ក្រុមហ៊ុន Apple គ្រោងចំណាយប្រាក់១,២ពាន់លានដុល្លារ ដើម្បីបង្កើតមជ្ឈមណ្ឌលបច្ចេកវិទ្យាដ៏ធំមួយនៅអាល្លឺម៉ង់
អាមេរិក៖ ក្រុមហ៊ុនបច្ចេកវិទ្យាអាមេរិក Apple គ្រោងបោះទុនវិនិយោគជាង១ពាន់លានអឺរ៉ូ ឬស្មើនឹងប្រមាណ១,២ពាន់លានដុល្លារ ដើម្បីបង្កើតមជ្ឈមណ្ឌបច្ចេកវិទ្យាធំមួយមានឈ្មោះថា ស៊ីលីខុន ឌីហ្សាញ សេនធើ (silicon design centre) នៅក្នុងទីក្រុងម៉ូនិច ប្រទេសអាល្លឺម៉ង់ ។
ស្របពេលជាមួយគ្នានេះដែរ ក្រុមហ៊ុន Apple បានអោយដឹងដែរថា រោងចក្រថ្មីនេះនឹងក្លាយជាកន្លែងស្រាវជ្រាវ និងអភិវឌ្ឍន៍ទៅលើមុខងារច្រើនមុខ ហើយក៏ជាកន្លែងស្រាវជ្រាវ និងអភិវឌ្ឍន៍ធំបំផុតនៅអឺរ៉ុប សម្រាប់ការបង្កើតនូវឧបករណ៍ វ៉ាយហ្វាយ (Wireless) និង សូហ្វវែ (Software) ផងដែរ ។
គួរបញ្ជាក់ថា ទីក្រុងម៉ូនិច ប្រទេសអាល្លឺម៉ង់ គឺជាមជ្ឈមណ្ឌលវិស្វកម្ម និងបច្ចេកវិទ្យារបស់ Apple ដ៏ធំជាងគេនៅក្នុងតំបន់អឺរ៉ុប ដោយក្នុងនោះមានវិស្វករប្រមាណជិត១ពាន់៥រយនាក់ ដែលមកពីប្រទេសចំនួន៤០ ហើយធ្វើការងារលើមុខជំនាញផ្សេងៗគ្នា ៕ ប្រភព៖ Reuters
