កីឡាករក្បាច់គុនចម្រុះ Mc Gregor ត្រូវបានចាប់ខ្លួននៅ Miami សហរដ្ឋអាម៉េរិក បន្ទាប់ពីអ្នកគុនចម្រុះ UFC រូបនេះ ជាន់កម្ទេចទូរសព្ទអ្នកគាំទ្រម្នាក់ ដែលព្យាយាមថតរូបគេ។ ប៉ូលិស បានឲ្យដឹងថា កីឡាករគុនចម្រុះសញ្ជាតិអៀរឡង់ កំពុងត្រូវបានចោទប្រកាន់ពីបទប្រើអំពើហិង្សា និងបទល្មើសមជ្ឈិម។

ហេតុការណ៍នេះ បានកើតឡើងនៅពេលដែលកីឡាករវ័យ៣០ឆ្នាំរូបនេះ បានទះទម្លាក់ទូរសព្ទដៃរបស់អ្នកគាំទ្រម្នាក់ ដែលកំពុងព្យាយាមថតរូបគេ ឲ្យធ្លាក់រួចយកជើងជាន់ជាច្រើនដង ដើម្បីកម្ទេសចោល។ សូមរំលឹកថា Mc Gregor ធ្លាប់ត្រូវតុលាការឲ្យរៀនវគ្គគ្រប់គ្រងកំហឹង និងធ្វើការងារសហគមន៍រយៈពេល៥ថ្ងៃ ពីបទវាយប្រហារលើរថយន្តគូប្រកួត UFC៕ធ.ដ