ទីបំផុតអាល្លឺម៉ង់ បារាំង និងប្រជាជាតិនៅប្លុកអឺរ៉ុបដទៃទៀតប្រកាសពីគម្រោងបន្តការប្រើប្រាស់វ៉ាក់សាំងរបស់ AstraZeneca ឡើងវិញ
បរទេស៖ អាល្លឺម៉ង់ បារាំង និងប្រជាជាតិនៅប្លុកអឺរ៉ុបដទៃទៀតបានប្រកាសពីផែនការបន្តការប្រើប្រាស់វ៉ាក់សាំងបង្ការជំងឺកូវីដ១៩ ដែលផលិតឡើងដោយក្រុមហ៊ុនអង់គ្លេស អាស្រ្តាហ្សេណេកា នៅថ្ងៃព្រហស្បតិ៍នេះ បន្ទាប់ពីនិយ័តករអឺរ៉ុប និងអង់គ្លេសបានផ្តល់នូវទំនុកចិត្តក្នុងការប្រើប្រាស់ ដោយនិយាយថា វ៉ាក់សាំងនេះមានអត្ថប្រយោជន៍ ច្រើនជាងហានិភ័យ ។
ការសន្និដ្ឋានយ៉ាងច្បាស់របស់ទីភ្នាក់ងារឱសថអឺរ៉ុប (EMA) បានបង្ហាញបែបនេះ បន្ទាប់ពីការស៊ើបអង្កេតលើករណីជំងឺឈាមមិនធម្មតា៣០ករណី បានបញ្ជាក់ថា វ៉ាក់សាំងមានអត្ថប្រយោជន៍ក្នុងការការពារមនុស្សពីការស្លាប់ ឬ ពាក់ព័ន្ធនឹងមេរោគដែលទាក់ទងនឹងវីរុសកូរ៉ូណា ខ្ពស់ជាងហានិភ័យដែលអាចកើតមាន ។ ជាមួយគ្នានេះ អគ្គនាយក ទីភ្នាក់ងារឱសថអឺរ៉ុប (EMA) លោកស្រី Emer Cooke បានថ្លែងក្នុងសន្និសិទកាសែតខ្លីមួយថា នេះគឺជាវ៉ាក់សាំងមានសុវត្ថិភាព និងប្រសិទ្ធិភាព… ប្រសិនបើវាជាខ្ញុំនោះ ខ្ញុំនឹងទទួលការចាក់វ៉ាក់សាំងបង្ការនេះនៅថ្ងៃស្អែក ។
ទោះជាយ៉ាងណាក៏ដោយ វាអាស្រ័យលើរដ្ឋនីមួយៗរបស់សហភាពអឺរ៉ុប ក្នុងការសម្រេចថាតើពេលណាត្រូវចាប់ផ្តើមចាក់វ៉ាក់សាំងរបស់ក្រុមហ៊ុន អាស្រ្តាហ្សេណេកា ឡើងវិញ ខណៈប្រទេសស៊ុយអែតបាននិយាយថា ខ្លួនត្រូវការពេលវេលាពីរបីថ្ងៃដើម្បីសម្រេចចិត្ត ៕ ប្រភព៖ Reuters
