លោក ចូ បៃដិន បញ្ជាអោយបើកការស៊ើបអង្កេតពីប្រភពដើមនៃវីរុស Covid-19 ហើយត្រូវរាយការណ៍មកកាន់លោកវិញក្នុងរយៈពេល៩០ថ្ងៃ
អាមេរិក៖ ប្រធានាធិបតីអាមេរិកលោក ចូ បៃដិន នៅថ្ងៃពុធនេះ បានបញ្ជាអោយទីភ្នាក់ងារស៊ើបអង្កេតធ្វើសេចក្តីរាយការណ៍ទៅកាន់រូបលោក នៅក្នុងរយៈពេល៣ខែបន្ទាប់ ថាតើវីរុសកូវីដ១៩លេចចេញដំបូងនៅក្នុងប្រទេសចិន តាមរយៈប្រភពពីសត្វ ឬពីគ្រោះថ្នាក់ណាមួយនៅមន្ទីរពិសោធន៍ ។
លោក ចូ បៃដិន បានបញ្ជាក់នៅក្នុងសេចក្តីថ្លែងការណ៍មួយ ដែលចេញផ្សាយដោយសេតវិមានថា ទីភ្នាក់ងារស៊ើបអង្កេតគួរបង្កើនកិច្ចខិតខំប្រឹងប្រែងរបស់ខ្លួនទ្វេដង ដើម្បីប្រមែប្រមូល និងវិភាគទៅលើប្រភពព័ត៌មាន ដែលអាចនាំយកមកនូវការសន្និដ្ឋានជាក់លាក់មួយ ហើយត្រូវរាយការណ៍មកកាន់លោកវិញនៅក្នុងរយៈពេល៩០ថ្ងៃ ។ លោក បៃដិន ក៏បានបញ្ជាទៅបណ្តាកន្លែងពិសោធន៍ជាតិអាមេរិកអោយជួយការងារស៊ើបអង្កេត ហើយសហគមន៍ស៊ើបការណ៍ត្រៀមបញ្ជីសួរសំណួរទៅរដ្ឋាភិបាលចិន ។
ស្ថានទូតចិនប្រចាំសហរដ្ឋអាមេរិកបាននិយាយនៅថ្ងៃព្រហស្បតិ៍នេះថា ការប្រែក្លាយរឿងប្រភពជំងឺកូវីដ១៩ទៅជាបញ្ហានយោបាយ នឹងរារាំងរំខានដល់ការស៊ើបអង្កេត ។ ស្ថានទូតចិនបានបញ្ជាក់ថា ចិនគាំទ្រការសិក្សាពិស្តារមួយនៃករណីជំងឺកូវីដ១៩ទាំងអស់ដែលត្រូវបានរកឃើញនៅទូទាំងពិភពលោក និងការស៊ើបអង្កេតទូទៅមួយលើមូលដ្ឋានសម្ងាត់ខ្លះ ព្រមទាំងកន្លែងពិសោធន៍ស្រាវជ្រាវជីវសាស្ត្រនៅទូទាំងពិភពលោក ៕ ប្រភព៖ ប្រភព៖ CNA
