UN ស្នើក្រុមហ៊ុនអាកាសចរចំនួន៤០ ដឹកវ៉ាក់សាំងកូវីដ១៩ទៅចែកឲ្យប្រទេសក្រីក្រខ្លាំង
អង្គការសហប្រជាជាតិកំពុងស្វែងរកកិច្ចសហប្រតិបត្តិការជាមួយបណ្តាក្រុមហ៊ុនអាកាសចរប្រមាណ៤០ក្រុមហ៊ុន ក្នុងការជួយដឹកជញ្ជូនវ៉ាក់សាំងប្រឆាំងកូវីដ១៩ ទៅផ្តល់ជូនបណ្តាប្រទេសក្រីក្រខ្លាំង ក្នុងពិភពលោក។
ទីភ្នាក់ងារ Unicef នៃអង្គការសហប្រជាជាតិ (UN) ថ្មីៗនេះ បានទាក់ទងតាមទូរស័ព្ទក្រុមហ៊ុនទាំងនេះ ដើម្បីដឹងច្បាស់ថា តើការដឹកជញ្ជូនវ៉ាក់សាំងទាំងនេះនឹងត្រូវចរចារៀបចំបែបណា នេះបើតាម Glyn Hughes ប្រធានផ្នែកដឹកជញ្ជូនទំនិញនៃសមាគមដឹកជញ្ជូនតាមអាកាសអន្តរជាតិ ដែលបានចូលរួមរៀបចំកិច្ចប្រជុំនេះដែរ។
Unicef ដែលពេលនេះក្លាយជាអ្នកទិញវ៉ាក់សាំងដ៏ច្រើនបំផុតក្នុងពិភពលោកនោះ កំពុងប្រឹងប្រែងក្នុងការទិញ និងចែកចាយវ៉ាក់សាំងកូវីដ១៩ ដល់ប្រទេសជិត១០០ប្រទេស ក្រោមមូលនិធិនៃកម្មវិធី GAVI ដែលមានកិច្ចសហការជាមួយរដ្ឋាភិបាលប្រទេសទាំងនោះ អង្គការសុខភាពពិភពលោក និងធនាគារពិភពលោក៕
