កំពង់ឆ្នាំង៖ ប្រជាពលរដ្ឋដែលងាយរងគ្រោះចំនួន៤៥គ្រួសារ បានទទួលអំណោយមនុស្សធម៌របស់កាកបាទក្រហមកម្ពុជា។ ពិធីនេះបានធ្វើឡើងនៅថ្ងៃទី១១ ខែមិថុនា ឆ្នាំ២០២០ ក្រោមអធិបតីភាពអភិបាលរងខេត្តកំពង់ឆ្នាំង និងជាប្រធានគណៈកម្មាធិការសាខាកាកបាទក្រហមខេត្តកំពង់ឆ្នាំងលោក អម សុភា រួមដំណើរជាមួយដោយលោកជំទាវ ប៊ន  សុភី អនុប្រធានគណៈកម្មាធិការសាខា លោក ប្រាក់ សោភ័ណ្ឌ នាយកប្រតិបត្តិ
សាខាកាកបាទក្រហមខេត្ត លោកលោកស្រីសមាជិកគណៈកម្មាធិការសាខា ថ្នាក់ដឹកនាំអនុសាខាកាកបាទក្រហមកម្ពុជាស្រុកបរិបូណ៌
បានចុះសាកសួរសុខទុក្ខ និងនាំយកអំណោយមនុស្សធម៌កាកបាទក្រហមកម្ពុជា ចែកជូនដល់គ្រួសារងាយរងគ្រោះក្នុងឃុំត្រពាំងចាន់ចំនួន ៤៥គ្រួសារ ក្នុងនោះនៅតំបន់ក្រចាប់ ចំនួន ២៦គ្រួសារ និង ភូមិក្បាលដំរីចំនួន ១៩គ្រួសារ ស្ថិតក្នុងឃុំត្រពាំងចាន់ ស្រុកបរិបូណ៌ ខេត្តកំពង់ឆ្នាំង ។

មានប្រសាសន៍នៅក្នុងឱកាសនោះ អភិបាលរងខេត្តកំពង់ឆ្នាំងលោក អម សុភា ក៏បានពាំនាំនូវប្រសាសន៍ផ្ដាំផ្ញើសាកសួរសុខទុក្ខរបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា  កន្លងមកសម្តេចតែងតែយកចិត្តទុកដាក់គិតគូរអំពីសុខទុក្ខ ការលំបាករបស់បងប្អូនប្រជាពលរដ្ឋដែលជួបការលំបាក ដោយមិនប្រកាន់ពូជសាសន៍ និងនិន្នាការនយោបាយឡើយ។

អភិបាលរងខេត្តកំពង់ឆ្នាំងលោក អម សុភា ក៏បានសំណូមពរ និងណែនាំដល់ប្រជាពលរដ្ឋទាំងអស់ត្រូវចេះថែរក្សាសុខភាព ការពារខ្លួន ពី ជំងឺកូវីដ១៩ ដោយត្រូវរក្សាអនាម័យ ការរស់នៅស្អាត ហូបស្អាត ផឹកស្អាត និងរក្សាគម្លាតសុវត្ថិភាពតាមការណែនាំរបស់រាជរដ្ឋាភិបាល ក៏ដូចជា ក្រសួងសុខាភិបាលអំពី វិធានការការពារជីវិតពីជំងឺដ៏កាចសាហាវមួយនេះ ។ អំណោយដែលគ្រួសារនីមួយៗ ទទួលបានរួមមានៈអង្ករ ២៥ គីឡូក្រាម មី ១ កេស ត្រី ខ កំប៉ុង ឃីត ១ កញ្ចប់ មាន សារ៉ុង ១ ក្រម៉ា ១ មុង ១ ភួយ  ១ ទឹកជែលលាងដៃ ១ ដប ម៉ាស់ ១ និងថវិកា ២០០០០រៀល ហើយអភិបាលរងខេត្ត បានចែកថវិកា ដល់កុមារ តូច ជាច្រើននាក់ផងដែរ៕ ដោយ៖ សុក្ខារិន