កីឡាករគុនចម្រុះកម្ពុជា ចាន់ រតនា ត្រូវបានសង្វៀនកម្រិតពិភពលោក One Championship ផ្តល់ឱកាសឲ្យឡើងសង្វៀន នៅពេលខាងមុខ ពីព្រោះជំនួប ចាន់ រតនា និងកីឡាករចិន XIE WEI ក្លាយជាគូជក់ចិត្ត ដែលមានអ្នកគាំទ្រទស្សនាច្រើនជាងគេ នៅផេកផ្លូវការរបស់ One Championship កាលពីថ្ងៃទី១៨ ខែធ្នូ ឆ្នាំ២០២០ នៅសង្វៀន INDOOR STADIUM ក្នុងកម្មវិធីប្រដាល់ COLLISION COURSE នាប្រទេសសិង្ហបុរី ។

នេះបើតាមការអោយដឹងពី One Championship តាមរយៈយូធូប ផ្លូវការរបស់ One កាលពីថ្ងៃម្សិលមិញ បន្ទាប់ពី កីឡាករ ចាន់ រតនា ចូល Comment សុំទោស ជាមួយ Sticker ទង់ជាតិខ្មែរ ហើយត្រូវបានស្ថាប័ន One Championship តបថា អ្នកនិងត្រូវត្រលប់មកវិញ ជាក់ជាមិនខាននាពេលឆាប់ៗខាងមុខនេះ (You Will Be Back For One Championship) ។ ទោះជាយ៉ាងដំណឹងនេះមិនទាន់ផ្លូវការនៅឡើយទេ វាគ្រាន់តែពាក្យឆ្លើយតប នៅក្នុងយូធូបផ្លូវការរបស់ One Championship ប៉ុណ្ណោះ ហើយក៏មិនដឹងថាត្រូវប្រកួតជាមួយកីឡាករចិនដដែល ឬកីឡាកររូបណា និងប្រកួតនៅពេលណានោះឡើយទេ ។

គួររំលឹកថា អ្នកលេងគុនចម្រុះកម្ពុជា ចាន់ រតនា បានចាញ់កីឡាករចិន XIE WEIនៅទឹកទី៣ កាលពីថ្ងៃទី១៨ ខែធ្នូ ឆ្នាំ២០២០ នាសង្វៀន INDOOR STADIUM ក្នុងកម្មវិធីប្រដាល់ COLLISION COURSE នៅប្រទេសសិង្ហបុរី ។

សូមបញ្ជាក់ថា កីឡាករ ចាន់ រតនា បានបង្ហាញវត្តមាន១១លើក នៅសង្វៀនលំដាប់ ពិភពលោក ONE CHAMPION SHIP ដោយឈ្នះ៧ ចាញ់៤ ប្រកួតចុងក្រោយចាញ់កីឡាករចិន ៕