អ៊ីរ៉ង់៖ រដ្ឋមន្ត្រីការពារជាតិអ៊ីរ៉ង់លោក ម៉ូហាំម៉ាត់ អាមៀ ខាតាមី ថ្លែងថា ចាប់តាំងពីឆ្នាំ២០១៩មកម្ល៉េះ ប្រទេសជាច្រើនមកហើយបានទាក់ទងយើង ពាក់ព័ន្ធនឹងវិស័យយោធា ហើយជាការឆ្លើយតបវិញ យើងក៏បានរៀបចំកិច្ចចរចាជាមួយប្រទេសទាំងនោះមួយចំនួនរួចមកហើយដែរ… ជាការពិតណាស់ យើងនឹងលក់អាវុធឲ្យបានច្រើនជាងការទិញអាវុធ នេះបើតាមសារព័ត៌មានស្ពូតនីគនៅថ្ងៃទី១៩ ខែតុលា ឆ្នាំ២០២០ ។

ទណ្ឌកម្មអាវុធរយៈពេល១៣ឆ្នាំទៅលើអ៊ីរ៉ង់បានឈានដល់ទីបញ្ចប់ទៅហើយ ខណៈទីក្រុងតេហេរ៉ង់ត្រូវបានគេមើលឃើញថា កំពុងត្រៀមខ្លួនទិញ និងលក់សព្វា វុធឡើងវិញក្នុងទ្រង់ទ្រាយធំមិនធ្លាប់មាន ។ ទន្ទឹមគ្នានេះ អ៊ីរ៉ង់ក៏បានអួតអាងផងដែរថា ប្រទេសរបស់ខ្លួននៅតែអាចអភិវឌ្ឍវិស័យយោធា និងសព្វាវុធឲ្យកាន់តែប្រសើរឡើង បើទោះបីជាស្ថិតនៅក្នុងអំឡុងពេលដែលខ្លួនកំពុងជាប់ទណ្ឌកម្ម ។

ទោះបីជាយ៉ាងណាក៏ដោយ សហរដ្ឋអាមេរិកនៅតែបញ្ជាក់ជំហររបស់ខ្លួនថា នឹងដាក់ទណ្ឌកម្មជាឯកតោភាគីទៅលើក្រុមហ៊ុន ឬក៏បុគ្គលទាំងឡាយណា ដែលបានចូលរួមពាក់ព័ន្ធនឹងការទិញ-លក់អាវុធជាមួយអ៊ីរ៉ង់ ៕