ភ្នំពេញ៖ រដ្ឋមន្រ្តីក្រសួងសុខាភិបាលអះអាង នៅថ្ងៃទី៩ ខែកញ្ញា ឆ្នាំ២០១៨ថា ស្ថាបនិកមន្ទីរពេទ្យ គន្ធបុប្ផា លោកវេជ្ជបណ្ឌិត Beat Richner បានទទួលមរណភាពហើយ បន្ទាប់លោកបានធ្លាក់ខ្លួនឈឺ  រយៈពេលជាយូរមកហើយ។ លោកទទួលមរណភាពនៅវេលាម៉ោង២៖៤៥នាទីព្រឹកថ្ងៃទី០៩ ខែកញ្ញា ឆ្នាំ២០១៨ ក្នុងជន្មាយុ៧១ឆ្នាំ នៅប្រទេសស្វីស។

លោករដ្ឋមន្រ្តីក្រសួងសុខាភិបាល សូមចូលរួមរំលែកទុក្ខយ៉ាងក្រៀមក្រំជាទីបំផុត ចំពោះការទទួលមរណភាពរបស់លោកវេជ្ជបណ្ឌិត Beat Richner។ ឯកឧត្តម ម៉ម ប៊ុនហេង រដ្ឋមន្រ្តី​ក្រសួងសុខាភិបាល ក៏បានប្រកាសថា​ ក្រសួងសុខាភិបាល កំពុងគិតគូររៀបចំពិធីគោរពវិញ្ញាណក្ខន្ធសព​លោកសាស្រ្តាចារ្យ​ វេជ្ជបណ្ឌិត​ Beat Richner ដើម្បីសម្តែងនូវការគោរពចំពោះគាត់​ ដែលធ្លាប់បានជួយដល់កុមារកម្ពុជាកន្លងមក ពិធិគោរពវិញ្ញាណក្ខន្ធសពរបស់ ឯកឧត្តមសាស្រ្តាចារ្យ​ វេជ្ជបណ្ឌិត​ Beat Richner នឹងប្រព្រឹត្តទៅនៅទីស្តីការក្រសួងសុខាភិបាល នៅថ្ងៃទី១០​ ខែកញ្ញា​ ឆ្នាំ២០១៨​ វេលាម៉ោង៣រសៀល​។ ដោយឡែកនៅមន្ទីរពេទ្យគន្ធបុប្ផា​ ក៏មានរៀបចំពិធីគោរពវិញ្ញាក្ខន្ធគាត់នៅបណ្ណាល័យក្នុងបរិវេណមន្ទីរពេទ្យគន្ធបុប្ផាផងដែរ។

មរណភាពរបស់បិតាសង្គ្រោះកុមារកម្ពុជា ធ្វើនាំឲ្យប្រជាពលរដ្ឋខ្មែរនឹកស្តាយស្រណោះអាឡោះអាល័យយ៉ាងខ្លាំងចំពោះរូបលោក ក៏ដូចជាទង្វើប្រកបដោយគុណធម៌របស់លោក។ បន្ទាប់បានធ្លាក់ខ្លួនឈឺអស់ជាច្រើនខែ លោកវេជ្ជបណ្ឌិត Beat Richner បានទទួលមរណភាពក្នុងជន្មាយុជន្មាយុ៧១ឆ្នាំ នៅប្រទេសស្វីស ដែលជាប្រទេសកំណើតរបស់លោក។ បើទោះបីជាគ្មានឈាមជ័រជាខ្មែរ លោកវេជ្ជបណ្ឌិត Beat Richner បានចំណាយពេលស្ទើរតែពាក់កណ្តាលជីវិត ចុងក្រោយរបស់លោក ដើម្បីកុមារកម្ពុជា។

ក្នុងឱកាសដ៏ក្រៀមក្រំនេះដែរ ក្រុមការងារអគ្គនាយកដ្ឋាន ទូរទស្សន៍ និងវិទ្យុអប្សរា ក៏សូមចូលរួមរំលែកទុក្ខយ៉ាងក្រៀមក្រំជាទីបំផុត ចំពោះការទទួលមរណភាពរបស់លោកបិតាស្ថាបនិក គន្ធបុប្ផា ដែលជាបេះដូងរបស់ប្រជាជនកម្ពុជា៕