកាន់តំណែង ជានាយករដ្ឋមន្ត្រីស្ត្រីដំបូង របស់ប្រទេសជប៉ុន កាលពីខែតុលា ប៉ុន្តែ បានប្រកាសរំលាយសភាចោល ដើម្បីរៀបចំការបោះឆ្នោតមុនអាណត្តិ ក្នុងការប៉ុនប៉ង ទាញយកប្រជាប្រិយភាពដំបូង របស់លោកស្រី ពង្រឹងអំណាច ក្នុងការសម្រេចចិត្ត លើគោលនយោបាយជាតិសំខាន់ៗ ខណៈដែលលោកស្រី ឡើងកាន់តំណែងបន្ត ពីអ្នកចាស់ តាមរយៈការបោះឆ្នោតក្នុងបក្ស ដែលមិនមែនជាការបោះឆ្នោតសកល។

បើតាម NHK, មាន ៤៦៥ អាសនៈ សម្រាប់ដាក់ឲ្យប្រជែង ដណ្តើមយក។ ពិន្ទុគោល សម្រាប់សភាជាន់ទាប ភាគច្រើន គឺ ២៣៣ អាសនៈ។

បើតាម Nippon, នេះគឺការបោះឆ្នោតជាតិលើកដំបូង ចាប់តាំងពីគណបក្ស LDP ដែលមានលោកស្រី Takaichi ជាប្រធានថ្មី បានបង្កើតសម្ព័ន្ធភាព ជាមួយគណបក្ស Japan Innovation កាលពីខែតុលា ឆ្នាំមុន ពោលគឺ បន្ទាប់ពី គណបក្ស Komeito បានបោះបង់ភាពជាដៃគូ រយៈពេល ២៦ឆ្នាំរបស់ខ្លួន ជាមួយនឹងបក្ស LDP ។

បន្ទាប់ពីបែកបាក់, បក្ស Komeito បានចងសម្ព័ន្ធភាព ជាមួយគណបក្សប្រជាធិបតេយ្យរដ្ឋធម្មនុញ្ញនៃប្រទេសជប៉ុន ដើម្បីប្រមូលផ្តុំសមាជិកសភាជាន់ទាបរបស់ពួកគេ ប្រជែងតតាំងជាមួយបក្សកាន់អំណាច LDP៕

ប្រភពពី AFP ប្រែសម្រួល ៖ សារ៉ាត