កីឡាការិនីបាល់ទាត់ស្រស់ស្អាត តាំង មករា សម្រួចការហ្វឹកហាត់អភិវឌ្ឍខ្លួន ចង់ក្លាយជាជម្រើសជាតិបាល់ទាត់នារី
កីឡាការិនីស្រស់ស្អាត តាំង មករា បច្ចុប្បន្នកំពុងតែប្រកបអាជីពជាកីឡាការិនីបាល់ទាត់លេងឲ្យក្លិបល្បីឈ្មោះភ្នំពេញក្រោន បានបង្ហាញការតាំងចិត្តខ្ពស់ថា នឹងខិតខំសម្រួចការហ្វឹកហាត់ ដើម្បីអភិវឌ្ឍសមត្ថភាពឈោងចាប់យកកៅអីជាកីឡាការិនីជម្រើសជាតិបាល់ទាត់ លេងតំណាងឲ្យកម្ពុជា នៅស៊ីហ្គេម ឆ្នាំ២០២៣ ដែលកម្ពុជាធ្វើជាម្ចាស់ផ្ទះ ។
កីឡាការិនីរូបស្រស់ មានប្រភពចេញពីយុវជនថ្នាលខេត្តបាត់ដំបង តាំង មករា បង្ហើបទៀតថា ជំហានដំបូងក្នុងអាជីពបាល់ទាត់ គឺចង់ក្លាយជាជម្រើសជាតិបាល់ទាត់នារី លេងតំណាងឲ្យកម្ពុជា នឹងក្តីស្រម៉ៃបន្ទាប់ទៀត គឺចង់ទៅប្រកបអាជីពឲ្យក្លិបបាល់ទាត់ប្រទេសជិតខាង ដើម្បីបង្ហាញអន្តរជាតិថា បាល់ទាត់នារីកម្ពុជា ក៍មានសក្តានុពលដែរ ។ ទន្ទឹមជាមួយគ្នានេះ តាំង មករា បានអំពាវនាវឲ្យយុវតីកម្ពុជា បង្ហាញភាពក្លាហានលេងកីឡាដើម្បីសុខភាព និងបំផុសឲ្យនារីៗលេងបាល់ទាត់អោយកាន់តែមានសកម្មភាពផុសផុលដូចបាល់ទាត់បុរស ។ ក្នុងនាមជាកីឡាការិនីបាល់ទាត់មួយរូប ធ្លាប់ជម្នះការរារាំងពីសំណាក់ក្រុមគ្រួសារ ចូលប្រឡុកក្នុងជាអាជីពបាល់ទាត់នារី មករា ក៏បានសំណូមពរដល់អាណាព្យាបាលសូមអោយកូនៗលេងបាល់ទាត់ និងលើកទឹកចិត្តដើម្បីសម្រេចក្តីស្រម៉ៃ របស់កូនៗគ្រប់រូប ។
គួររំលឹកថា កីឡាការិនីបាល់ទាត់ តាំង មករា មុនឈានជើងចូលក្នុងក្លិបបាល់ទាត់ល្បីឈ្មោះភ្នំពេញក្រោន គឺជាយុវជនថ្នាលលេងឲ្យក្លិបអង្គការមួយ នៅខេត្តបាត់ដំបង តួនាទីជាខ្សែបំរើ និងការពារល្អ ត្រូវក្លឹបភ្នំពេញក្រោន សម្រេចជ្រើសរើសចូលក្លិប ក្នុងឆ្នាំ២០១៩ និងឆ្នាំ២០២០ លេងពានរង្វាន់បាល់ទាត់លីគនារី ដែលរៀបចំដោយសហព័ន្ធបាល់ទាត់កម្ពុជាជាលើកដំបូង ។
សូមបញ្ជាក់ថា កីឡាការិនីបាល់ទាត់នារី តាំង មករា នាងជាកូនអ្នកបាត់ដំបង មានបងប្អូនចំនួន៤នាក់ នាងគឺជាកូនពៅក្នុងគ្រួសារ ហើយបានចូលប្រឡូកជាកីឡាការិនីបាល់ទាត់ តាំងពីអាយុ១២ឆ្នាំមកម្ល៉េះ ៕
