ទូតថ្មីអាមេរិកប្ដេជ្ញាពង្រឹងទំនាក់ទំនងឱ្យរឹងមាំជាមួយកម្ពុជា
ឯកឧត្តម Christopher Anderson ឯកអគ្គរដ្ឋទូតអាមេរិកថ្មីប្រចាំព្រះរាជាណាចក្រកម្ពុជា បានជួបពិភាក្សាជាលើកដំបូងជាមួយសម្ដេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា នៅរាជធានីភ្នំពេញ នាព្រឹកថ្ងៃពុធទី១៨ ខែវិច្ឆិកា ២០២៦នេះ។ ក្នុងជំនួបនោះ ឯកអគ្គរដ្ឋទូតប្តេជ្ញាបន្តពូនជ្រុំទំនាក់ទំនង និងកិច្ចសហប្រតិបត្តិការអាម៉េរិក-កម្ពុជា ឱ្យកាន់តែរីកចម្រើន និងរឹងមាំថែមទៀត។
ឯកអគ្គរដ្ឋទូតសហរដ្ឋអាមេរិកថ្មី បានបង្ហាញសេចក្តីសោមនស្សរីករាយដោយបានមកបំពេញអាណត្តិបេសកកម្មការទូតនៅកម្ពុជា និងបានវាយតម្លៃខ្ពស់ចំពោះភាពរីកចម្រើននៃទំនាក់ទំនង និងកិច្ចសហប្រតិបត្តិការរវាងសហរដ្ឋអាមេរិក និងកម្ពុជា។ បើតាមឯកឧត្តម សហរដ្ឋអាមេរិក និងកម្ពុជានៅមានកាលានុវត្តភាពជាច្រើន ដើម្បីជំរុញកិច្ចសហប្រតិបត្តិការទ្វេភាគីឱ្យកាន់តែរីកចម្រើនថែមទៀត។
ក្នុងជំនួបនោះ ឯកឧត្តមឯកអគ្គរដ្ឋទូតក៏បានប្រាប់សម្ដេចធិបតីថា ឯកឧត្តមប្រធានាធិបតី ដូណាល់ ត្រាំ នៅតែបន្តយកចិត្តទុកចំពោះស្ថានភាពព្រំដែនកម្ពុជា-ថៃ ហើយសហរដ្ឋអាម៉េរិកនៅតែបន្តជំរុញការអនុវត្តសេចក្តីថ្លែងការណ៍រួម ទីក្រុងកូឡាឡាំពួ ថ្ងៃទី២៦ ខែតុលា ឆ្នាំ២០២៥។
ដោយឡែក សម្ដេចធិបតី ហ៊ុន ម៉ាណែត បានថ្លែងអំណរគុណចំពោះឯកឧត្តមប្រធានាធិបតី ដូណាល់ ត្រាំ ក៏ដូចជារដ្ឋាភិបាលសហរដ្ឋអាម៉េរិក ដែលបានជួយសម្របសម្រួលឱ្យមានបទឈប់បាញ់នាពេលកន្លងមកតាមរយៈសេចក្តីថ្លែងការណ៍រួមទីក្រុងគូឡាឡាំពួ ព្រមទាំងបន្តយកចិត្តទុកដាក់ចំពោះការកសាងសន្តិភាពរវាងកម្ពុជា និងថៃ និងការបន្តជំរុញការអនុវត្តនូវកិច្ចព្រមព្រៀងសន្តិភាពនេះឲ្យពេញលេញ។
សម្ដេចធិបតីក៏បានសម្តែងការពេញចិត្ត និងវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការដ៏ល្អរវាងប្រទេសទាំងពីរ និងបានគូសបញ្ជាក់ពីការបន្តពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរឱ្យកាន់តែរឹងមាំ និងស៊ីជម្រៅថែមទៀត។
ក្នុងជំនួបនោះដែរ សម្ដេចធិបតី និងឯកឧត្តមឯកអគ្គរដ្ឋទូតបានពិភាក្សាគ្នាលើការពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរ លើវិស័យសក្តានុពល រួមមាន៖ វិស័យសេដ្ឋកិច្ច ពាណិជ្ជកម្ម វិនិយោគ វិស័យការពារជាតិ និងសន្តិសុខ រួមទាំងកិច្ចសហប្រតិបត្តិការក្នុងការប្រយុទ្ធប្រឆាំងទៅនឹងឧក្រិដ្ឋកម្មឆ្លងដែន។
ស្ថានទូតអាមេរិកប្រចាំកម្ពុជា ក៏បានបញ្ជាក់ដែរថា នៅក្នុងជំនួបនោះ ឯកអគ្គរដ្ឋទូតថ្មីរបស់អាមេរិក បានចែករំលែកបទពិសោធន៍អំពីការហ្វឹកហ្វឺនក្នុងជួរកងទ័ពសហរដ្ឋអាមេរិក ដែលបានបន្ថែមភាពស្និទ្ធស្នាលផ្ទាល់ខ្លួនលើកិច្ចពិភាក្សានេះ និងបង្ហាញពីចំណងពិសេសរវាងមេដឹកនាំទាំងពីរ។ ឯកឧត្តមបានបញ្ជាក់ថា សហរដ្ឋអាមេរិកគោរពអធិបតេយ្យភាពរបស់កម្ពុជា និងជឿជាក់ថា ភាពជាដៃគូដ៏រឹងមាំកើតឡើងពីការគោរពគ្នាទៅវិញទៅមក នឹងត្រូវបានវាស់វែងតាមលទ្ធផលជាក់ស្តែង៕
សេង បារាំង AMS


