ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានចេញអនុក្រឹត្យសម្រេចកែសម្រួលអត្រាអាករពិសេស លើមុខទំនិញរថយន្តមួយចំនួន។

ការបញ្ចុះអត្រាអាករពិសេស ទៅតាមប្រភេទរថយន្តដូចខាងក្រោម៖

* រថយន្តគ្រួសារ៖ បញ្ចុះអត្រាអាករពិសេស ១០ពិន្ទុភាគរយ ចំពោះរថយន្តទំហំស៊ីឡាំងមិនលើសពី ៣០០០cc (ពី៣០% មក២០% និងពី៦០%មក ៥០%) ព្រមទាំងបញ្ចុះអត្រាអាករពិសេស ១៥ពិន្ទុភាគរយ ចំប្រភេទទំហំស៊ីឡាំងលើសពី ៣០០០cc (ពី៦៥% មក ៥០% និងពី៧០% មក ៥៥%)

* រថយន្តប្រើអគ្គិសនីសុទ្ធ (រថយន្តគ្រួសារ និងរថយន្តដឹកអ្នកដំណើរ)៖ បញ្ចុះអត្រាអាករពិសេស ២០ពិន្ទុភាគរយ (ពី៣០%មក១០%) ដើម្បីកាត់បន្ថយចំណាយ និងជួយការពារបរិស្ថាន។

* រថយន្តដឹកទំនិញ៖ បញ្ចុះអត្រាអាការពិសេស១៥ពិន្ទុភាគរយ (ពី៤០%មក ២៥%) ចំពោះរថយន្តសណ្តោងសឺមីរ៉ឺម៉ក ព្រមទាំងបញ្ចុះអត្រាអាករពិសេស១០ពិន្ទុភាគរយ (ពី៤០%មក៣០%) ចំពោះរថយន្តដឹកទំនិញប្រភេទដែលមាន ទម្ងន់សរុប (ទម្រងរថយន្ត និងទម្ងន់ផ្ទុក) លើសពី៥តោន។ ការបញ្ចុះតម្លៃអត្រាអាករពិសេសលើរថយន្តដឹកទំនិញ នឹងរួមចំណែកក្នុងការកាត់បន្ថយចំណាយឡូជីស្ទីក។

* រថយន្តបែន រថយន្តស្ទូច និងរថយន្តឯកទេសផ្សេង៖ បញ្ចុះអត្រាអាករពិសេស ១០ពិន្ទុភាគរយ (ពី៤០% មក៣០%) ដើម្បីជួយដល់វិស័យកសាងហេដ្ឋារចនាសម្ព័ន្ធរូបវន្ត និងឡូជីស្ទីក។

ឆ្នាំ២០២០ អគ្គនាយកដ្ឋានគយ និងរដ្ឋាករប្រមូលចំណូលបាន ២៤១៩.៦លានដុល្លារ ធ្លាក់ចុះ៣៤ភាគរយ បើធៀបនឹងឆ្នាំ២០១៩ ដោយក្នុងនោះ មុខទំនិញរថយន្តដែលជាប្រភពចំណូលគយដ៏សំខាន់ ថយចុះប្រមាណ៤០%។

ឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដែលជម្រាបជូនសម្តេចតេជោនាយករដ្ឋមន្ត្រី បញ្ជាក់ថា ការកែសម្រួលបញ្ចុះអត្រាអាករពិសេស លើមុខទំនិញរថយន្តមួយចំនួន ដើម្បីបន្ធូរបន្ថយពន្ធលើករថយន្ត ក្នុងគោលដៅស្តារទីផ្សារ កាត់បន្ថយថ្លៃឡូជីស្ទីក និងការការពារបរិស្ថាន។ តាមទិន្នន័យស្ថិតិនាំចូលឆ្នាំ២០២០ និងសន្មតថាបរិមាណរថយន្តនាំចូលមិនប្រែប្រួល ការបញ្ចុះតម្លៃអត្រាអាករពិសេសលើមុខទំនិញរថយន្ត ចំណូលគយអាចបាត់បង់ប្រមាណ ៣០លានដុល្លារ ក្នុងមួយឆ្នាំ។

ការកែសម្រួលបញ្ចុះអត្រាអាករពិសេស លើមុខទំនិញរថយន្តមួយចំនួន នឹងត្រូវចាប់ផ្តើមអនុវត្តចាប់ពីថ្ងៃទី១ ខែមីនា ឆ្នាំ២០២១តទៅ៕