លោក ជា រិទ្ធ បោះបង់អាជីពជាគ្រូបង្រៀន នៅមហាវិទ្យាល័យ ងាកធ្វើគ្រូប្រដាល់ដើម្បីជួយលើកស្ទួយគុនខ្មែរ
អតីតអ្នកប្រដាល់គុនខ្មែរក្នុងទស្សវតន៍៩០ លោក ជា រិទ្ធ ងាកមកចូលរួមចំណែកអភិវឌ្ឍលើកស្ទួយវិស័យកីឡាគុនខ្មែរ ធ្វើជាគ្រូជំនួយក្រុមជម្រើសរើសជាតិ និងជាអនុគណៈកម្មការមន្ត្រីចៅក្រមសហព័ន្ធកីឡាប្រដាល់គុនខ្មែរ ដោយលោកសុខចិត្តលះបង់អាជីពជាគ្រូបង្រៀនភាសាអង់គ្លេស នៅមហាវិទ្យាល័យ ។
លោក ជា រិទ្ធ បានអះអាងថា មុនមកកាន់តំណែងជាគ្រូជំនួយក្រុមជម្រើសជាតិ លោកគឺជាម្ចាស់ក្លិបប្រដាល់មួយ និងជាគ្រូបង្រៀនភាសាអង់គ្លេស នៅសកលវិទ្យាល័យ៤ នៅខេត្តសៀមរាប ។ អតីតអ្នកប្រដាល់រូបនេះ អះអាងទៀថា កក្តាដែលជម្រុញលោកសម្រេចចិត្តបោះបង់អាជីពជាគ្រូបង្រៀន ងាកមកជួយអភិវឌ្ឍលើកស្ទួយ និងអភិរក្សវិស័យកីឡាគុនខ្មែរ ជាកីឡាអត្តសញ្ញាណជាតិ ជាពិសេស លោកចង់ចែករំលែកចំណេះដឹងលើកីឡាបូរាណមួយនេះ តាមរយៈការស្រាវជ្រាវអ្វីដែលជាច្បាប់លក្ខន្តិកៈថ្មីៗ នៅអន្តរជាតិ មកកែប្រែជួយឲ្យគុនខ្មែររីកចំរើន ។
សូមបញ្ជាក់ថា លោក ជា រិទ្ធ គឺជាអតីតអ្នកប្រដាល់គុនខ្មែរមួយរូប ក្នុងអំឡុងឆ្នាំ១៩៩៦ និង១៩៩៧ ដែលកាលនោះ លោកឡើងសង្វៀនដើម្បីស្វែងរកប្រាក់ផ្គត់ផ្គង់ការសិក្សា រហូតបញ្ចប់សញ្ញាបត្រអនុបណ្ឌិត លោកក៏បានក្លាយជាគ្រូបង្រៀនភាសាអង់គ្លេស នៅមហាវិទ្យាល័យ ដោយសម្រេចចិត្តសម្រាកពីអាជីពប្រដាល់មួយរយៈធំ ។ ប៉ុន្តែក្រោយមក ជា រិទ្ធ ក៏ចាប់យកអាជីពចាស់វិញ គឺចាប់ផ្តើមបង្ហាត់ប្រដាល់គុនខ្មែរ និងកាន់តំណែងជាប្រធានក្លិបគុហារព្រហ្មជ័យ ដោយសហព័ន្ធកីឡាប្រដាល់គុនខ្មែរ មើលឃើញពីសមត្ថភាព និងចំណេះដឹងបង្ហាត់គុនខ្មែរ ជាពិសេសផ្នែកភាសាអង់គ្លេសទើប សហព័ន្ធសម្រេចតែងតាំង លោកជាអនុគណៈកម្មការមន្ត្រីចៅក្រម និងជាគ្រូជំនួយក្រុមជម្រើសជាតិ ទទួលបន្ទុកជាមន្រ្តីទំនាក់ទំនងអន្តរជាតិផងដែរ៕
