ប៉ារីស ៖ អ្នកការទូតកំពូល របស់បារាំង និយាយថា ប្រទេសរបស់ខ្លួនបានយល់ព្រមធ្វើការសហការជាមួយប្រទេសចិន ចូលទៅពន្លត់ភ្លើងសង្គ្រាម នៅតំបន់មជ្ឈិមបូព៌ា។

លោក Jean-Noel Barrot រដ្ឋមន្ត្រីការបរទេសបារាំង បាននិយាយបែបនេះ បន្ទាប់ពីមានកិច្ចសន្ទនាតាមទូរស័ព្ទ ជាមួយសមភាគីចិន លោក Wang Yi។ លោក Jean-Noel Barrot បានប្រាប់ រដ្ឋមន្ត្រីការបរទេសចិនថា ប្រទេសបារាំងបានយល់ព្រមធ្វើការ ជាមួយទីក្រុងប៉េកាំង ដើម្បីកាត់បន្ថយភាពតានតឹងនៅមជ្ឈិមបូព៌ា។

លោក Barrot បញ្ជាក់ដែរថា ប្រតិបត្តិការយោធាអាមេរិក និងអ៊ីស្រាអែល គឺ គ្មានការចូលរួមពីប្រទេសបារាំងនោះទេ ហើយលោក អះអាងថា ជាទំនួលខុសត្រូវរបស់ប្រទេសនីមួយៗ ក្នុងការផ្តល់អាទិភាព ដល់ស្ថាប័នអន្តរជាតិ សម្រាប់ការដោះស្រាយជម្លោះ។

បើតាម Anadolu, ភាពតានតឹងកំពុងឡើងកម្តៅ ពាសពេញតំបន់មជ្ឈិមបូព៌ា ចាប់តាំងពីថ្ងៃសៅរ៍ ចុងសប្តាហ៍ នៅពេលដែលសហរដ្ឋអាមេរិក និងអ៊ីស្រាអែល ចាប់ផ្តើមការវាយប្រហារតាមអាកាស ទៅលើប្រទេសអ៊ីរ៉ង់ ដោយបានសម្លាប់មេដឹកនាំកំពូលរបស់សាធារណរដ្ឋឥស្លាមមួយនេះ គឺ លោក Ali Khamenei ខណៈដែលមនុស្ស ៧៨៦នាក់ ផ្សេងទៀត បានស្លាប់បាត់បង់ជីវិត។

ទីក្រុង តេហេរ៉ង់ ឆ្លើយតបវិញ ជាមួយនឹងការវាយប្រហារសងសឹក ដោយបានប្រើប្រាស់យន្តហោះគ្មានមនុស្សបើក និង កាំជ្រួច មីស៊ីល តម្រង់គោលដៅ ទៅលើអ៊ីស្រាអែល និងទីតាំងដែលពាក់ព័ន្ធនឹងសហរដ្ឋអាមេរិក ពោលគឺ នៅក្នុងបណ្តាប្រទេសឈូងសមុទ្រ ដែលបណ្តាលឱ្យមានអ្នកស្លាប់ ជាច្រើននាក់៕

ប្រភពពី Anadolu ប្រែសម្រួល ៖ សារ៉ាត