នៅក្នុងឆ្នាំ២០២៥ ផលិតកម្មជលផលសរុបរបស់កម្ពុជាសម្រេចបានជិត ១ លានតោន  មានការកើនឡើង ៥,៦% បើធៀបនឹងឆ្នាំ២០២៤។ យោងតាមក្រសួងកសិកម្ម  ផលនេសាទទឹកសាបទទួលបានជាង  ៥១ម៉ឺនតោន កើនឡើង ១០%,  ផលវារីវប្បកម្មជាង ៣២ម៉ឺនតោន និងផលនេសាទសមុទ្របានចំនួនជាង ១៤ម៉ឺនតោន។
 
នៅក្នុងពិធីប្រារព្ធ «ទិវាមច្ឆជាតិ ១កក្កដា ២០២៦» ដែលធ្វើឡើងនៅទន្លេវ៉ៃគោ ក្រុងស្វាយរៀង នៅថ្ងៃពុធនេះ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា ការកើនឡើងនៃផលនេសាទទឹកសាបនេះ គឺដោយសារមានការទប់ស្កាត់ និងបង្ក្រាបបទល្មើសនេសាទពីសំណាក់សមត្ថកិច្ចជំនាញជលផល កងកម្លាំងប្រដាប់អាវុធ និងរដ្ឋបាលថ្នាក់ក្រោមជាតិ ព្រមទាំងសហគមន៍នេសាទផងដែរ។
 
ឯកឧត្តមរដ្ឋមន្ត្រីបានបន្តថា ទោះបីជាបរិបទពិភពលោកមានការប្រែប្រួលស្មុគ្រស្មាញ និងរងផលប៉ះពាល់ពីការបម្រែបម្រួលអាកាសធាតុក៏ដោយ ប៉ុន្តែវិស័យកសិកម្មកម្ពុជានៅតែរក្សាបានភាពធន់ខ្ពស់។ វិស័យនេះបានដើរតួនាទីយ៉ាងសំខាន់ក្នុងការធានាសន្តិសុខស្បៀង លើកកម្ពស់ជីវភាពប្រជាពលរដ្ឋ និងទ្រទ្រង់កំណើនសេដ្ឋកិច្ចជាតិ។
 
សម្ដេចធិបតី ហ៊ុន ម៉ាណែត បានបញ្ជាក់ថា រាជរដ្ឋាភិបាលតែងតែចាត់ទុកវិស័យកសិកម្មជាក្រពះរបស់ជាតិ។ ទន្ទឹមនឹងនេះ សម្ដេចបានហៅមច្ឆាជាតិថាជាម៉ាស៊ីនផលិតប្រូតេអ៊ីនរបស់ជាតិ ព្រោះវាជាប្រភពផ្ដល់ប្រូតេអ៊ីនមិនចេះរីងស្ងួត សម្បូរទៅដោយមីក្រូសារធាតុ និងជាអាហារសហគមន៍ដ៏ពេញនិយមសម្រាប់ប្រជាពលរដ្ឋគ្រប់ស្រទាប់ដែលអាចរក្សាទុកបានយូរ។
 
សូមបញ្ជាក់ថា ការចូលរួមរបស់កងកម្លាំងប្រដាប់អាវុធ និងស្ថាប័នពាក់ព័ន្ធ បានធ្វើឱ្យវិធានការទប់ស្កាត់បទល្មើសនេសាទខុសច្បាប់ ដូចជាការប្រើឧបករណ៍ហាមឃាត់ ការនេសាទក្នុងតំបន់អភិរក្ស និងការនេសាទហួសកម្រិត ទទួលបានប្រសិទ្ធភាពខ្ពស់។ លទ្ធផលនេះបង្ហាញពីការប្តេជ្ញាចិត្តរបស់រាជរដ្ឋាភិបាលក្នុងការអនុវត្តច្បាប់ និងការពារធនធានធម្មជាតិ។
 
យោងតាមអគ្គនាយកដ្ឋានជលផល ក្នុងរយៈពេល៦ខែ ឆ្នាំ២០២៦ នេះ បទល្មើសនេសាទនៅកម្ពុជាជាង ១ ០០០ករណីត្រូវបានបង្ក្រាប។ តួលេខនេះមានការថយថុះ​បើធៀបនឹងឆ្នាំ២០២៥៕

ទួន សុផល