តុលាការសម្រេច ដោះលែង លោក កឹម សុខា ឲ្យនៅក្រៅឃុំបណ្តោះអាសន្ន
លោក កឹម សុខា អតីតប្រធានគណបក្សសង្គ្រាះជាតិ ដែលត្រូវតុលាការឃុំខ្លួនអស់រយៈពេលជាងមួយឆ្នាំ នៅព្រឹកថ្ងៃទី១០ ខែកញ្ញា ឆ្នាំ២០១៨នេះ ត្រូវបានដោះលែងមកដល់ផ្ទះក្នុងខណ្ឌទួលគោកហើយ នាវេលាជិតភ្លឺ។ លោក ចាន់ ចេង មេធាវីការពារសិទ្ធិលោក កឹម សុខា បានបញ្ជាក់ប្រាប់នៅមុននេះបន្តិចថា កូនក្តីរបស់លោកបានមកដល់គេហដ្ឋានហើយ នៅក្នុងខណ្ឌទួលគោក នាវេលាជិតភ្លឺនេះ។
លោកមានប្រសាសន៍បញ្ជាក់យ៉ាងខ្លីថា «ក្រុមគ្រួសារបញ្ជាក់ថា គាត់មកដល់ផ្ទះហើយ។ អ្នកយកទៅ គឺជាអ្នកយកមកវិញ»។លោកមេធាវី ចាន់ ចេន មិនអាចបញ្ជាក់ថា ការដោះលែងពិតជាឲ្យមានសេរីភាពពេញ ឬត្រូវបន្តឃុំខ្លួននៅក្នុងផ្ទះឡើយ ដោយសារលោកមិនទាន់បានជួបកូនក្តីផ្ទាល់។
ចំណែកមួយទៀត ដែលសុំមិនបញ្ចេញឈ្មោះបានអះអាងថា លោក កឹម សុខា នឹងត្រូវឃុំខ្លួននៅគេហដ្ឋានរបស់លោក ក្នុងខណ្ឌទួលគោក រាជធានីភ្នំពេញ ជាទីដែលកម្លាំងនគរបាលក្រសួងមហាផ្ទៃចាប់ខ្លួន កាលពីឆ្នាំមុន។
លោក កឹម សុខា អាយុ៦៤ឆ្នាំ ត្រូវបានចៅក្រមសាលាដំបូងរាជធានីភ្នំពេញ ចោទប្រកាន់ពីបទសន្ធិដ្ឋិភាពជាមួយបរទេស តាមមាត្រា៤៤៣នៃក្រមព្រហ្មទណ្ឌ ដែលចែងឲ្យផ្តន្ទាទោសដាក់ពន្ធនាគារពី១៥ឆ្នាំ ដល់៣០ឆ្នាំ សម្រាប់អំពើត្រូវរ៉ូវគ្នាដោយសម្ងាត់ជាមួយរដ្ឋបរទេស ឬភ្នាក់ងារបរទេស ដើម្បីបង្កើតឲ្យមានអំពើប្រទូសរ៉ាយ ឬឲ្យមានអំពើឈ្លានពានប្រឆាំងនឹងព្រះរាជាណាចក្រកម្ពុជា។
លោកត្រូវបាននគរបាលព្រហ្មទណ្ឌចាប់ខ្លួន កាលពីពាក់កណ្តាលអធ្រាត្រ ឈានចូលថ្ងៃទី៣ ខែកញ្ញា ឆ្នាំ២០១៧ ហើយត្រូវបានបញ្ជូនទៅឃុំខ្លួននៅក្នុងពន្ធនាគារត្រពាំងផ្លុង ខេត្តត្បូងឃ្មុំ។
កាលពីថ្ងៃទី២៧ ខែមីនា ឆ្នាំ២០១៨ ចៅក្រមសាលាឧទ្ធរណ៍ ដោយមិនមានវត្តមានលោក កឹម សុខា បានតម្កល់ទុកសេចក្តីសម្រេចរបស់ចៅក្រមស៊ើបសួរនៃសាលាដំបូងរាជធានីភ្នំពេញ ដែលបានពន្យារពេលឃុំខ្លួនលោករយៈពេល៦ខែទៀត។ លោក កឹម សុខា បានស្នើសុំតុលាការឲ្យដោះលែងនៅក្រៅឃុំជាច្រើនលើក ប៉ុន្តែត្រូវបដិសេធ៕
