រដ្ឋមន្រ្តីការបរទេសប្រទេស G20 អំពាវនាវអោយមានកិច្ចខិតខំប្រឹងប្រែងជាពហុភាគី ដើម្បីដោះស្រាយវិបត្តិសកល (មានវីដេអូ)
អ៊ីតាលី៖ រដ្ឋមន្រ្តីការបរទេសប្រទេស G20 នៅថ្ងៃអង្គារនេះ បានធ្វើការអំពាវនាវអោយមានកិច្ចខិតខំប្រឹងប្រែងជាពហុភាគី ដើម្បីដោះស្រាយវិបត្តិសកល ក្នុងនោះរួមមានបញ្ហាជំងឺកូវីដ១៩ និងការប្រែប្រួលអាកាសធាតុជាដើម ក្នុងអំឡុងកិច្ចប្រជុំទល់មុខគ្នាជាលើកដំបូងរបស់ពួកគេក្នុងរយៈពេល០២ឆ្នាំមកនេះ ។
រដ្ឋមន្រ្តីការបរទេសអ៊ីតាលីលោក ល្វីជី ឌី ម៉ៃអូ បានប្រាប់ក្រុមរដ្ឋមន្រ្តីមកពីប្រទេសមានសេដ្ឋកិច្ចជឿនលឿន G20 នៅក្នុងទីក្រុងម៉ាធើរ៉ា ប្រទេសអ៊ីតាលីថា ជំងឺរាតត្បាតបានបង្ហាញពីតម្រូវការសម្រាប់ការឆ្លើយតបជាអន្តរជាតិ ចំពោះភាពអាសន្នដែលឆ្លងដែនពីប្រជាជាតិមួយទៅប្រជាជាតិមួយ ។ រដ្ឋមន្ត្រីការបរទេសអាមេរិកលោក អាន់តូនី ប្លីងខិន ថា ដើម្បីបញ្ចប់នូវជំងឺរាតត្បាតកូវីដ១៩ យើងត្រូវតែធ្វើឲ្យមានវ៉ាក់សាំងកាន់តែច្រើនឡើងនៅក្នុងកន្លែងជាច្រើនថែមទៀត ។ កិច្ចសហប្រតិបត្តិការពហុភាគី ជាគន្លឹះដ៏សំខាន់នៅក្នុងការបញ្ចប់នូវវិបត្តិសុខភាពជាសាកលនេះ ។ លោក ប្លីងខិន ក៏បានបញ្ជាក់ផងដែរ ពីការចូលរួមវិភាគទានរបស់អាមេរិកដល់កម្មវីធីវ៉ាក់សាំង COVAX របស់អង្គការសុខភាពពិភពលោក ដើម្បីផ្តល់វ៉ាក់សាំងបង្ការកូវីដ១៩ដល់ប្រទេសដែលមានប្រាក់ចំណូលទាប និងមធ្យម ។ គួរកត់សម្គាល់ ប្រទេសអ៊ីតាលី គឺជាចំណតចុងក្រោយសម្រាប់ដំណើរទស្សនកិច្ចទៅកាន់ទ្វីបអឺរ៉ុបរបស់លោក ប្លីងខិន ដែលរួមមានសន្និសីទអំពីប្រទេសលីប៊ីនៅក្នុងប្រទេសអាល្លឺម៉ង់ ជំនួបជាមួយប្រធានាធិបតីបារំាង លោក អែមម៉ានុយអែល ម៉ាក្រុង នៅក្នុងទីក្រុងប៉ារីស និងជំនួបជាមួយសម្ដេចប៉ាបនៅបុរីវ៉ាទីកង់ ៕ ប្រភព៖ CNA
