សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ និងជាប្រធានក្រុមការងារថ្នាក់ជាតិចុះជួយខេត្តសៀមរាប និងលោកជំទាវ នៅព្រឹកថ្ងៃទី២០ ខែមីនា ឆ្នាំ២០១៩ បានអញ្ជើញចុះសួរសុខទុក្ខ និងជួបសំណេះសំណាលជាមួយក្មួយៗកុមារ នៃវិទ្យាល័យអប់រំពិសេសសៀមរាប និងបានបរិភោគអាហាររួមគ្នា ជាការជួបជុំគ្នាសប្បាយមួយ សម្រាប់ឱកាសបុណ្យចូលឆ្នាំប្រពៃណីជាតិ ដែលនឹងឈានមកដល់នាពេលឆាប់ៗខាងមុខនេះ។

លោកស្រី ហុង ធារី នាយិកាវិទ្យាល័យអប់រំពិសេសសៀមរាប បានឲ្យដឹងថា បច្ចុប្បន្នវិទ្យាល័យមានអគារ សិក្សា១២ខ្នង មានបុគ្គលិក៤០នាក់ (ស្រី១៨នាក់) មានសិស្សគ ថ្លង់ និងពិការភ្នែក ចំនួន១៥៥នាក់ (ស្រី៦២នាក់)  ក្នុងនោះគ ថ្លង់ ១៣៥នាក់ ស្រី៥៥នាក់ ពិការភ្នែក២០នាក់ ស្រី០៧នាក់  ស្នាក់នៅក្នុងសាលា១០១នាក់ ស្រី២៨នាក់ផងដែរ។

សម្តេចពិជ័យសេនា ទៀ បាញ់ បានសម្តែងការអាណិតអាសូរចំពោះក្មួយៗកុមារគ ថ្លង់ និងពិការភ្នែក ពីកំណើត ដែលត្រូវបានទទួលការអប់រំ រៀនសូត្រ នៅតាមមជ្ឈមណ្ឌលចំណេះដឹងទូទៅ និង បច្ចេកទេស ក្រោមការយកចិត្តទុកដាក់ពីលោកគ្រូ អ្នកគ្រូ ដែលជាម្តាយទី២របស់ក្មួយៗ ហើយទាំងនេះក៏ត្រូវបានយកចិត្តទុកដាក់ពីប្រមុខរាជរដ្ឋាភិបាលកម្ពុជា ក្រោមកិច្ចដឹកនាំប្រកបដោយគតិបណ្ឌិតដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ព្រមទាំងថ្នាក់ ដឹកនាំគ្រប់លំដាប់ថ្នាក់ តែងបានធ្វើការផ្គត់ផ្គង់ជាប្រចាំខែដល់ក្មួយៗ។

សម្តេច ក៏បានធ្វើការកោតសរសើរចំពោះលោកគ្រូ អ្នកគ្រូ ដែលបានខិតខំបង្ហាត់បង្រៀនដល់ក្មួយៗទាំងអស់ រហូតបានរកនូវការងារជូនដល់សិស្សគថ្លង់ និងពិការភ្នែកបានធ្វើ នៅតាមបណ្តាក្រុមហ៊ុនឯកជន ក្នុងការរកនូវកម្រៃដោះស្រាយជីវភាពប្រចាំថ្ងៃរបស់ខ្លួន។ សម្តេចពិជ័យសេនា ក៏បានលើកនូវដំបូន្មានល្អៗមួយចំនួន សម្រាប់ក្មួយៗ ទាំងអស់ ត្រូវគោរពត្រង់ត្រាប់នូវដំបូន្មានរបស់លោកគ្រូ អ្នកគ្រូ នឹងចេះជួយនូវទុក្ខធុរះមិត្តភក្ត្រ ចេះស្រឡាញ់សាមគ្គីគ្នាឲ្យបានល្អ នៅក្នុងមជ្ឈមណ្ឌល ព្រមទាំងត្រូវខិតខំសិក្សារៀនសូត្រ និង ត្រូវជៀសឲ្យឆ្ងាយពីគ្រឿងញៀន ដែលសង្គមស្អប់ខ្ពើម។ 

សម្តេចពិជ័យសេនា ទៀ បាញ់ បានមានប្រសាសន៍លើកទឹកចិត្តដល់កុមារជនពិការគថ្លង់ទាំងអស់ កុំតូចចិត្ត និងភាពពិការរបស់ខ្លួន ត្រូវតស៊ូអត់ធ្មត់ប្រឹងប្រែងរៀនសូត្រឲ្យបានពូកែ មានចំណេះដឹងខ្ពស់ ដើម្បីចូលរួមអភិវឌ្ឍន៍ប្រទេសនៅថ្ងៃអនាគត ពីព្រោះជនពិការក៏មានសិទ្ធិធ្វើអ្វីៗបានដូចមនុស្សដែលមានកាយសម្បទានធម្មតាដែរ។ បច្ចុប្បន្នរាជរដ្ឋាភិបាលកម្ពុជា បានផ្តល់ឱកាសជាច្រើនដល់ជនពិការដែលមានចំណេះដឹង ឲ្យបានចូលបម្រើការងារនៅ តាមស្ថាប័នរដ្ឋ និងឯកជន។ ជាក់ស្តែង កុមារពិការ ដែលរស់នៅក្នុងសាលាកុមារគថ្លង់ និងពិការភ្នែកខេត្តសៀមរាប ក៏បានទទួលការងារនៅក្នុងស្ថាប័នរដ្ឋ និងក្រុមហ៊ុនឯកជនបន្តបន្ទាប់ហើយដែរ។

សូមបញ្ជាក់ថា សាលាកុមារគ ថ្លង់ និងពិការភ្នែកខេត្តសៀមរាបនេះ មានការជួយឧបត្ថម្ភគាំទ្រ ពីសំណាក់សម្តេចពិជ័យសេនា ទៀ បាញ់ និងលោកជំទាវ។ សម្តេច ក៏បានផ្តល់នូវអង្ករ៥តោន សម្រាប់៥ខែ ថវិកាថ្លៃភ្លើង១២ខែ ១២លានរៀល និងត្រីខ៥កេស មី២០កេស ទឹកក្រូច១០កេស ព្រមទាំងធ្វើការកសាងក្លោងទ្វារ១កន្លែង រៀបចំប្រព័ន្ធចម្រោះទឹកចេញពីអណ្តូង និងធ្វើការក្រាលការ៉ូឡាបំពេញទីធ្លាសាលា និងបានផ្តល់អំណោយដល់សិស្សដែលជាកុមារ គ ថ្លង់ ផងដែរ៕ធ.ដ

ដោយៈ ម៉ី សុខារិទ្ធ