រដ្ឋមន្ត្រីក្រសួងកសិកម្ម៖ គម្រោងស្តីពីសន្តិសុខស្បៀងសម្រាប់កសិករក្រីក្រ នឹងជួយអោយកសិករអាចរកចំណូលពីការចិញ្ចឹមមាន់ជាង១០លានរៀលក្នុងមួយខែ (មានវីដេអូ)
កម្ពុជា៖ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍អោយដឹងថា តាមរយៈគម្រោងស្តីពីសន្តិសុខស្បៀងសម្រាប់កសិករក្រីក្រ-ការធ្វើឱ្យប្រសើរឡើងពូជមាន់ក្នុងស្រុក និងការលើកកម្ពស់ផលិតភាព ធ្វើអោយប្រជាកសិករខេត្តអាចរកប្រាក់ចំណេញបានរហូតដល់ជាង១០លានរៀលនៅក្នុងមួយខែ ។
ឯកឧត្តមបន្តថា គម្រោងខាងលើនេះ ទទួលបានការឧបត្ថម្ភហិរញ្ញវត្ថុពីរាជរដ្ឋាភិបាល និងប្រជាជនជប៉ុន ដែលដាក់អោយអនុវត្តសាកល្បងដោយអគ្គនាយកដ្ឋានសុខភាពសត្វ និងផលិតកម្មសត្វ សម្រាប់វគ្គទី១ គឺចាប់ពីឆ្នាំ២០១៦-២០១៨ និងវគ្គទី២ ពីឆ្នាំ២០២០-២០២១ នៅខេត្តគោលដៅចំនួន០៣ រួមមានខេត្តត្បូងឃ្មុំ តាកែវ និងខេត្តកំពង់ឆ្នាំង ។ ឯកឧត្តមបន្ថែមថា គម្រោងនេះមានគោលបំណងធ្វើការសិក្សាស្រាវជ្រាវ ដើម្បីស្វែងរកគំរូចិញ្ចឹមមាន់ជាលក្ខណៈគ្រួសារសមស្របមួយ សំដៅលើនិរន្តរភាពផលិតកម្ម និងប្រសិទ្ធភាពសេដ្ឋកិច្ច ដែលអាចអោយកសិករចាប់យករបរចិញ្ចឹមមាន់ពូជក្នុងស្រុក ជាអាជីពគ្រឹះរឹងមាំមួយសម្រាប់លើកកម្ពស់កម្រិតជីវភាពឲ្យបានល្អប្រសើរ តាមរយៈការអនុវត្តបច្ចេកទេសបង្ហាញសាមញ្ញ និងសមស្របមួយក្នុងបរិបទ នៃការប្រែប្រួលអាកាសធាតុ ។
ឯកឧត្តមរដ្ឋមន្ត្រីបញ្ជាក់ទៀតថា ក្រៅពីជួយបណ្តុះបណ្តាលបច្ចេកទេសអំពីការចិញ្ចឹម ការផ្តល់ និងផ្សំចំណី ការថែទាំ ការបង្ការ និងការពារជំងឺសត្វការគ្រប់គ្រងផលិតកម្ម-សេវាកម្មសុខភាព និងការគ្រប់គ្រងហិរញ្ញវត្ថុ ។ លើសពីនេះ គម្រោងបានផ្តល់ទ្រុង (ទំហំ១២មx៤ម រៀបឥដ្ឋ ជញ្ជាំងសំណាញ់ លួសប្រក់សាំង្កសី) ពូជមាន់ចំនួន៨៤ក្បាល (មេ៧២) ទូភ្ញាស់ ០១គ្រឿង និងឧបករណ៍-សម្ភារៈមួយចំនួនទៀតសរុបថវិកាប្រមាណ១០លានរៀល/គ្រួសារ និងបានជួយរៀបចំទស្សនៈកិច្ចសិក្សាកន្លែងចិញ្ចឹមមាន់ ដែលទទួលបានជោគជ័យ ដើម្បីចែករំលែក និងផ្លាស់ប្តូរបទពិសោធន៍អំពីការអនុវត្តទីផ្សារ និងការគ្រប់គ្រងហិរញ្ញវត្ថុផងដែរ ។ ចំពោះប្រាក់ចំណេញដែលប្រជាកសិករ ទទួលបានចន្លោះចាប់ពី៣៧ម៉ឺន៥ពាន់ទៅ១២លាន៧៥ម៉ឺនរៀលក្នុង១ខែ ៕
