ឯ,ឧ ថាច់ ឃន មានប្រសាសន៍ថា៖ មន្ត្រីអធិការកិច្ចត្រូវពង្រឹងសមត្ថភាព ដើម្បីធ្វើជាកំលាំងចលករដ៏រឹងមាំរបស់រាជរដ្ឋាភិបាលកម្ពុជា លើការកែទំរង់ឥតរាថយ ដើម្បីពង្រឹងអភិបាលកិច្ចល្អ
ក្នុងឱកាសបិទវគ្គបណ្តុះបណ្តាលជំនាញអធិការកិច្ចបឋម ស្តីពីមូលដ្ឋានគ្រឹះ នៃការងារអធិការកិច្ច កាលពីរសៀល ថ្ងៃសុក្រ ទី៣០ ខែវិច្ឆិកា ឯ,ឧ ថាច់ ឃន រដ្ឋលេខាធិការ និងជាតំណាង លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បានបញ្ជាក់ប្រាប់សិក្ខាកាមដែលបញ្ចប់វគ្គបណ្តោះបណ្តាលថា៖ មន្ត្រីអធិការកិច្ចត្រូវពង្រឹងសមត្ថភាព ដើម្បីធ្វើជាកំលាំងចលករដ៏រឹងមាំរបស់រាជរដ្ឋាភិបាលកម្ពុជា លើការកែទំរង់ឥតរាថយ ដើម្បីពង្រឹងអភិបាលកិច្ចល្អ ។ ដើម្បីសំរេចគោលដៅនេះ មន្ត្រីទាំងអស់ត្រូវតែមានភាពច្បាស់លាស់ ស្មោះត្រង់ និងការជឿជាក់លើសមត្ថភាព តាមរយៈនៃការបណ្តុះបណ្តាលទាំងក្នុងមូលដ្ឋានមានស្រាប់ និងសមាហរណកម្មនៅក្រៅប្រទេសផងដែរ ។ នេះបើតាមការឲ្យដឹងពីឯ,ឧ ណុប ចាន់ណារិន្ទ អ្នកនាំពាក្យ និងជាអនុរដ្ឋលេខាធិការ ក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការ នៅក្រោយបញ្ចប់ពីធិបិទវគ្គ នៅទីស្តីការក្រសួង ។
ឯ,ឧ ណុប ចាន់ណារិន្ទ បានឲ្យដឹងថា៖បើតាមរបាយការណ៍របស់លោកបណ្ឌិត សោម បូរ៉ាន់ នាយកវិទ្យាស្ថានជាតិអធិការកិច្ច នៃក្រួសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បញ្ជាក់ថាៈ វគ្គបណ្តុះបណ្តាលជំនាញអធិការកិច្ចបឋម ស្តីពីមូលដ្ឋានគ្រឹះនៃការងារអធិការកិច្ច បានចាប់ផ្តើមកាលពីព្រឹកថ្ងៃច័ន្ទ ទី២៦ ក្រោមអធិបតីភាព ឯ,ឧ បណ្ឌិត ចាប សុថារិទ្ធ រដ្ឋលេខាធិការ ហើយត្រូវបានបញ្ចប់នៅថ្ងៃសុក្រ ទី៣០ ខែវិច្ឆិកានេះ ដោយមានសិក្ខាកាមមកពីគ្រប់នាយកដ្ឋានចំណុះឲ្យអគ្គនាយកដ្ឋានអធិការកិច្ច និងមន្ទីរតាមបណ្តាខេត្ត រាជធានី ទាំងអស់ចំណុះឲ្យក្រសួងចំនួន៤៥នាក់ ដោយសិក្សានូវមេរៀនសំខាន់់ៗ ចំនួន៦ជាគន្លឹះ រួមមាន៖ ទស្សនៈទូទៅ នៃការការងារអធិការកិច្ច, ស្ថាប័នអធិការកិច្ច និងមន្ត្រីអធិការកិច្ច , ច្បាប់ និងលិខិតបទដ្ឋានក្នុងសកម្មភាពអធិការកិច្ច , ភារកិច្ច និងសិទ្ធអំណាចរបស់មន្ត្រីអធិការកិច្ច, បណ្តឹង និងបែបបទ នៃការដោះស្រាយបណ្តឹង ។
ក្នុងនាមលោកជំទាវកិត្តិសង្គហបណ្ឌិត ម៉ែន សំអន ឯ,ឧ ថាច់ ឃន បានថ្លែងអំណរដល់គ្រូឧទ្ទេសនាម ដែលបានខិតខំប្រឹងប្រែងបណ្តុះបណ្តាលដល់សិក្ខាកាម ក្នុងរយៈពេល៥ថ្ងៃកន្លងមកនេះ ។ ឯ,ឧថាច់ ឃន បន្តថាៈលទ្ធផលថ្ងៃនេះ ជាសមទ្ធិផលថ្មីមួយបន្ថែមទៀត ដែលបានកើតចេញពីការយកចិត្តទុកដាក់ពីលោកជំទាវ ឧបនាយករដ្ឋមន្ត្រី បើទោះជាក្រសួងមិនមានថវិកាគ្រប់គ្រាន់ ដើម្បីប្រើប្រាស់ក្នុងវគ្គបណ្តុះបណ្តាលបឋមនេះ ក៏ពិតមែន តែដើម្បីប្រសិទ្ធិភាពការងារ និងដើម្បីធ្វើឲ្យក្រសួងយើងសម្បូរទៅដោយធនធានមនុស្ស ដាច់ខាត លោកជំទាវ ម៉ែន សំអន ត្រូវតែខិតខំធ្វើឲ្យមានការបណ្តុះបណ្តាលនៅនឹងកន្លែងផង និងនៅក្រៅប្រទេសផងដែរ ។ ដូចនេះ សូមឲ្យមន្ត្រីយើងត្រូវយកចំណេះដឹងទាំងនេះ ទៅប្រើប្រាស់ឲ្យចំទឹសដៅ ដើម្បីធ្វើជាសេនាធិការឲ្យថ្នាក់ដឹកនាំក្រសួង ស្របតាមយុទ្ធសាស្ត្រចតុកោណរបស់រាជរដ្ឋាភិបាលកម្ពុជា ក្នុងអាណត្តិទី៦នេះ ឲ្យកាន់តែមានប្រសិទ្ធភាព និងកាន់តែមានជំនឿទុកចិត្តពីប្រជាជនយើងបន្ថែមទៀត ។ ក្នុងនោះមន្ត្រីយើងទាំងនៅថ្នាក់ក្រសួង និងនៅថ្នាក់រាជធានី ខេត្ត ត្រូវបន្តសកម្មភាព ដោយជំហរទទួលខុសត្រូវខ្ពស់ កុំស្ពឹកស្រពន់ ត្រូវចេះក្តាប់ព័ត៌មានឲ្យបានគ្រប់ជ្រុងជ្រោយ ដើម្បីរាយការណ៍ជូនថ្នាក់ដឹកនាំពិនិត្យសំរេច ពិសេសអនុសាសន៍របស់សម្តេចតេជោ ហ៊ុន សែន ដែលទាក់ទងទៅនឹងស្ថាប័នយើង ដើម្បីចុះជួយប្រជាជនឲ្យបានទាន់ពេលវេលា៕
