រឿងមិនចាប់ដៃលោក សម រង្ស៊ី ៖ ស្ថានទូតកម្ពុជានៅជប៉ុនបញ្ជាក់ការពិត និងច្រានចោលការវាយប្រហារនយោបាយ
អ្នកនាំពាក្យស្ថានឯកអគ្គរាជទូតកម្ពុជាប្រចាំប្រទេសជប៉ុន បានប្រកាសច្រានចោល ចំពោះការបកស្រាយបំភាន់ និងការរិះគន់វាយប្រហារដោយគ្មានមូលដ្ឋានរបស់ក្រុមប្រឆាំងជុំវិញការសម្រេចចិត្តរបស់ឯកឧត្តម ជុំ សុន្ទរី ឯកអគ្គរាជទូតកម្ពុជាក្នុងការមិនចាប់ដៃជាមួយលោក សម រង្ស៊ី ក្នុងពិធីបុណ្យកឋិនទាននៅខេត្តកាណាហ្គាវ៉ា។
នៅថ្ងៃទី១១ ខែវិច្ឆិកានេះ ស្ថានឯកអគ្គរាជទូតកម្ពុជាប្រចាំប្រទេសជប៉ុន បានចេញសេចក្តីប្រកាសច្រានចោលយ៉ាងដាច់អហង្ការនូវការបំភ្លៃការពិតរបស់បុគ្គលមួយចំនួនក្នុងក្រុមប្រឆាំង ពាក់ព័ន្ធនឹងករណីកាលពីថ្ងៃទី៨ ខែវិច្ឆិកា ឆ្នាំ២០២៦ នៅវត្តខ្មែរ សាមគ្គី ខេត្តកាណាហ្គាវ៉ា ជុំវិញការសម្រេចចិត្តរបស់ឯកឧត្តម ជុំ សុន្ទរី ឯកអគ្គរាជទូតក្នុងការមិនចាប់ដៃជាមួយលោក សម រង្ស៊ី។ ក្រោយបញ្ចប់កម្មវិធីបុណ្យកឋិនទានលោក សម រង្ស៊ី បានដើរចូលមកសុំចាប់ដៃ ខណៈមានក្រុមអ្នកអមដំណើរត្រៀមចាំថតរូបទុកជាមុន។
យោងតាមសេចក្តីថ្លែងការណ៍របស់អ្នកនាំពាក្យស្ថានឯកអគ្គរាជទូតកម្ពុជាប្រចាំប្រទេសជប៉ុនបានពន្យល់ថា ចំពោះមុខស្ថានភាពនេះ ឯកឧត្តម ជុំ សុន្ទរី ឯកអគ្គរាជទូតវិសាមញ្ញ និងពេញសមត្ថភាពបានសម្រេចចិត្តដោយចេតនាមិនលូកដៃចាប់ដៃវិញឡើយ ដោយផ្អែកលើស្ថានភាពផ្លូវច្បាប់ និងនយោបាយរបស់លោក សម រង្ស៊ី ដែលជាទណ្ឌិតត្រូវបានតុលាការកម្ពុជាផ្តន្ទាទោសក្នុងសំណុំរឿងព្រហ្មទណ្ឌ និងជាបុគ្គលបង្កើតរចនាសម្ព័ន្ធនយោបាយខុសច្បាប់នៅក្រៅប្រទេស គ្មានសិទ្ធិអំណាចតំណាងឱ្យរដ្ឋាភិបាលកម្ពុជានោះឡើយ។
សេចក្តីថ្លែងការណ៍ដដែលបន្ថែមថា កាយវិការទូទៅនៃការចាប់ដៃមិនអាចកាត់ផ្តាច់ចេញពីបរិបទនយោបាយបានទេ។ ការយល់ព្រមចាប់ដៃក្នុងករណីនេះ អាចត្រូវក្រុមប្រឆាំងយកទៅបកស្រាយ និងកេងចំណេញដោយចេតនា ដើម្បីបង្កើតការយល់ច្រឡំថា ភាគីរដ្ឋាភិបាលបានទទួលស្គាល់ ឬគាំទ្រដល់សកម្មភាពរបស់ទណ្ឌិតរូបនេះ ដែលជាការបំភាន់ខុសពីការពិតទាំងស្រុង។
ក្នុងនាមជាតំណាងផ្លូវការរបស់រដ្ឋ ឯកអគ្គរាជទូតមានភារកិច្ច និងការទទួលខុសត្រូវខ្ពស់ក្នុងការការពារសេចក្តីថ្លៃថ្នូរ ព្រមទាំងប្រុងប្រយ័ត្នចំពោះទំនាក់ទំនងជាមួយបុគ្គលដែលមានទសនៈ និងសកម្មភាពប្រឆាំងនឹងស្ថាប័នជាតិ។ ការមិនតបតនឹងការលូកដៃនេះ គឺជាការអនុវត្តភារកិច្ចការទូតដ៏ហ្មត់ចត់ ដើម្បីទប់ស្កាត់ការបំពុលសង្គម និងការយកសាសនាធ្វើជាឈ្នាន់កេងចំណេញនយោបាយ។
ស្ថានឯកអគ្គរាជទូតបានសង្កត់ធ្ងន់ថា ពិធីបុណ្យតាមបែបព្រះពុទ្ធសាសនា គួរតែជាទីកន្លែងសម្រាប់ប្រតិបត្តិធម៌ សាមគ្គីភាព និងការគោរពគ្នាទៅវិញទៅមក មិនមែនជាឱកាសសម្រាប់បង្កើតរឿងនយោបាយកខ្វក់នោះឡើយ ហេតុនេះទើបសំណូមពរឱ្យសាធារណជនកុំជឿលើការញុះញង់ និងការបកស្រាយខុសពីការពិតរបស់អ្នកពាក់ព័ន្ធ៕
ដោយ៖ទួន សុផល
