ប្រមុខការពារជាតិកម្ពុជាៈ ភាគីចិនជួយអភិវឌ្ឍកំពង់ផែរាមដោយមិនមានចំណង និងទុកឱ្យកម្ពុជាជាអ្នកប្រើប្រាស់
ភ្នំពេញៈ ប្រមុខការពារជាតិកម្ពុជាសម្តេចពិជ័យសេនា ទៀ បាញ់ បានមានប្រសាសន៍ថាភាគីចិនដែលជាមិត្តដែកថែប បានជួយអភិវឌ្ឍកំពង់ផែរាមរបស់កម្ពុជាឱ្យទំនើបជាងមុនដោយមិនមានចំណង ហើយបន្ទាប់ពីសង់រួចទុកឲ្យកម្ពុជា ជាអ្នកប្រើប្រាស់ដោយអនុវត្តស្របតាមរដ្ឋធម្មនុញ្ញមិនមែនសម្រាប់ផ្តាច់មុខឲ្យចិននោះទេ។
ការរួមចំណែកក្នុងការអភិវឌ្ឍកំពង់ផែរាមនេះ ដើម្បីលើកកម្រិតវិស័យការពារជាតិកម្ពុជា ខាងផ្នែកសមុទ្រឬឱ្យកម្ពុជា មានមូលដ្ឋាន ដើម្បីមានកន្លែងសមរម្យ មានរោងជាងសម្រាប់ជួសជុលបណ្តានាវាខាងសមុទ្រមានផែសម្រាប់ចត នាវាឱ្យបានសមរម្យ។ សព្វថ្ងៃនេះ គឺឃើញច្បាស់ហើយ ទឹកវារ៉ាក់តូច អត់មានរោងជាងទេ ដូច្នេះគេមកជួយនេះ កម្ពុជាដឹងគុណណាស់ អរគុណគេ ហើយជំនួយនេះមានការជជែកវែកញែកគ្នាច្បាស់លាស់គេជួយដោយអត់មាន ចំណងទេ។
ការបញ្ជាក់អំពីការអភិវឌ្ឍកំពង់ផែរាមរបស់កម្ពុជាបានធ្វើឡើងបន្ទាប់ពីសារព័ត៌មានមួយចំនួនរបស់សហអាមេរិក នៅតែបន្តវាយប្រហារជាបន្តបន្ទាប់ថា កម្ពុជាបានអនុញ្ញាតឱ្យចិន ដាក់មូលដ្ឋានទ័ពនៅក្នុងប្រទេសនៅតំបន់រាម ខណៈដែលកម្ពុជាបានបំភ្លឺម្តងហើយម្តងទៀតថា ខ្លួនមិនអនុវត្តផ្ទុយពីរដ្ឋធម្មនុញ្ញនោះឡើយហើយក៏មិនមានមូលដ្ឋាន ទ័ពបរទេសនៅក្នុងប្រទេសកម្ពុជានោះដែរ។
សម្តេចពិជ័យសេនា ទៀ បាញ់ បានមានប្រសាសន៍ប្រាប់បណ្តាញព័ត៌មាន Fresh News នៅថ្ងៃទី០២ ខែមិថុនា នេះថា រាល់ហេដ្ឋារចនាសម្ព័ន្ធសម្រាប់បម្រើការងារឲ្យកងទ័ពជើងទឹក មានតម្រូវការសាងសង់, ការអភិវឌ្ឍតំបន់រាមនេះមិនមែន ប្រាក់តិចតួចអាចធ្វើបាននោះទេ ហើយកម្ពុជាក៏មិនមានលទ្ធភាពក្នុងការអភិវឌ្ឍដោយខ្លួនឯងដែរគឺមានចិនជាដៃគូបាន ផ្តល់ជំនួយ ហើយថា កម្ពុជាបានរំលឹកអំពីគុណបំណាច់របស់ភាគីចិន ដែលបានជួយអភិវឌ្ឍសេដ្ឋកិច្ចកម្ពុជា។
សម្តេចពិជ័យសេនាបានបញ្ជាក់យ៉ាងដូច្នពថា «ឥឡូវនេះ (កំពង់ផែរាម) គឺចាប់ផ្តើមដំណើរការ (សាងសង់) ហើយ ដោយបញ្ជូន(សម្ភារៈ) មកដើម្បីកសាងតាមតម្រូវការកម្ពុជាហើយកម្ពុជាទេជាអ្នកប្រើប្រាស់កម្ពុជាទេអភិវឌ្ឍជាតិមាតុភូមិ របស់ខ្លួន, មិនមែនសម្រាប់ផ្តាច់មុខឲ្យចិននោះទេ។ តើកម្ពុជាមានសិទ្ធិទេក្នុងការស្វះស្វែងរកជំនួយមកអភិវឌ្ឍប្រទេសខ្លួន? រដ្ឋធម្មនុញ្ញកម្ពុជា បានចែងច្បាស់ណាស់ ប្រទេសកម្ពុជារក្សាសិទ្ធិទទួលជំនួយបរទេសជា អាវុធ គ្រាប់រំសេវ ការហ្វឹកហ្វឺន និងបញ្ហាផ្សេងៗទៀតដើម្បីការពារជាតិ មាតុភូមិរបស់ខ្លួន និងការពារសណ្តាប់ធ្នាប់របស់ប្រទេស។ ពិតហើយថា សមុទ្រយើងតូចតែយើងក៏ត្រូវការមានដែរ នូវកន្លែងសំចតនាវា រោងជាងសម្រាប់ជួសជុលយើងក៏មានដែរនូវនាវាតូចតាចមួយចំនួនហើយបើយើងមានលទ្ធភាពយើង ក៏ត្រូវអភិវឌ្ឍនាវារបស់យើងឱ្យមានទំហំធំជាងមុន»។
ប្រមុខការពារជាតិកម្ពុជាជឿជាក់ថា ការចោទប្រកាន់របស់សារព័ត៌មានអាមេរិកមកលើកម្ពុជាមិនមែនដោយសារតែ ការអភិវឌ្ឍតំបន់រាមនោះទេ ប៉ុន្តែអាចដោយសារកត្តាភូមិសាស្ត្រនយោបាយ។សម្តេចបានចាត់ទុកថា ការដែលផ្សាយថា កម្ពុជាបានប្រគល់កំពង់ផែរាមទៅឱ្យចិនគ្រប់គ្រងផ្តាច់មុខ គឺជាការនិយាយបែបងងើល ដែលធ្វើដូចជាថា កម្ពុជាគ្មានច្បាប់ ឬគ្មានសិទ្ធិធ្វើអ្វីទាំងអស់។ សម្តេចបានបញ្ជាក់ហើយថា រដ្ឋធម្មនុញ្ញរបស់យើងបានចែងច្បាស់ហើយថាកម្ពុជាមិន អនុញ្ញាតឱ្យមានមូលដ្ឋានទ័ពបរទេសនៅក្នុងប្រទេសរបស់ខ្លួនទេហើយយើងមិនក៏មិនមានមូលដ្ឋានទ័ពនៅក្រៅប្រទេស ដែរ ដែលបញ្ហានេះកម្ពុជាបានបញ្ជាក់ច្រើនលើកច្រើនសារហើយ «ប៉ុន្តែគេមិនយកត្រចៀកស្តាប់»៕ដោយៈពលជ័យ
