បន្ទាប់ពីទុកឱ្យតំណែងឯកអគ្គរដ្ឋទូតប្រចាំកម្ពុជាទំនេរអស់រយៈពេលជិត២ឆ្នាំ សហរដ្ឋអាម៉េរិកបានបញ្ជូនទូតថ្មីរបស់ ខ្លួនមកកាន់ រាជធានីភ្នំពេញជាផ្លូវការដែលការណ៍នេះត្រូវបានអ្នកជំនាញចាត់ទុកថាជា «សញ្ញាណវិជ្ជមាន» នៃការបើកទំព័រទំនាក់ទំនងថ្មី និងការផ្តល់ តម្លៃស្មើមុខស្មើមាត់រវាងប្រទេសទាំងពីរ។

ជាការចាប់ផ្តើមបេសកកម្មការទូតនៅកម្ពុជា សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃកម្ពុជា នៅព្រឹកថ្ងៃទី១៣ ខែវិច្ឆិកា ឆ្នាំ២០២៦ បានអនុញ្ញាតជូនឯកឧត្តម គ្រីស្តូហ្វឺ អានដ័រសុន (Christopher Anderson) ឯកអគ្គរដ្ឋទូតតែងតាំងថ្មីរបស់សហរដ្ឋ​អាម៉េរិក ចូលជួបសម្ដែងការគួរសម និងពិភាក្សាការងារនៅវិមានសាមគ្គីភាព។

ជុំវិញវត្តមានទូតថ្មីនេះ លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បានប្រាប់បណ្ដាញព័ត៌មាន AMS ថា នេះគឺជាចំណុចរបត់ដ៏ល្អមួយដែលឆ្លុះបញ្ចាំងពីវឌ្ឍនភាពវិជ្ជមាននៃទំនាក់ទំនងកម្ពុជា-អាម៉េរិកនាពេលបច្ចុប្បន្ន ព្រមទាំងបង្ហាញ​ពីសុឆន្ទៈក្នុងការការពង្រឹង និងពង្រីកកិច្ចសហប្រតិបត្តិការទ្វេភាគីលើវិស័យដែលជាផលប្រយោជន៍រួម។

លោកបណ្ឌិតបានគូសបញ្ជាក់បន្ថែមថា ដើម្បីរុញច្រានទំនាក់ទំនងនេះឱ្យកាន់តែប្រសើរ កម្ពុជា និងអាម៉េរិក ត្រូវឈ្វេងយល់ឱ្យបានស៊ី​ជម្រៅ​ពីតម្រូវការ និងផលប្រយោជន៍យុទ្ធសាស្ត្ររៀងៗខ្លួន។ លើសពីនេះ ការរួមចំណែកធ្វើឱ្យប្រសើរឡើងនូវលំហប្រជាធិបតេយ្យ នីតិរដ្ឋ និងសិទ្ធិមនុស្សនៅកម្ពុជា ក៏នៅតែជាមូលដ្ឋានគ្រឹះដ៏សំខាន់សម្រាប់កំណត់ពីស្ថិរភាព និងភាព​រឹងមាំនៃទំនាក់ទំនងរវាងប្រទេសទាំងពីរ​ផងដែរ។
១.(សំឡេងលោកបណ្ឌិតគិន ភា)

គួររំលឹកថា កាលពីថ្ងៃទី១ ខែមិថុនា ឆ្នាំ២០២៦ រដ្ឋាភិបាលអាម៉េរិក ក្រោមការដឹកនាំរបស់លោក ដូណាល់ ត្រាំ បានសម្រេចតែងតាំង​ឯកឧត្តម គ្រីស្តូហ្វឺ អានដ័រសុន(Christopher Anderson (ជាបេក្ខជនឯកអគ្គរដ្ឋទូតប្រចាំកម្ពុជា ជំនួសលោក W. Patrick Murphy ដែលបានបញ្ចប់បេសកកម្មកាលពីពាក់កណ្តាលឆ្នាំ២០២៤។ លោក Anderson គឺជាអ្នកការទូតចាស់វស្សាមួយរូបតាំងពីឆ្នាំ២០០៥ និងធ្លាប់បំពេញបេសកកម្មនៅប្រទេសរុស្ស៊ី អាមេនី ម៉ុងហ្គោលី និងអ៊ុយក្រែន។ លោកកើតនៅប្រទេសអ៊ីរ៉ង់ ធ្លាប់រស់នៅដាណឺម៉ាក មុននឹងទៅធំធាត់នៅសហរដ្ឋអាម៉េរិក ដោយមានម្តាយជាជនជាតិស៊ុយអែត និងឪពុកជាជនជាតិអាម៉េរិក៕

ដោយ៖ វណ្ណលុក