ថៃ៖ បាតុករចាត់ទុកការគំរាមរបស់នាយករដ្ឋមន្ត្រី ជាការប្រកាសសង្គ្រាមប្រឆាំងប្រជាជនឯង
ក្រុមបាតុករប្រឆាំងរាជរដ្ឋាភិបាលនៅប្រទេសថៃបានប្រកាសច្រានចោលការគំរាមរបស់នាយករដ្ឋមន្ត្រី ប្រាយុទ្ធ ចាន់អូចា ហើយបានជំរុញដល់ក្រុមរបស់ខ្លួនកុំចុះចាញ់។ ក្រុមបាតុករហៅខ្លួនឯងថា Free Youth គាំទ្រលទ្ធិប្រជាធិបតេយ្យបានអះអាង តាមបណ្តាញសង្គមថា ការគំរាមកំហែងរបស់លោកប្រាយុទ្ធក៏រួមមានទាំងការប្រើច្បាប់ប្រមាថស្តេចមកធ្វើបាបបាតុករដែរ ខណៈពួកគេក៏ចង់ឲ្យមានកែប្រែរបបរាជានិយមដែរនោះ។ ពួកបាតុករបានចាត់ទុកការគំរាមរបស់លោក ប្រាយុទ្ធ គឺជាការប្រកាសសង្គ្រាមរបស់រដ្ឋាភិបាលលើប្រជាជន។
កាលពីថ្ងៃទី១៩ វិច្ឆិកាម្សិលមិញ លោក ប្រាយុទ្ធ ដែលត្រូវបានពួកបាតុករទាមទារឲ្យចុះចេញពីតំណែងនោះ បានប្រកាសថា រដ្ឋាភិបាលរបស់លោកនឹងប្រើប្រាស់គ្រប់ទិដ្ឋភាពច្បាប់ទាំងអស់ ក្នុងការទប់ទល់ប្រឆាំងនឹងពួកបាតុករ ហើយភ្នាក់ងារសន្តិសុខនឹងបង្កើនកម្លាំងដោះស្រាយចំពោះនរណាដែលធ្វើរឿងខុសច្បាប់ និងមិនគោរពសិទ្ធិសេរីភាពរបស់អ្នកផ្សេង។
ការគំរាមនេះកើតឡើង ក្រោយ២ថ្ងៃដែលពួកបាតុករបានគូសលើជញ្ជាំងរបស់ទីស្នាក់ការនគរបាល នៅរាជធានីបាងកក បង្ហាញពីខ្លឹមសារសងសឹកនឹងការបង្ក្រាបដោយឧស្ម័នបង្ហៀរទឹកភ្នែក និងកាំភ្លើងបាញ់ទឹក របស់នគរបាល កាលពីថ្ងៃអង្គារ៍ សប្តាហ៍នេះ នៅមុខរដ្ឋសភា របួសមនុស្សជាង៥០នាក់៕ ប្រភពពី The Nation
