លោក ពេជ្រ វិជ្ជាធរ ចៅក្រមស៊ើបសួរនៃសាលាដំបូងរាជធានីភ្នំពេញ បានសម្រេចបង្គាប់ឲ្យមន្ត្រីពន្ធនាគារ នាំជនជនសង្ស័យឈ្មោះ យិន ហេង ដែលមានរហស្សនាមថា «ចំប៉ី ខ្មៅ» ទៅពន្ធនាគារព្រៃ «ស» វិញដដែល បន្ទាប់ពីបើកការស៊ើបសួរពេញមួយព្រឹកថ្ងៃទី១៥ ខែកុម្ភៈ ឆ្នាំ២០១៩ ពាក់ព័ន្ធករណីបង្ហោះវីដេអូ លើបណ្តាញសង្គម Facebook ដោយប្រមាថជាតិសាសន៍ខ្មែរយ៉ាងធ្ងន់។ យោងតាមមន្ត្រីតុលាការ បានបញ្ជាក់ថា ជនជាប់ចោទ យិន ហេង ត្រូវបានលោក ពេជ្រ វិជ្ជាធរ សម្រេចឃុំខ្លួនបណ្តោះអាសន្នសិន នៅពន្ធនាគារព្រៃ «ស» ដោយរង់ចាំចាត់ការជំនុំជម្រះតាមនីតិវិធីបន្តទៀត តាមការចោទប្រកាន់របស់ព្រះរាជអាជ្ញា។

សូមបញ្ជាក់ថា ព្រះរាជអាជ្ញា លី សុផាណា បានចោទប្រកាន់ជនជាប់ចោទ យិន ហេង ពីបទ «ញុះញង់ឱ្យមានការរើសអើង» តាមមាត្រា៤៩៤ និងមាត្រា៤៩៦ នៃក្រមព្រហ្មទណ្ឌ ហើយបទល្មើសនេះ អាចមានទោសជាប់ពន្ធនាគារ ពី១ឆ្នាំ ទៅ៣ឆ្នាំ។

កាលពីរសៀលថ្ងៃទី០៦ ខែកុម្ភៈ នគរបាលខណ្ឌដូនពេញ បានបញ្ជូនខ្លួនឈ្មោះ យិន ហេង ទៅកាន់សាលាដំបូងរាជធានីភ្នំពេញ ដើម្បីប្រគល់ជូនតំណាងអយ្យការបើកការស៊ើបសួរ និងចោទប្រកាន់តាមផ្លូវច្បាប់ ក្នុងសំណុំរឿងបង្ហោះជាសាធារណៈ តាមបណ្តាញសង្គម Facebook ដោយបានជេរប្រមាថមកលើ ប្រជាពលរដ្ឋខ្មែរទូទាំងប្រទេស ក្នុងន័យមើលងាយមើលថោក សម្រាប់ប្រជាជាតិកម្ពុជាទាំងមូល។ យុវជនដែលជាភេទទី៣ ដែលល្បីក្នុងបណ្ដាញសង្គម Facebook ឈ្មោះ «ចំប៉ី ខ្មៅ» ត្រូវបានកម្លាំងនគរបាលឃាត់ខ្លួន នៅខណ្ឌដូនពេញ នាល្ងាចថ្ងៃទី០៥ ខែកុម្ភៈ ឆ្នាំ២០១៩នេះ ដោយកម្លាំងនាយកដ្ឋានប្រឆាំងបទល្មើសបច្ចេកវិទ្យា សហការជាមួយកម្លាំងនគរបាលខណ្ឌដូនពេញ និងស្នងការដ្ឋាននគរបាលរាជធានីភ្នំពេញ។

គួរជម្រាបដែរថា «ចំប៉ីខ្មៅ» បានបង្ហាញវីដេអូនៅលើបណ្ដាញសង្គម នៅខាងមុខព្រះបរមរាជវាំង ដោយប្រើប្រាស់នូវពាក្យពេចន៍ធ្ងន់ៗ ដោយប្រមាថទៅដល់ជាតិសាសន៍ខ្មែរ។ វីដេអូនោះ បានធ្វើឱ្យមានការខឹងសម្បារយ៉ាងខ្លាំង ពីសំណាក់ប្រជាពលរដ្ឋខ្មែរទូទាំងប្រទេស និងថ្កោលទោសឱ្យសមត្ថកិច្ច ចាត់ការចំពោះបុគ្គលភេទទី៣នេះផងដែរ។ ជនជាប់ចោទរូបនេះថា មូលហេតុដែលធ្វើឱ្យខ្លួនប្រមាថជាតិសាសន៍ខ្មែរ ដោយសារតែមានជនអនាមិគចំនួន៣នាក់ បានជិះម៉ូតូមកខោកក្បាលខ្លួនចំនួន៣ដង (៣ក្រញ៉) ដោយមិនដឹងមូលហេតុ។ ជនជាប់ចោទថា សកម្មភាពខោកក្បាលពីជនអនាមិគ បានធ្វើឱ្យខ្លួនមានការឈឺចាប់ជាខ្លាំង ក៏បង្កឲ្យខ្លួនបង្ហោះវីដេអូជេរប្រមាថខ្មែរ ព្រោះតែកំហឹងមួយឆាវតែម្តង៕ម.ន