យោងតាមរបាយការណ៍របស់ក្រសួងសុខាភិបាល គិតត្រឹមថ្ងៃទី៨មិថុនាឆ្នាំ២០២១ កម្ពុជាបានចាក់វ៉ាក់សាំងជូនប្រជាពលរដ្ឋបានចំនួន២លាន៧សែន៧ម៉ឺន៤៣៧នាក់ហើយដែលស្មើនឹង២៧,៧០%នៃចំនួនប្រជាជនដែលគ្រោងនឹងចាក់ជាង១០លាននាក់ ក្នុងនោះបានចាក់វ៉ាក់សាំងទី២ដូសរួចមានចំនួន២លាន២សែន៣ម៉ឺន៥ពាន់១៤៨នាក់។

ដោយឡែក របាយការណ៍ក្រសួងការពារជាតិ បានឲ្យដឹងថា រយៈពេល៣៩ថ្ងៃ ចាប់ពីថ្ងៃទី១ដល់ថ្ងៃទី៨មិថុនាឆ្នាំ២០២១ ក្រុមការងារចាក់វ៉ាក់សាំងរបស់ក្រសួងការពារជាតិ បានចាក់ជូនប្រជាពលរដ្ឋនៅអតីតតំបន់ក្រហមក្នុងរាជធានីភ្នំពេញបានចំនួន៩៩ម៉ឺន៣ពាន់៩០២នាក់ ខណៈចាក់លើកទី២ បានចំនួន៧៥ម៉ឺន៥ពាន់៥៧៦នាក់។

របាយការណ៍បានបង្ហាញថា ក្នុងចំណោមអ្នកចាក់ទាំងជាង៩៩ម៉ឺននាក់នោះ មានចំនួន៦ខណ្ឌដែលជាអតីតតំបន់ក្រហម រួមមាន ណ្ឌមានជ័យចាក់បាន១៩ម៉ឺន៧៣៦នាក់, ខណ្ឌដង្កោ ចាក់បាន១៤ម៉ឺន៣ពាន់២៦៩នាក់, ខណ្ឌកំបូល ចាក់បាន១១ម៉ឺន៣ពាន់៧៩០នាក់, ខណ្ឌពោធិ៍សែនជ័យ ចាក់បាន៣៤ម៉ឺន៧ពាន់៤៧៩នាក់, ខណ្ឌឫស្សីកែវ ចាក់បាន១១ម៉ឺន៤ពាន់៧៧៥នាក់ និងខណ្ឌទួលគោក ចាក់បាន៨ម៉ឺន៣ពាន់៨៥៣នាក់។